1 Crónicas
18 Aswan qhepatataj Davidqa filisteosta atiparqa, filisteostaj paypa mandonpi karqanku.+ Chantá Gat llajtata+ paykunamanta qhechorqa, muyuyninmanta ranchostawan. 2 Chantá Moab+ nacionta atiparqa, moabitastaj Davidpa kamachisninman tukuporqanku, impuestotapis payman pagaj kanku.+
3 Davidqa Hamat+ qayllapi atiparqa Zobaj+ reynin Hadadezerta.+ Hadadezerqa Éufrates mayuman+ rishasqa chay lugarestawan japʼikanpoj. 4 Davidqa Hadadezermanta qhechorqa mil carretasta, 7 mil caballospi purej soldadosta, 20 mil soldadostawan.+ Carretasta aysaj tukuynin caballostataj chaki ankusninkuta khuchurarqa, pachaj caballosllata mana imanarqachu.+ 5 Damascomanta sirio soldados jamorqanku Zobaj reynin Hadadezerta yanapaj. Davidtaj 22 mil sirio soldadosta wañuracherqa.+ 6 Chantá Davidqa Siriapi Damasco llajtaman tropa soldadosninta churarqa. Siriostaj kamachisnin kaporqanku, impuestotapis payman pagaj kanku. Davidtaqa Jehová Dios yanapaj atipananpaj* mayman rejtinpis.+ 7 Chantapis Davidqa Hadadezerpa soldadosninmanta qhechorqa qorimanta muyu escudosta, Jerusalenmantaj apakaporqa. 8 Chantá Davidqa Hadadezerpa llajtasnin Tibhatmanta, Cunmantawan may chhika cobreta apakaporqa. Chay cobrewan Salomonqa ruwarqa yakuta churanapaj jatun wirkhita,*+ pilaresta, cobremanta tukuy imastawan.+
9 Hamatmanta rey Touqa yacharqa Davidqa Zobaj reynin Hadadezerpa+ tukuynin ejercitonta atipasqanta.+ 10 Chayrayku rey Touqa chay rato wawan Hadoramta kachamorqa rey Davidta tapurinanpaj imaynachus kashasqanta, chantá felicitaykunanpaj rey Hadadezerta maqanakuspa atipasqanmanta (Hadadezerqa ashkha kutista rey Touwan maqanakusqa). Hadoramqa Davidpaj apamorqa tukuy laya* imasta qorimanta, qolqemanta, cobremantapis. 11 Chay apamusqantataj rey Davidqa Jehová Diospaj tʼaqaporqa,+ imaynatachus chay waj nacionesmanta apamusqan qolqeta, qoritapis tʼaqaporqa ajinata. Chaykunataqa apamorqa: Edommanta, Moabmanta, ammonitasmanta,+ filisteosmanta,+ amalequitasmantawan.+
12 Zeruyaj+ wawan Abisaiqa+ 18 mil edomitasta wañuracherqa Kachi mayupi.+ 13 Payqa tropa soldadosta Edom nacionman churarqa, tukuy edomitastaj Davidpa kamachisninman tukuporqanku.+ Davidtaqa Jehová Dios yanapaj atipananpaj* mayman rejtinpis.+ 14 Davidqa tukuynin Israel nacionta kamacherqa,+ tukuynin nacionpaj justiciata, cheqa kajtawan ruwarqa.+ 15 Zeruyaj wawan Joabqa ejercitomanta cargoyoj karqa,+ Ahiludpa wawan Jehosafatqa+ reypa qhelqerin karqa, 16 Ahitubpa wawan Sadocwan Abiatarpa wawan Ahimelecwantaj sacerdotes karqanku, Savsataj secretario karqa. 17 Jehoiadajpa wawan Benayaqa cargoyoj karqa keretitasmanta,+ peletitasmantawan.+ Davidpa wawasnintaj sumaj cargosniyoj karqanku reypa ladonpi.