10 YACHAQANA
Jesusqa kasukorqapuni
¿Kasukullankichu?... Wakin kutispeqa, mana atikullanchu. Jesús kasukojpuni kasqanta, ¿yachankichu?... Paymanta yachakusqaykeqa, tatasniykita kasukunaykipaj yanapasonqa. Jesusmanta astawan yachakuna.
Jesusqa niraj Jallpʼaman jamushaspa, cielopi Jehová Tatanwan kasharqa. Jallpʼapi kashaspataj tatasniyojllataj karqa. Paykunaqa José, María sutikorqanku. Imaraykuchus paykuna tatasnin kasqanta, ¿yachayta munawajchu wawáy?...
Jehovaqa, Jesús Jallpʼapi nacekunanpaj uj milagrota ruwarqa. Jesuspa kausayninta Mariaj wijsanman churarqa. Jisqʼon killatataj mamanpa wijsanpi wiñakorqa. Chaymantataj nacekorqa. Ajinamanta Mariawan Josewanqa Jesuspa tatasnin karqanku.
Jesusqa 12 watayoj kashaspa, Jehová Tatanta munakusqanta rikucherqa. Payqa, familianwan khuska Jerusalenman Jehovata yupaychaj rerqa. Josewan Mariawanqa wasinkuman kutipushaspaña, Jesusta chinkacherqanku. ¿Maypitaj kashanman karqa?...
¿Imaraykutaj Jesús, Tatanpa wasinpi kasharqa?
Josewan Mariawanqa, usqhayllata Jerusalenman kuterqanku Jesusta maskʼaj. Paykunaqa, llakisqa kasharqanku mana tarispa. Kinsa pʼunchaymantataj Jesusta, Tatanpa wasinpi tariparqanku. ¿Imamantaj chayman rerqa?... Chaypeqa, Jehová Tatanmanta mayta yachakuyta aterqa. Jesusqa, Tatanta munakorqa, kusichiytataj munarqa. Wiñaspapis, Jehovata kasukullarqapuni, runas chejnisqankurayku mana atinanpaj jina kajtinpis. Josetawan Mariatawanpis, ¿kasukullarqatajchu?... Bibliaqa nin kasukusqanta.
¿Imatá Jesusmanta yachakunchej?... Mana atinanchejpaj jina kajtinpis tatasninchejtaqa, kasukunapuni kasqanta. ¿Qanrí kasukunkichu wawáy?...