Tapuykuna

◼ Wañupujtinchej, Jehovaj llajtanpaj tukuy kapuyninchejta chayri wakillanta saqeyta munajtinchej, ¿imatá ruwasunman?

Runa wañupuspaqa, kapuykunasninwan manaña imatapis ruwayta atinchu (Ecl. 9:5, 6). Chayrayku ashkha runas kausashallasparaj, Notario de Fe Pública nisqapi uj testamentota chayri uj documentota ruwachinku, maypichus kapuyninkuta imaynatachus rakʼinankuta sutʼinchanku (2 Rey. 20:1). Chantá chay documentopi pichus (albacea) kapuyninta apaykachananta nikullantaj. Ashkha suyuspi pillapis mana testamentota ruwaspalla wañupojtin, kapuyninta autoridades imaynatachus apaykachakunanta ninku. Chayrayku kapuynichejta wañupojtinchej imaynatachus apaykachakunanta munanchej chayqa, nisunman Jehovaj llajtanpaj tukuy kapuyninchejta chayri wakillanta saqeyta munanchej chayqa, uj documentota ruwananchej tiyan, chantapis kapuyninchejta apaykachajta sumajta ajllananchej tiyan.

Kapuyninchejta apaykachanapaj ajllasqanchej runaqa, ruwayninta juntʼananpaj mayta kallpachakunan tiyan. Kapuyninchej may chhikachus may valorniyojchus kasqanmanjina, tantaykunanpaj rakʼinanpaj ima tiempochakunan tiyan, ashkha tramitestataj ruwanan tiyan. Chantá autoridades imaynatachus ruwanata ninku. Chayrayku kapuyninchejta apaykachananpaj churasqanchej runa, mana qotuchakuypi kasqanraykuchu allinta apaykachananta suyasunman. Chayta ruwananpajqa, allin yuyayniyoj runata, atienekunapaj jina runata churana tiyan, wañupojpa munaynintataj juntʼananpaj (¡Despertad! 8 de diciembre de 1998 nisqamanta “Los beneficios de la planificación patrimonial”, nisqa yachaqanata leey). Munasqaykiman jinapuni apaykachakunanpajqa, Notario de Fe Pública nisqapi testamentota ruwasqaykimanta uj copiata Jehovaj llajtanman apachiy.

¿Imastá kapuyninchejta apaykachaj runa ruwanan tiyan? Pillapis wañupojtin kapuyninta apaykachanaykita nisojtin, ñaupajtaqa Diosmanta mañakuytawan juntʼayta atinkichus manachus chayta qhawarikuy (Luc. 14:28-32). Chay runa wañupujtintaj, kapuyninta pikunamanchus saqesqanta paykunaman willanayki tiyan. Chantapis testamento nisqanman jina, ley nisqanman jinataj pikunamanchus saqerqa kapuyninta chay runasman rakʼiranayki tiyan. Pichus chaykunata apaykachananpaj churasqa kajqa, testamento nisqanman jina ruwanan tiyan, wañupojpa kapuynin ashkhachus manachus kajtinpis. Pillapis kapuyninta Jehovamanta sutʼinchajkunaman saqen chayqa, chay kapuynenqa Diospa llajtanpataña (Luc. 16:10; 21:1-4).