1 Crónicas
13 Davidqa tapurerqa waranqa runaspa kamachejkunasninkuta, pachaj runaspa kamachejkunasninkuta, tukuynin waj kurajkunatawan.+ 2 Chantá Davidqa Israelmanta tukuy tantasqa runasman nerqa: “Sichus qankunaman allin rijchʼasunkichej chayqa, sitajchus Jehová Diosninchej chayta allinpaj qhawanqa chayqa, tukuynin Israel jallpʼasman uj willayta apachisunchej hermanosninchejman, sacerdotesman, levitasmanpis llajtasninkupi+ pasto jallpʼasnintinman, paykunapis jamuspa noqanchejwan khuska ujchakunankupaj. 3 Diosninchejpa arcanta apakanpunanchejpaj”,+ nispa. Saúl kamachishajtin israelitasqa arcata mana cuidasqankuchu.+ 4 Tukuy tantasqa kajkunataj de acuerdo kasharqanku chayta ruwanankupaj, tukuyninkuman allin rijchʼarqa. 5 Chantá Davidqa tukuynin israelitasta tantacherqa Egipto mayumantapacha* Lebó-Hamatkama,*+ Quiryat-Jearim llajtamanta cheqa Diospa* arcanta apamunankupaj.+
6 Davidwan tukuynin israelitaswanqa khuska Baalá+ llajtaman wicharerqanku, nisunman Judaj japʼiyninpi Quiryat-Jearim llajtaman, chaymantapacha Jehová Diospa* arcanta apamunankupaj. Payqa kamachina tiyananpi tiyasqa kashan querubines* patapi,*+ runastaj chay arca qayllapi Diospa sutinta oqharinku. 7 Chantá cheqa Diospa arcanta uj mosoj carretaman churaspa+ Abinadabpa wasinmanta apamusharqanku. Uzawan Ahiowan chay carretata apamusharqanku.+ 8 Davidwan tukuynin israelitaswanqa cheqa Diospa ñaupaqenpi tukuy sonqo kusirikusharqanku, takirispa, arpasta tocarispa, cuerdasniyoj tocanasta tocarispa, panderetaswan,*+ platilloswan,+ cornetaswan+ ima. 9 Kidón nisqa eraman* chayajtinkutaj torosqa casipuni arcata urmarpacherqanku, Uzataj makinta aysarispa arcata japʼiykorqa. 10 Jehová Diostaj Uzapaj sinchʼitapuni phiñakorqa, wañurpacherqataj makinta aysarispa arcata japʼiykusqanrayku.+ Chaypi Uzaqa Diospa ñaupaqenpi wañorqa.+ 11 Davidtajrí phiñakorqa Jehová Dios Uzapaj sinchʼita phiñakusqanmanta. Chayrayku chay lugartaqa kunankama Pérez-Uzá* sutiwan rejsikun.
12 Davidqa chay pʼunchay cheqa Diosta manchachikuspa nerqa: “¿Imaynatataj cheqa Diospa arcanta tiyakushani chay llajtaman chayachisajri?”,+ nispa. 13 Davidqa mana arcata aparqachu maypichus tiyakusharqa chay llajtaman, nisunman Davidpa Llajtanman. Astawanpis payqa guitita Obed-Edompa wasinman arcata apacherqa. 14 Ajinamanta cheqa Diospa arcanqa Obed-Edompa wasinpi kasharqa kinsa killata, Jehová Diostaj bendicerqa Obed-Edompa familianta, tukuy ima kapusqantapis.+