Wañuypa atiynin

Wañoyqa runasta sinchʼita llakichin. Casi ni pi chaymanta parlayta munanchu. Jinapis tukuy, maykʼajllapis wañuywan tinkunanchej kanqa.

Ni pipis tatan, qosan, chayri wawan wañupunanpaj wakichisqachu kashan. Chay llakeyqa ujllata, chayri pisimanta pisi chayamunman. Imayna kajtinpis, sinchʼita llakichikun, nitaj chaymanta ayqesunmanchu.

Antonioj tatanqa uj accidentepi wañuporqa. Pay nin: “Wasiykej punkunta cementowan llutʼaykuspa, llavetapis qhechusunkuman jina. Ujtawan mana yaykuyta atinkichu. Wasiykimantaqa yuyarikullankiña. Nitaj imatapis ruwayta atinkichu. Chay sinchʼi llakiy qanman chayamususqantaqa, mana creeyta atinkichu”, nispa.

Dorotea 47 watasniyoj kashajtin, qosan wañuporqa. Payqa domingosninta anglicana iglesiapi wawasman yachachej. Wañusqas waj lugarpi kausashasqankuta creejtinpis, iskaychasqa kasharqa. Chayrayku pastorninman tapusqa: “¿Maymantaj wañupuspa rinchej?”, nispa. Pastortaj kutichisqa: “Ni pi yachanchu. Wañuspapunichá chayta yachasunchej”, nispa.

¿Jinachu kanman? ¿Wañusparajchu chayta yachasun? Chayri, ¿waj jinamanta yachayta atisunmanchu?