1 Crónicas
12 Kay runas Davidman ujchaykukorqanku Ziclagpi+ kashajtin, chaypacha Davidqa Quispa wawan Saulmanta ayqeykachakuspa purisharqa.+ Paykunaqa wapu soldadosnin ukhupi karqanku, maqanakuspitaj Davidta yanapaj kanku.+ 2 Paykunaqa flechana arcosniyoj* karqanku, pañawanpis lloqʼewanpis sumajta warakʼayta yachaj kanku,+ flechana arcotapis pañawanpis lloqʼewanpis flechallaj kanku. Chay runasqa Benjamín ayllumanta* karqanku Saulpa hermanosnin.+ 3 Paykunaj kamachejninkoqa Ahiézer karqa Joaswan khuska. Iskayninku guibeatita+ Semaaj wawasnin karqanku. Chantá kashallarqankutaj Azmavetpa+ wawasnin Jezielwan Peletwan. Chantá Beracá, anatotita Jehú, 4 gabaonita+ Ismayá, payqa chay kinsa chunka wapu soldadosmanta ujninku karqa,+ kinsa chunkantinmantataj kamachejninku karqa. Chantá Jeremías, Jahaziel, Johanán, guederatita Jozabad, 5 Eluzái, Jerimot, Bealías, Semarías, harifita Sefatías, 6 Elcaná, Isías, Azarel, Joézer, Jasobeam ima, chaykuna karqanku coreítas.+ 7 Chantá Joelawan Zebadiaswan, paykunaqa Guedormanta Jerohampa wawasnin karqanku.
8 Wakin gaditasqa Davidpa tropasninman ujchaykukorqanku chʼinnejpi pakakushajtin.+ Paykunaqa wapu soldados karqanku, guerrapi maqanakunankupaj sumaj wakichisqas, jatuchaj escudosniyoj, tʼojsina lanzasniyoj karqanku, maqanakunankupajpacha. Paykunaj uyankoqa leonpa uyan jina karqa, orqospi tarukas jinataj manchay ligeros karqanku. 9 Kaykuna kamachejkuna karqanku: ñaupaj kajqa Ézer karqa, iskay kajqa Abdías karqa, kinsa kajqa Eliab karqa, 10 tawa kajqa Mismaná karqa, phishqa kajqa Jeremías karqa, 11 sojta kajqa Atái karqa, qanchis kajqa Eliel karqa, 12 pusaj kajqa Johanán karqa, jisqʼon kajqa Elzabad karqa, 13 chunka kajqa Jeremías karqa, chunka ujniyoj kajtaj Macbanái karqa. 14 Chaykuna karqanku gaditas,+ paykunaqa soldadospa capitanesninku karqanku. Paykunamanta aswan pisi kallpaqa 100 soldadosta atipaj, aswan kallpasapataj 1.000 soldadosta.+ 15 Paykuna ñaupaj kaj killapi Jordán mayuta pasarqanku, yaku mayuta wasariykamushajtin. Chantá uray mayupi tiyakojkunata ayqecherqanku inti llojsimuy ladoman, inti yaykuy ladomanpis.
16 Chantá Benjamín ayllumanta, Judá ayllumantawan wakin runas jamullarqankutaj David pakakusharqa chayman.+ 17 Davidtaj llojsimuspa paykunaj ñaupaqenkupi sayaykuspa nerqa: “Sichus mana maqanakojchu jamunkichej chayqa, sichus yanapawaj jamunkichej chayqa, amigosniy kankichej. Pero sichus wasanchanawaykichejpaj jamushawankichej, enemigosniyman jaywaykunawaykichejpaj, ni ima sajrata ruwashajtillay chayqa, ñaupa tatasninchejpa Diosnin chayta rikuspa justiciata ruwachun”,+ nispa. 18 Chaypacha Diospa espiritun jamorqa+ 30 soldadosta kamachej Amasaiman, Amasaitaj Davidta nerqa:
“David, noqaykoqa qanpata kayku. Jesej wawan David, qanwan kashayku.+
Allin kausay qanpaj kachun,* qanta yanapasojkunapajpis allin kausay kachun.
Diosniyki qanta yanapashasunki”,+ nispa.
Chantá Davidqa paykunata kʼachamanta japʼikorqa, tropa soldadosta kamachinankupajtaj churarqa.
