Navidadmanta nisqa, ¿imataj aswan sumaj?

ASHKHA cristianosqa mana Navidad fiestata ruwankuchu. ¿Mana ruwasqankumanta arrepientekunkuchu? ¿Chay fiestamanta imatapis faltachankuchu? ¿Wawasninku yuyankuchu tatasninku allin imasmanta jarkʼashasqankuta? Chaymanta imatachus wakin Jehovaj testigosnin nisqankuta qhawarina.

Jesusta yuyarikunamanta: “Niraj Jehovaj testigon kashaspaqa, wakin kutilla iglesia catolicaman rej kani. Chaytataj ruwaj kani Navidadpi chayri Pascuapi. Chayman rispapis nipuni Jesuspi yuyajchu kani. Kunanqa Jehovaj testigon kani, manaña Navidad fiestata ruwanichu. Astawanpis congregacionniymanta hermanoswan semanapi iskay kutita tantakuyku. Waj runasmanpis Biblia imatachus Jesusmanta nisqanta yacharichini” (EVE, AUSTRALIA).

Regalosta qonamanta: “Mana suyashajtillay regalosta qowajtinku mayta kusikuni. ¡Maytapuni kusichiwan! Chantapis wajkunaman regalarinaypaj tarjetasta chayri dibojosta ruway mayta gustallawantaj. Wajkunaman regalarispa mayta kusikuni, paykunapis kusisqa kanku” (REUBEN, IRLANDA DEL NORTE).

Pisichikojkunata yanapanamanta: “Onqosqa kajkunaman qorinaykupaj mikhunata waykʼuspa astawan kusisqa kayku. Wakin kutisqa aparipuyta yachayku postreta, tʼikasta chayri regalitosta. Chaywan paykunaqa may kusisqa kanku. Chaytataj watapi ima ratollapis ruwayta atinchej” (EMILY, AUSTRALIA).

Familiawan khuska kanamanta: “Ima fechallapipis tukuy familia tantakojtiyku wawasniykoqa awelitosninkuta, tiosninkuta, primosninkuta ima astawan rejsiyta atinku, kusisqataj kanku. Familiaresniykoqa yachanku paykunata munakusqaykurayku visitarej risqaykuta, nitaj uj costumbreta ruwasqaykuraykullachu. Noqaykoqa mana Navidadta ruwaykuchu, nitaj waj fiestastapis” (WENDY, ISLAS CAIMÁN).

Wajkunawan allinpi kausakunamanta: “Navidadpeqa ashkha imas ruwana kasqanrayku, mana tiempoy kajchu wajkunawan allinpi kausakuna kasqanpi yuyanaypaj. Bibliapi yachakuni Diosqa runasman uj sumaj kausayta qonanta. Chayta yachaspa sonqo tiyasqa kani. Yachani wawasniypis mosoj jallpʼapi kusisqa kausakunankuta” (SANDRA, ESPAÑA).