Kusiywan sumaj willaykunata willana

Wakin kutis ichá predicacionman llojsiyta mana atillankichu. Ajinapi ashkhas rikukunchej. Ichapis chay kanman runas mana uyariyta munawasqanchejrayku, phiñakusqankurayku chayri mana rejsisqa runaswan parlayta manchachikusqanchejrayku. Jinapi rikukuspa mana kusisqachu predicasunman. Chaywanpis kusikuyniyoj Diosta sirvinchej, munantaj kusiywan payta sirvinanchejta (Sl 100:2; 1Ti 1:11). Kunantaj kusiywan predicanapaj kinsa imasta qhawarina.

Ñaupajtaqa uj sumaj suyakuymanta predicanchej. Runas niña ni imapi suyakuyniyoj kajtinkupis, “allin kawsaymanta sumaj willayta” apamoj willaywan kusichisunman (Isa 52:7). Diospa Gobiernonmanta sumaj willaykunaqa noqanchejtapis kusichillawasunmantaj. Niraj predicaj llojsishaspa ima bendicionestachus Diospa Gobiernon apamunanpi tʼukurinaykipaj tiempochakuy.

Chantapis willayninchejqa runasta yanapan kausayninkuta cambianankupaj, Dioswanpis amigos kanankupaj. Chay runasqa sajra ruwaykunasninkuta saqenku, wiñaypajtaj kausakuyta atinku (Isa 48:17, 18; Ro 1:16). Sinchʼi llakiykunapi mana wañuyta munaj runasta yanapaj kasqanchejpi tʼukuriy. Wakin runas yanapananchejta mana munajtinkupis, salvakuyta munajkunata maskʼallanchejpuni (Mt 10:11-14).

Chantapis willayninchejqa Jehovata jatunchan. Jehovaqa runasman willasqanchejta may valorniyojpaj qhawan (Isa 43:10; Heb 6:10). Mana michʼakuspataj atiyninta qowanchej willamunallapajpuni. Chayrayku chay llankʼayta kusiywan ruwanapaj yanapayninta mañakuna. Kuseyqa Diospa atiyninpa poqoyninmanta jamun (Gál 5:22). Jehovaj yanapayninwanqa mana manchachikuspa willamusun (Hch 4:31). Runas willayninchejta uyariwajtinchejpis chayri manapis, Dios kamachiwasqanchejta juntʼaspa kusikusun (Eze 3:3).

JEHOVÁ DIOSTA WATEJMANTA KUSISQA SIRVINI, NISQA VIDEOTA QHAWAYTAWAN KAY TAPUYKUNAMAN KUTICHIY:

• Sapa killa ashkha horasta predicaspapis, ¿imaraykutaj Bibliata sumajta estudiananchej tiyan?

• ¿Imaynatá María jina ruwasunman?

• ¿Ima ratotaj Diospa Palabranpi tʼukurinki?

• Sumaj willaykunata predicasqaykimanta, ¿imataj astawan gustasunki?