2 Crónicas
13 Jeroboán Israelpi 18 watastaña kamachishajtin, Abiasqa Judata rey jina kamachiyta qallarerqa.+ 2 Abiasqa kinsa watasta Jerusalenpi kamacherqa. Mamanpa sutenqa Micaya+ karqa, Micayaqa Guibeamanta+ Urielpa wawan karqa. Abiaswan Jeroboanwanqa guerrapi tinkorqanku.+
3 Abiasqa maqanakoj kachaykukorqa 400.000 wapu soldadosninwan, maqanakupaj sumaj wakichisqa* soldadosninwan.+ Jeroboantaj Abiaswan maqanakunanpaj listo sayaykorqa 800.000 wapu soldadosninwan, maqanakupaj sumaj wakichisqa* soldadosninwan. 4 Chantá Abiasqa Zemaraim orqo puntapi sayaykorqa, mayqenchus kashan Efraín orqos chaynejpi, nerqataj: “Jeroboán uyariway, tukuynin israelitaspis uyariwaychej. 5 ¿Nichu yachankichej Israelpa Diosnin Jehovaqa Davidta churasqanta wiñaypaj Israelta kamachinanpaj?+ ¿Nichu Diosqa payta, wawasnintapis kamachinankupaj churarqa+ uj kachi tratota* ruwaspa?+ 6 Nebatpa wawan Jeroboantaj,+ pichus Davidpa wawan Salomonpa kamachin karqa chaymin señorninpa contranta sayaykuspa oqharikorqa.+ 7 Paywanqa purej kanku ni ima ruwanayoj runas, ni imapaj valej runas. Chaykunataj Salomonpa wawan Rehoboamta atiparqanku. Rehoboamqa jovenllaraj karqa, manchikojtaj, nitaj paykunaman sayaykuyta aterqachu.
8 ”Kunantaj qankunaqa ashkha kankichej, tiyapusunkichejtaj qorimanta chay waka uñas, mayqentachus Jeroboán diosesniykichej kananpaj ruwarqa chaykuna. Chayman atienekuspa qankunaqa yuyashankichej Jehová Diospa gobiernonman sayaykuyta atisqaykichejta, mayqenchus Davidpa wawasninpa makinpi kashan chayman.+ 9 Qankunaqa wijchʼumorqankichej Aaronpa mirayninmanta Jehová Diospa sacerdotesninta,+ levitastapis. Waj nacionesmanta runas jinataj qankunalla sacerdotesniykichejta churakorqankichej.+ Pi runallapis torillo qhatirisqa, qanchis carneros* qhatirisqa jamoj chayqa, sacerdote kayta atillaj chay dioses nisqalla kanku chaykunapaj. 10 Jehovamin noqaykoj Diosniykoqa,+ nitaj paytaqa saqerpariykuchu. Sacerdotesniykoqa Aaronpa mirayninmanta kanku, paykunaqa Jehová Diosta sirvishanku, levitaspis ruwanasninkupi paykunata yanapashanku. 11 Paykunaqa sapa paqarin, sapa tardetaj Jehová Diospaj qʼolachina* ofrendasta qʼoshñichinku,+ sumaj qʼapaj inciensotawan khuska.+ Oro puromanta mesapipis sukʼasqa tʼanta* kashan.+ Sapa tardetaj oromanta candelerota,*+ mecherosnintawan japʼichinku.+ Noqaykoqa juntʼashayku imastachus Jehová Diospaj ruwanayku kasqanta, qankunatajrí payta saqerparinkichej. 12 Cheqa Diosqa* noqaykuwan kashan, pay yanapashawayku sacerdotesninwan. Paykunaqa cornetasta waqachenqanku qankunawan maqanakunaykupaj. Israelmanta runas, ama ñaupa tatasniykichejpa Diosnin Jehovawan maqanakuychejchu, manamin paytaqa atipankichejchu”,+ nispa nerqa Abiasqa.
13 Jeroboantajrí wakin soldadosninta pakaykorqa Judaj soldadosninpa qhepa ladonkupi. Ajinamanta Jeroboanpa soldadosnenqa Judaj ñaupaqenpi kasharqanku, chay waj soldadosnintaj Judaj qhepanpi kasharqanku. 14 Judamanta soldadosqa qhepankuta qhawarispa reparakorqanku ñaupaqenkupi kajkunawan maqanakunanku kasqanta, qhepankupi kajkunawanpis. Chayrayku Jehová Diosman qhaparikorqanku,+ sacerdotestaj cornetasninkuta sinchʼita waqacherqanku. 15 Judamanta soldadosqa guerra qallarinanpaj qhaparerqanku. Judamanta soldados ajinata qhaparisqankutawan, cheqa Diosqa Jeroboanta tukuynin Israeltawan atiparqa, Abiaspa rikunanta, Judamanta soldadospa rikunankutapis. 16 Israelitasqa Judaj soldadosninmanta ayqekorqanku, Diostaj israelitasta Judaj makinman jaywaykorqa. 17 Abiaswan soldadosninwanqa may chhika israelitasta wañucherqanku. Chaypacha wañorqanku 500.000 israelitas, guerrapaj sumaj wakichisqa* soldados. 18 Ajinata Israelmanta soldadosqa kʼumuykachachisqa karqanku. Judamanta soldadostaj atiparqanku ñaupa tatasninkoj Diosninku Jehovapi atienekusqankurayku.+ 19 Abiasqa Jeroboanta qhatiykuspa kay llajtasta qhechuykorqa: Betel+ llajtata, muyuyninpi kaj ranchosnintinta, Jesaná llajtata, muyuyninpi kaj ranchosnintinta, Efrén llajtatawan,+ muyuyninpi kaj ranchosnintinta. 20 Abías kamachishajtin Jeroboanqa manaña atiyniyoj kayta aterqañachu. Jehová Diosqa Jeroboanta castigarqa, Jeroboantaj wañuporqa.+
21 Abiastaj aswan atiyniyojman tukorqa. Abiasqa 14 warmisniyoj karqa,+ 22 qhari wawasniyoj, 16 warmi wawasniyojtaj. 22 Abiaspa tukuy kausayninmanta, imastachus ruwasqanmanta, imastachus parlasqanmantapis qhelqasqa kashan profeta Idoj qhelqasqasninpi.*+