Jesús Saulota ajllan

Sauloqa romano karqa, Tarso llajtapitaj nacekorqa. Payqa fariseo karqa, judiospa leyesninkuta sumajta rejsej, cristianostapis chejnikoj. Chayrayku qharista, warmista wasisninkumanta qhatatamuspa carcelman wisqʼaykuchej. Estebanta phiña runas rumiwan chʼanqaspa wañuchishajtinkupis, chaypi kasharqa.

Sauloqa mana Jerusalenllapichu cristianosta presochayta munarqa. Chayrayku kuraj sacerdoteman rispa Damasco llajtapi cristianosta qhatiykachananpaj ordenta orqhorqa. Damascoman chayashajtintaj uj kʼanchay muyuyninpi lliphipirerqa. Paytaj pampaman urmaspa parlamojta uyarerqa: “Saulo, ¿imaraykutaj qhatiykachashawanki?”, nispa. Saulotaj nerqa: “¿Pitaj kanki?”, nispa. Paytaj nerqa: “Jesús kani. Damascoman riy, chaypi nisonqanku imatachus ruwanaykita”, nispa. Saulotaj ciegoyarqa. Chayrayku makinmanta aysaspa Damascoman pusarqanku.

Damascopitaj Diosta kasukoj Ananías tiyakorqa. Jesusqa uj mosqoypi payman nerqa: “Cheqan calle nisqaman rispa Saulota maskʼamuy Judaspa wasinpi”, nispa. Ananiastaj nerqa: “Señor, ashkha imasta paymanta uyarini, payqa discipulosniykita japʼichishan”, nispa. Jesustaj nerqa: “Rillay, Saulotaqa ajllakuni sumaj willaykunata nacionespi willananpaj”, nispa.

Chantá Ananiasqa Sauloman rispa nerqa: “Hermanóy, Jesús kachamuwan watejmanta rikunaykipaj”, nispa. Chay ratopachataj Sauloqa watejmanta rikorqa. Jesusmanta yachakuspataj paypa discipulonman tukorqa. Bautizakuspataj sinagogaspi willayta qallarerqa cristianoswan khuska. Saulota Jesusmanta willashajta rikoj judiosqa tʼukullachá kasharqanku. Chayrayku nerqanku: “¿Manachu kay runaqa Jesuspa discipulosninta qhatiykachaj?”, nispa.

Sauloqa kinsa watata Damascopi Diosmanta willarqa. Judiosqa payta chejnikuspa wañuchinankupaj yachachinakorqanku. Chayta yachaspa cristianosqa Saulota ayqenanpaj yanaparqanku. Chayrayku llajtaj perqanpa ventananta canastapi uraykucherqanku.

Sauloqa Jerusalenman rispa hermanosta rikuyta munarqa. Hermanostaj Saulota manchachikorqanku. Chantá Bernabeqa Saulota apostolesman pusaspa nerqa kausayninta cambiasqanta. Saulotaj Jerusalenmanta hermanoswan Diosmanta willayta qallarerqa. Chaymantapachataj Pablo sutiwan rejsisqa karqa.