¿Imataj mana kikinñachu wawayojña kajtiykichej?

Casarasqaspata ñaupa wawitanku kasqanqa mayta kusichinman chayri llakichinman. Ichá llakichinman wawitankuta uywanankupaj tiempochakunanku, kallpachakunanku ima kasqan. Chantá mana allinta samarisqanku, mana allin sientekusqanku ima phiñanachillanmantaj. Chayrayku wawaykichejta uywanaykichejpaj, qhariwarmi kausayniykichejpipis kusisqas kanaykichejpaj imallatapis ruwanaykichej tiyan. Chay chʼampaykunata atipanaykichejpaj, ¿imaynatá Bibliaj yuyaychasqasnin yanapasunkichejman?

1 MANAÑA KIKINCHU KAJTENQA YACHAKAPUYCHEJ

BIBLIA NIN: “Munakuyniyoj runaqa pacienciayoj, kʼachataj [...], nitaj payllapajchu imatapis maskʼan. Mana usqhayllata phiñakunchu”, nispa (1 Corintios 13:4-6). Uj mamaqa, wawitallanpiña yuyasqanrayku qosanta saqesqata jina sientechinman, chayrayku qosaykipajpis tiempochakunaykita ama qonqaychu. Pacienciawan, kʼacha kaywantaj yanapayninta necesitasqaykita rikuchiy, kallpachakusqanmantataj, mayta kusikusqaykita niy.

“Kikillantataj qosaspis, warmisniykichejwan allin yachaywan kausakuychej” (1 Pedro 3:7, Qheshwa Biblia). Ñaupaj kutillaraj tata kanki chayqa, warmiyki wawitaykichejta uywananpaj, tiempochakunan kasqanta entiendey. Chayrayku wakin kuti saykʼusqa, phutisqa, ashkha ruwanasniyoj ima sientekunman, qanwan phiñakojtintaj, ama phiñakullaytajchu, imaraykuchus “wapu kanamantaqa aswan allin llampʼu sonqo” kay (Proverbios 16:32). Allinta yuyaychakuspataj imatachus necesitasqanta qoy (Proverbios 14:29).

KAYTA RUWAWAJ:

• Tata kanki chayqa: Warmiykita chʼisisninpi wawitaykichejta qhawanapaj yanapariy. Waj ruwanasniykimanta tiempota orqhokuy, warmiykiwan, wawitaykiwan ima kanaykipaj

• Mama kanki chayqa: Qosayki, wawitaykichejwan yanapasuyta munajtenqa, yanapachikullay. Mana allinta ruwajtinpis ama qhawaraychu, manachayqa kʼachamanta yachachiy

2 ASTAWAN UJCHAKUYCHEJ

BIBLIA NIN: “Iskayninkutaj uj runa jinalla kanqanku”, nispa (Génesis 2:24). Wawitayojña kajtiykichejpis “uj runa jinalla” kasqaykichejta ama qonqaychejchu. Amataj saqeychejchu munakuyniykichej pisiyananta.

Casarasqa warmi, qosaykita agradecekuy yanapasusqanmanta. Chaytaj sonqonta “jampi jina” thañichenqa (Proverbios 12:18). Qosa, warmiykita mayta munakusqaykita niy, allinniykichejrayku tukuy imata ruwasqantataj, may munakuywan qhawasqaykita niy (Proverbios 31:10, 28).

“Ama pipis maskʼachunchu paypa allinnillanta, manachayqa wajpa allinnintapis maskʼallachuntajʼʼ (1 Corintios 10:24). Qosayki chayri warmiyki kallpachakusqanta reparay, tukuy imatataj ruway allinninta maskʼaspa. Tiempochakullaychejtaj parlarinaykichejpaj, uyarinakunaykichejpaj ima. Qhariwarmi puñukuyniykichejpeqa ama qankunallapi yuyaychejchu, manaqa tʼukuriychej qosaykichejpi chayri warmiykichejpi. Biblia nin: “Ama qankunaqa: Mana, nispa jarkʼanakuychejchu. Qhariwarmi parlarikuspa, ichapis pisi tiempollapaj saqewajchej ”, nispa (1 Corintios 7:3-5). Chayrayku qhariwarmi puñuykuyniykichejmanta parlariychej. Pacienciakusqaykichej, entiendenakusqaykichejqa, qhariwarmi kausayniykichejpi yanapasonqachej.

KAYTA RUWAWAJ:

• Ama qonqaychu qosaykipaj chayri warmiykipaj tiempochakunaykita

• Pisi imasllawan munanakusqaykichejta rikuchinakuychej, ichá imitallatapis regalarinakuspa

3 WAWAYKICHEJTA YACHACHIYCHEJ

BIBLIA NIN: “Qanqa wawamantapacha yachaqakuyta qallarerqanki Diosmanta Qhelqasqata, mayqenchus yachachisunki salvacionta tarinaykita”, nispa (2 Timoteo 3:15). Wawaykichejta yachachinaykichejpaj wakichikuychej. Amataj niychejchu mana entiendesqantaqa. Wisallapiraj kashaspa wawitaqa tatasninpa parlayninta rejsinña, kusisqachus chayri llakisqachus kashasqankutapis reparanña. Letrata mana allinta rejsijtinpis leeripuychejpuni, chaytaj jatunña kaspa leeyta munananpaj yanapanqa.

Diosmanta parlarinaykichejpajpis, ama juchʼuysitullaraj kasqanta niychejchu. Wawitaykichejwan Diosmanta mañakuychej (Deuteronomio 11:19). Pujllarichishaspapis, Diospa ruwasqasninmanta parlariychejpuni (Salmo 78:3, 4). Wiñasqanman jinataj, Diosta mayta munakusqaykichejta reparanqa, paypis Diosta munakullanqataj.

KAYTA RUWAWAJ:

• Wawitaykichejta uywanaykichejpaj Jehovamanta yachayta mañakuychej

• Usqhayllata yachakunanpaj kutin kutita yachachiychej