Salmos
Asafpa+ takiynin.
79 Diosníy, nacionesqa herenciaykiman yaykuykamunku.+
Santo temploykita chʼichichaykunku.+
Jerusalentaqa rumi montonesllataña saqerparinku.+
2 Kamachisniykitapis wañuchispa aycha mikhu pʼisqosman qaraykunku.
Kasukoj kamachisniykita wañuchispa phiña animalesman qaraykunku.+
3 Kamachisniykej yawarninkutaqa yakuta jina tukuynin Jerusalenpi chʼajchurpanku,
nitaj pipis kanñachu paykunata pʼampananpaj.+
4 Ladoykupi kaj nacionespaj asikunanku kayku.+
Muyuyniykupi kaj nacionesqa asipayawayku, burlakuwaykutaj.
5 Jehová Diosníy, ¿maykʼajkamataj phiñasqa kanki? ¿Wiñaypajchu phiñasqa kanki?+
¿Maykʼajkamataj chay phiñakusqayki nina jina laurarenqari?+
6 Mana rejsisunkuchu chay nacionesta castigay.
Sutiykita mana jatunchankuchu chay gobiernostapis castigay.+
7 Chay nacionesqa Jacobpa mirayninta llimphuta wañuchinku,
llajtankutapis chʼinta ruwanku.+
8 Diosníy, ama pagachikuwaykuchu ñaupa tatasniykoj pantasqankumantaqa.+
Diosníy, ama jina kaspa, usqhayllata khuyakuwayku ari,+
kay jinata chay nacionesqa kʼumuykachachiwayku.
9 Salvawaj Diosniyku,+ sumaj sutiykirayku
yanapariwayku ari.
Sutiykirayku kacharichiwayku, juchasniykutapis perdonawayku.+
10 ¿Ima kajtataj chay naciones ninanku kasqa “maytaj Diosninku” nispari?+
Noqaykoqa rikuyta munayku chay naciones castigasqa kanankuta
kamachisniykej yawarninkuta jichʼasqankumanta.+
11 Diosníy, uyariy presosta ay ay nispa phutikusqankuta.+
Jatun atiyniykiwan salvay wañunankupaj juchachasqa kanku chaykunata.+