Qolqeta allinta apaykachay

Familianchejta uywanapaj, tukuy qolqeta necesitanchej (Proverbios 30:8). Imaraykuchus qolqeqa “jarkʼakuna escudo jina” (Eclesiastés 7:12). Wakin kutistaj qolqemanta parlayqa mana atikullanmanchu, chaywanpis ama chayrayku phiñanakuychejchu (Efesios 4:32). Purajmanta atienekuychej, khuskataj qolqeykichejta imaspichus gastayta ajllaychej.

1 SUMAJTA WAKICHIKUY

BIBLIA NIN: “Sichus mayqennillaykichejpis uj torreta ruwayta munanman chayqa, manachu tiyaykukuspa ñawpajta qhawarinman, qolqen kapunchus manachus, chayta, torreta tukuychanampaj?”, nispa (Lucas 14:28). Imaynatachus qolqeykichejta apaykachanaykichejmanta parlariychej (Amós 3:3). Allintataj qhawarikuychej imastachus rantinaykichejta, mashkhatachus gastanaykichejtapis (Proverbios 31:16). Imallatapis rantinaykichejpaj ashkha qolqeykichej kasqanqa, mana ninayanchu tukuysituntapuni gastanaykichejta. Amapuni manuchakuychejchu, kapususqallaykichejwan kausakuychej (Proverbios 21:5; 22:7).

KAYTA RUWAWAJ:

• Killa tukukuypi qolqeykichej puchojtenqa, imaspichus gastanaykichejta parlariychej

• Qolqeykichej faltajtinrí, allinta qhawarikuychej pisillata gastanaykichejpaj. Ichapis jawaman mikhoj llojsinaykichejmantaqa wasillapi waykʼukuwajchej

2 AMA LLULLANAKUYCHEJCHU

BIBLIA NIN: “Mana Señorpa ñawpaqellampichu” cheqa kajta parlanayki tiyan “astawanqa runaspa ñawpaqempipis”, nispa (2 Corintios 8:21). Willanakuychej mashkhatachus ganasqaykichejta, mashkhatachus gastasqaykichejtapis.

Niraj ashkha qolqeta gastashaspaqa, qosaykiwanraj chayri warmiykiwanraj parlariy (Proverbios 13:10). Chayta ruwayqa sonqo tiyasqa kanaykichejpaj yanapasonqachej. Qolqeta ganasqaykitaqa ama qanpata jinallachu qhaway, manachayqa familiaykipata jina (1 Timoteo 5:8).

KAYTA RUWAWAJ:

• Sapa ujniykichej mashkhatachus gastayta atisqaykichejmanta parlariychej

• Imaynatachus qolqeykichejta apaykachanaykichejmanta parlarinaykichejpaj, ama suyaychejchu qolqeykichej tukukunantaraj