2 Crónicas
14 Chantá Abiasqa ñaupa tatasnin jina wañuporqa, Davidpa Llajtanpitaj+ pʼamparqanku. Wawan Asataj paypa cuentanmanta rey karqa. Pay kamachishajtenqa Judá nacionpi chunka watasta ni ima chʼajwapis karqachu.
2 Asaqa Jehová Diosninpa qhawayninpi allin kajtapuni ruwarqa, cheqan kajtapuni ruwarqa. 3 Payqa Judamanta chinkacherqa chay waj llajtayoj diosespa altaresninkuta,+ pata lugarestawan, tʼunarqataj yupaychana rumi pilaresta,+ urmacherqataj yupaychana kʼullu postesta.*+ 4 Chantá Judá nacionta nerqa ñaupa tatasninkoj Diosninku Jehovata sirvinankuta, Leytapis, kamachiykunatapis kasukunankuta. 5 Ajinata Asaqa Judaj tukuynin llajtasninmanta chinkacherqa chay pata lugaresta, incienso altarestapis.+ Asá kamachishajtenqa tukuy nacionnintinpi allin kausay karqa. 6 Judá nacionpi allin kausay kasqanrayku Asaqa sumaj jarkʼachasqa llajtasta ruwacherqa.+ Chay wataspi paypa contranpeqa mana guerras karqachu, Jehová Dios payta samarichisqanrayku.+ 7 Asaqa Judá nacionta nerqa: “Kay llajtasta ruwasunchej, perqaswantaj torreswantaj+ muyuykuchisunchej, punkusniyojta, punku trancana barretasniyojta ruwasunchej. Kay nacionqa makinchejpiraj kashan Jehová Diosninchejta sirvisqanchejrayku. Noqanchejqa Diosta sirvinchej, paytaj tukuynejpi allin kausayta qowanchej”, nispa. Chay llajtasta ruwasqankupitaj allinpuni rerqa.+
8 Asajtaqa Judá ayllumanta* kaporqa 300 mil soldadosnin jatuchaj escudosniyoj, tʼojsina lanzasniyojtaj. Benjamín ayllumantataj karqanku 280 mil wapu soldados juchʼuy escudos aparisqa, flechana arcosniyojtaj.*+
9 Tiemponmantaj Etiopiamanta Zérah jamorqa Judá nacionwan maqanakoj, payqa uj millón soldadosniyoj jamorqa, 300 carretasniyojtaj.+ Maresá+ llajtaman chayamojtintaj, 10 Asaqa llojserqa paywan maqanakoj. Chantá maqanakunankupaj listos sayaykorqanku Zefata mayupi, Maresá llajta qayllapi. 11 Chantá Asaqa Jehová Diosninman rogakuspa+ nerqa: “Jehová Diosníy, qanmin yanapayta atinki atiyniyojkunatapis, mana atiyniyojkunatapis.+ Jehová Diosníy, yanapawayku ari, noqaykoqa qanpi atienekuyku,+ qanpa sutiykipi jamuyku kay chhika runaswan maqanakoj.+ Jehová, qanmin Diosniyku kanki. Ama saqeychu kay wañoj runaslla atipasunankuta”,+ nispa.
12 Jehová Diosqa etíope soldadosta atiparqa Asaj rikunanta, Judaj rikunantapis. Etiopestaj ayqekorqanku.+ 13 Asaqa soldadosninwan khuska etiopesta qhatiykorqanku Guerarkama.+ Etiopesqa kantumanta wañurarqanku nipuni ujpis kausashaj qhepakorqachu. Ajinata Jehová Diosqa ejercitonwan khuska paykunata tukucherqa. Chantá Judamanta soldadosqa etiopespa ashkha imasninkuta apakaporqanku, allin ashkhatapuni. 14 Chaymantataj Guerarpa muyuyninpi kaj llajtasman yaykuykorqanku, Jehová Diosqa chay llajtasmanta runasta sinchʼita manchariykucherqa. Judamanta soldadostaj chay tukuynin llajtasta saquearqanku, chay llajtaspeqa tukuy ima apakunapaj karqa. 15 Paykunaqa yaykuykullarqankutaj uywasniyoj runaspa toldosninkumanpis,* apakaporqankutaj ashkha uywasta, ashkha camellostapis. Chantá Jerusalenman kutiporqanku.