¡Kaypimá qhapaqyay kan!
1. ¿Imaraykutaq precursor regularjina llamkʼanapaq tʼukurisunman?
1 ¿Munankichu sunqu juntʼasqa kawsayta? ¿Munankichu runata yanapayta? ¿Munawaqchu Jehovapaq astawan llamkʼayta? Arí, nispa kay tapuykunaman kutichinki chayqa, precursor regularjina llamkʼanaykipaq, tʼukuriy. Chaywanpis, ichá mana precursorjina llamkʼayta atinkimanchu, familiaykita qhawanaykirayku, Biblia nisqanmanjina wak ruwaykunata ruwanaykirayku chayri unqusqa kasqaykirayku.
2. Diospa bendicionninrayku, ¿ima qhapaqyaytataq, precursores rikunku?
2 Dios yuyaychasqanmanjina Salomonqa, Jehovap bendicionninta, qhapaqyaywan kikincharqa (Pro. 10:22). Yachanchikjina Jehovap bendicionninqa, chiqamantapuni qhapaqyachiwanchik. Precursorestaq, chay bendicionta rikunku. Munayninkupi ‘mana tiemponkuta usuchisqankurayku’, runata yanapaspa, kusiyta tarinku (Col. 4:5; Hech. 20:35). Jehovaqa, paypa munakuywan precursores llamkʼasqankuta, jatunpaq qhawan, jinamanta ‘tukuy kapuyninkuta janaqpachapi tantanku’, manataq jaykʼaq chaymanta chinkanqachu (Mat. 6:20; Heb. 6:10). Chantapis, precursoresresqa, ‘chʼuwa ñawiyuq kanku’, imaptinchus yachanku Jehová necesitasqankuta qunanta, payman kʼaskasqa kasqankutaq, kallpachakullanpuni (Mat. 6:22, 25, 32, MOSOJ TESTAMENTO; Heb. 13:5, 6).
3. ¿Imaraykutaq Diospa bendicionnin qhapaqyachiwasqanchik, kay pachapi qhapaqyayta maskʼaywan, mana kikinchu?
3 Kay pachapi qhapaqyayta maskʼayqa, “imaymana pierdechej wampu munapayaykunaman”, urmachiwasunman (1 Tim. 6:9, 10; Sant. 5:1-3). Diospa bendicionnin qhapaqyachiwasqanchiktaq, mana jinachu. Precursores regulares tiemponkuta willayman churasqankurayku, allin kaqta akllayta yachanku, Diospa llaqtanpitaq, sinchita sayanku (Fili. 1:10). Juk hermano ingeniero karqa, llamkʼaynintaq tukuy tiemponta qhichuq, chaywanpis chay llamkʼaynintataq saqirqa, precursorjina llamkʼananpaq. Chaymanta nirqa: “Llamkʼayniyqa, mayta llakichiwaq. Precursorjina llamkʼaytaq mana llakichiwanchu. Kunanqa, runata chiqa kaqta riqsinankupaq, yanapani. Kayta ruwaspataq, sunqu juntʼasqa kani”, nispa.
4. ¿Ima bendicionestataq precursores regulares wakkunata yanapaspa, tarinku?
4 Wakkunata yanapallantaq. Kay tiempopiqa, tukuyninchik ‘manchay saqra pʼunchaykunapi’ kawsachkanchik (2 Tim. 3:1). Chayrayku, tukuy runas juk suyakuyta necesitanku. Diospa Reinonmanta allin willaykunata willamuspa, rikunchik imaynatachus llakiypi kaqkuna allin willaykunata uyarispa, kusikunku. ¡Mayta precursores regulares chayta qhawaspa kusikunku, imaptinchus paykunaqa, runa salvakunanrayku, watantinpi pusaq pachak tawa chunka horasta llamkʼanku! (1 Tim. 4:16.)
5, 6. ¿Imataq precursor regularjina llamkʼanapaq yanapawasun?
5 Precursorjina llamkʼanaykipaq, ¿tʼukurinkichu? Chayta ruwanaykipaq, ichapis sumaqta ‘tiempoykita aprovechanayki tiyan’ (Efe. 5: 15, 16, MOSOJ TESTAMENTO). Achkha hermanos, paykunapaq pisita llamkʼanku, Diospa Reinonmanta willamunankurayku. Qampis paykunajina, ¿llamkʼawaqchu?
6 Chayta ruwanaykipaq, Jehovamanta yachayta mañakuy (Sant. 1:5). Jinata ruwaptiyki, ¿imatá tariwaq? ¡Achkha bendicionesta! Chantapis, Jehovaqa necesitasqaykita churapusunqa (Mat. 6:33). Jinata Diospi atienekuqkunaqa, ‘may chhika bendicioneswan juntʼachisqas’, kanqanku (Mal. 3:10).