19 Chantá Manasés ayllumanta wakin runasqa Davidpa tropasninman ujchaykukorqanku filisteoswan khuska Saulwan maqanakoj jamushajtin. Jinapis Davidqa mana filisteosta yanaparqachu. Filisteosta kamachejkunaqa+ parlanakuytawan Davidta kachapusqanku, paykunaqa ninakusqanku: “Davidqa señornin Saulman kutikonqa, noqanchejtataj wañuchiwasun”,+ nispa. 20 Manasés ayllumantaqa kay runas Davidpa tropasninman ujchaykukorqanku Ziclagpi kashajtin.+ Paykuna karqanku: Adná, Jozabad, Jediael, Miguel, Jozabad, Elihú, Ziletái ima. Paykuna karqanku Manasés ayllupi waranqa runasta kamachejkuna.+ 21 Paykuna Davidta yanaparqanku suwa tropaswan maqanakushajtin. Chay runasqa tukuyninku kallpasapas, ni imata manchachikoj karqanku.+ Chantá soldadospa capitanesninku kaporqanku. 22 Diamanta día runasqa jamoj kanku Davidta yanapanankupaj,+ ajinamanta Davidpa ejercitonqa* may chhika karqa, Diospa ejerciton jinapuni.+
23 Kay chhika karqanku guerrapaj wakichisqa soldadospa kamachejkunasninku. Paykunaqa Hebronpi+ Davidman ujchaykukorqanku Saulpa gobiernonta payman entreganankupaj, Jehová Dios kamachisqanman jina.+ 24 Judá ayllumantaqa karqanku 6.800 soldados guerrapaj wakichisqa, jatuchaj escudosniyoj, tʼojsina lanzasniyojtaj. 25 Simeonitasmantataj ejercitopi karqanku 7.100 wapu soldados, ni imata manchachikoj soldados.
26 Levitasmantataj 4.600 karqanku. 27 Aaronpa wawasninmanta+ kamachejtaj Jehoiadá+ karqa, paywantaj kasharqanku 3.700 levitas. 28 Chantá kashallarqataj Sadoc,+ payqa wapu joven karqa, ni imata manchachikojchu. Chayllapitaj kasharqanku ñaupa tatasninpa familiasninkumanta 22 umas kajkuna.
29 Benjaminitasmantataj 3.000 karqanku, Saulpa+ hermanosnin. Ñaupajtaqa paykunamanta casi tukuyninku Saulpa familianman kutisqa karqanku. 30 Efraimitasmantataj kasharqanku 20.800 kallpasapa runas, paykunaqa ni imata manchachikojchu kanku, ñaupa tatasninkoj familiasninkupitaj may rejsisqas karqanku.
31 Manasespa khuskan ayllunmantataj 18.000 runas karqanku. Paykunaqa ajllasqa karqanku, jamuspa reyta jina Davidta churanankupaj. 32 Isacarpa ayllunmantaqa 200 kamachejkuna karqanku. Paykunaqa sumajta reparaj kanku imata ruwana tiempochus kasqanta, yachajtaj kanku imatachus Israel nación ruwanan kasqanta. Tukuynin hermanosninkutaj paykunaj mandonkupi kasharqanku. 33 Zabulón ayllumantataj 50.000 runas karqanku ejercitoman yaykunankupajpacha, guerrapi maqanakunankupaj wakichisqas, tukuy imaymana armasniyoj. Paykunaqa Davidman tukuy sonqo sayasqa karqanku. 34 Neftalí ayllumantataj 1.000 kamachejkuna karqanku, paykunawan khuskataj 37.000 runas karqanku jatuchaj escudosniyoj, tʼojsina lanzasniyoj ima. 35 Dan ayllumantataj guerraman yaykojkunaqa 28.600 karqanku. 36 Aser ayllumantataj, pikunachus ejercitopi sirvinankupaj jina, guerramantaj yaykunankupaj jina kajkunaqa 40.000 karqanku.
37 Jordán mayu chimpamantataj,+ rubenitasmanta, gaditasmanta, Manasespa khuskan ayllunmantawan 120.000 soldados karqanku, imaymana armasniyoj. 38 Paykunaqa tukuyninku guerrapi maqanakuyman yachasqa karqanku, guerraspitaj tinkoj kanku. Paykunaqa Hebronman tukuy sonqo jamorqanku Davidta reyta jina churanankupaj, tukuynin Israelta kamachinanpaj. Tukuynin israelitaspis de acuerdo kasharqanku Davidta reyta jina churanankupaj.+ 39 Chaypitaj Davidwan kinsa diasta quedakorqanku mikhuspa, ujyaspa. Hermanosninkoqa tukuy imata paykunapaj wakichipusqanku. 40 Chantapis paykunaj qayllallankupi tiyakojkuna, Isacar ayllupi, Zabulón ayllupi, Neftalí ayllupi tiyakojkunapis jamuspa apamorqanku mikhuykunata burrospi, camellospi, mulaspi, torospi ima. Paykunaqa apamorqanku jakʼuta, qʼapisqa higosta, kʼisasta, vinota, aceitetawan. Chantá apamullarqankutaj ashkha wakasta, ovejastapis, Israelpi manchay kusiy kasqanrayku.