Juanqa mosqoypi jina rikun

Apóstol Juan Patmos churupi presochasqa kashajtin, Jesusqa 16 mosqoykunata rikucherqa. Juanqa rikorqa imaynatachus Diospa sutin jatunchasqa kananta, Gobiernon jamunanta ima. Chantá rikullarqataj imaynatachus Diospa munaynin kay jallpʼapi, cielopipis ruwakunanta.

Juanqa mosqoypi jina Jehová Diosta rikorqa cielopi kamachina tiyananpi. Muyuyninpeqa 24 ancianos yuraj ropasniyoj, qori coronasniyoj kasharqanku. Chay kamachina tiyanamantaqa llojsimusharqa lliuj lliujkuna, qhon qhonkuna ima. Chay 24 ancianostaj Jehová Diosta qonqorikuspa yupaycharqanku. Juanqa mosqoypi jina rikullarqataj tukuy nacionesmanta, ayllusmanta, parlaykunamanta ima, may chhika runasta Diosta yupaychashajta. Corderowan ninakoj Jesusqa paykunaj michejninku, kausayta qoj yakumantaj pusan. Chantá rikullarqataj Jesús cielopi Rey jina, 24 ancianoswan gobernashasqanta. Waj mosqoypitaj rikullarqataj Jesusta Satanaswan supaykunawan ima maqanakushajta. Jesusqa paykunata cielomanta kay jallpʼaman wijchʼumorqa.

Juanqa waj mosqoypi rikorqa Corderota, 144.000 ajllasqastawan Sión orqopi sayashajta. Rikullarqataj jallpʼantinpi uj angelta phawaspa nishajta: “Diosta jatunchaychej, yupaychaychejtaj”, nispa.

Waj mosqoypi rikullarqataj Armagedón guerrata. Chay guerrapeqa Jesús, soldadosninwan, Satanaspa mundonta atiparqanku. Qhepa kaj mosqoypitaj rikorqa cielopi, kay jallpʼapipis tukuy uj yuyaylla, ujchasqastaj kausakushasqankuta. Rikullarqataj Satanás, payta qhatejkuna ima chinkachisqa kasqankuta. Cielopiwan jallpʼapiwantaj Diospa sutinta tukuy jatunchasqankuta, payllatataj yupaychasqankuta.