El Cantar de los Cantares
5 Ovejasta michej joventaj nerqa: “Munasqa chunkitúy, munasqa warmisitáy,
huertayman yaykuniña.+
Huertaymanta mirrata* pallaniña, sumajta qʼaparej plantaytapis.+
Abeja miskʼitapis panalniymanta mikhuniña.
Vinoytapis lecheytapis tomaniña”,+ nispa.
Jerusalenmanta warmistaj nerqanku: “Munasqa amigáy, munasqa amigóy, mikhurikuychej,
tomarikuychej, munanarikuychejtaj sajsakunaykichejkama”,+ nispa.
2 Sipastaj nerqa: “Noqa puñusharqani, sonqoytaj mana puñusharqachu.+
Ajinallapi munasqetayta uyarerqani punkuta takamuspa nimushajta:
‘Munasqa chunkitúy, munasqetáy, kicharimuway.
Munasqa palomitáy, kʼachita doncellitay.
Umayqa chhulla chhullalla kashan.
Chujchayqa joqʼo kashan chʼisin chhullamusqanwan’,+ nispa.
3 Noqataj nerqani, vestidoyta orqhokuniña,
watejmantachá churakunay kanman.
Chakisniytapis mayllakuniña,
watejmantachá chʼichichakunay kanman, nispa.
4 Punku juskʼupi munasqetaypa makinta manaña rikojtiytaj
sonqoyqa ni imanakuyta aterqachu paymanta jina.
5 Chantá sayarikorqani munasqayta kicharimunaypaj.
Makisniymantaqa mirra aceite sutʼusharqa.*
Dedosniymantapis punkoj wisqʼananman
mirra aceite sutʼuykorqa.
6 Punkuta kicharejtiytaj
munasqetayqa ripusqaña, niña chaypichu kashasqa.
Ripusqanmanta ni imanakuyta aterqanichu.
Mayta maskʼamorqani, nitaj tarerqanichu.+
Wajyajtiypis mana uyarimuwarqachu.
7 Llajtamanta guardiastaj taripawarqanku, paykunaqa llajtata qhawaspa purishasqanku.
Paykunaqa maqawarqanku, maytataj nanaykuchiwarqanku.
Perqa patamanta qhawamoj guardiasqa mantillayta* qhechuwarqanku.
8 Jerusalenmanta sipaskuna, jurawaychej:
Munasqetayta rikupuwaspaqa
niripuwaychej paymanta wañurishasqayta”.
9 Jerusalenmanta sipaskunataj taporqanku: “Tukuy warmismanta aswan kʼacha warmisita,
¿imapitaj munasqetayki aswan sumaj kasqa waj jovenesmanta nisqari?
¿Imapitaj munasqetayki aswan sumaj kasqa waj jovenesmanta,
chay jinata jurachinawaykupajri?”, nispa.
10 Sipastaj kuticherqa: “Munasqetayqa may simpático, puka uyita.
Chunka waranqa runas chaupipipis sutʼi rejsiy.
11 Umanqa manchay kʼachitu, sumaj chʼuwachasqa qori jina.
Chujchanqa batirikoj palmera laqhes jina.*
Chujchanqa manchay yanita qharqañaj phurusnin jina.
12 Ñawisitusnenqa yaku kantuspi palomitas jina.
Palomitaspis lechepi mayllakushankuman jina.
Wasaykurimushaj yaku estanquej kantitunpipis chukukushankuman jina.*
13 Uyitanqa sumajta qʼaparej plantitasniyoj huertita jina,+
miskʼita qʼaparej plantitasniyoj loma lomitas jina.
Simisitonqa lirio tʼikas jina, chaymantataj mirra+ aceite sutʼurimushan.
14 Maki dedosnenqa qori tubos jina, crisólito rumiswan kʼachanchasqa.
Wijsanqa sumaj lluskʼachasqa marfil jina, zafiro rumiswan kʼachanchasqa.
15 Chakisnenqa mármol pilares jina, sumaj chʼuwachasqa qori chukus patapi sayasqa.
Rijchʼaynenqa Líbano monte jina manchay kʼachitu, cedro sachʼas+ jina alto.
16 Simenqa miskʼi jina miskʼipuni.
Tukuy ima paypataqa may kʼachitu.+
Ajinamin munasqetayqa, ajinamin munasqa chunkituyqa, Jerusalenmanta sipaskuna”.