2 Crónicas

27 Jotanqa+ kamachiyta qallarishajtin 25 watasniyoj karqa, Jerusalenpitaj 16 watasta kamacherqa. Mamanpa sutenqa Jerusá karqa, Jerusaqa Sadocpa wawan karqa.+ 2 Jotanqa Jehová Diospa qhawayninpi allin imasta ruwarqa tatan Uzías jina.+ Jinapis mana tatan jinaqa Jehová Diospa templonman yaykuykorqachu.+ Llajta masisnintaj sajra imasta ruwashallarqankupuni. 3 Jotanqa Jehová Diospa wasinpi pata punkuta+ ruwarqa, Ofel+ perqapipis ashkha imasta ruwallarqataj. 4 Chantapis Judaj orqosninpi+ llajtasta ruwallarqataj,+ sachʼasniyoj lugarespipis sumaj jarkʼachasqa lugaresta,+ torrestapis+ sayaricherqa. 5 Ammonitaspa+ reyninkuwan guerrapi maqanakorqa, chantá paykunata atipaykorqa. Chayrayku ammonitasqa chay wata Jotanman qorqanku 3.420 kilos* qolqe metalta, trigotataj 34.783 quintalesta,* granotataj* 28.261 quintalesta.* Ammonitasqa kikillantataj pagarqanku iskay kaj watanman, kinsa kaj watanmanpis.+ 6 Jotanqa aswan atiyniyojman tukorqa Jehová Diosninpa ñaupaqenpi cheqanta purisqanrayku.*

7 Jotanpa tukuy kausayninmanta, guerraspi maqanakusqanmanta, imastachus ruwasqanmantapis qhelqasqa kashan Israelpa, Judajpa Reyesninmanta Libropi.+ 8 Jotanqa kamachiyta qallarishajtin 25 watasniyoj karqa, Jerusalenpitaj 16 watasta kamacherqa.+ 9 Chantá Jotanqa ñaupa tatasnin jina wañuporqa, pʼamparqankutaj Davidpa Llajtanpi.+ Wawan Ajaztaj* paypa cuentanmanta rey jina kamachiyta qallarerqa.+