Ñawiriqkunapta tapuyninku

¿Satanás maykʼaqtaq janaqpachamanta wikchʼuchikamunman karqa? (Apo. 12:1-9)

Apocalipsis libropiqa, maykʼaqchus Satanás wikchʼuchikamusqanmanta mana sutʼita willanchu. Chaywanpis maykʼaqchus wikchʼuchikamusqanta yachanapaqqa, wak ruwaykuna tiyan. Ñawpaq kaq ruwayqa Jehová, Jesusta janaqpachapi Reytajina churasqan. Yachanchikjina, “chaymanta jatun wañuchinaku maqanaku janaj pachapi” kasqanta, chay maqanakupi Kuraq Supayqa atipachikurqa, janaqpachamantataq wikchʼuchikamurqa.

Bibliaqa, 1914 watapi nacionespa ‘pʼunchayninku’ tukukusqanta, chaymanta Jehová, Jesusta Reytajina churasqanta ima nin (Luc. 21:24).a Maqanaku janaqpachapi kasqanmanta, Satanás chaymanta wikchʼuchikamunankama, ¿machkha tiempotaq pasanman karqa?

Apocalipsis 12:4 pʼiti nin: “Chay sierpeqa [Satanasqa] nacechikunayashaj warmej ñawpaqempi sayaykorqa, nacechikojtinkama wawanta oqoykunampaj”. Kay pʼitiqa, Satanás, Jehovap Reinonta chay ratopacha chinkachiyta munasqanta rikuchiwanchik. Jehová, mana chayta ruwananta saqiptintaq, Satanasqa, Diospa Reinonta chinkachiytapuni munachkarqa. Chayraykutaq “Miguelwan angelesninwan ima” chay ratopacha, “Satanasta saqra angelesninta ima” janaqpachamanta wikchʼumurqanku, Diospa Reinonta jarkʼanankurayku. Arí, 1914 watapi Jesús, Rey kananpaq churasqa kasqantawanchá, Satanás atipachikuspa janaqpachamanta wikchʼuchikamunman karqa.

Kunanqa wak ruwaykunatañataq qhawarina, chaytaq kay akllasqa cristianos, janaqpachaman ripunankupaq kawsarimusqanku. Kaytaq Bibliap nisqanmanjina Jehová janaqpachapi Reinonta churasqantawan karqa (Apo. 20:6).b Chaywanpis Bibliaqa, mana ninchu Jesús Janaqpachapi akllasqa cristianoswan khuska, Satanaswan, saqra angelesninwan ima, maqanakusqanta. Akllasqa cristianos wañuymanta kawsarinankupaqqa, ichá janaqpachapi maqanaku karqaña, chantá ichá Satanás, saqra angelesnin ima, janaqpachamanta wikchʼuchikamurqankuña.

Tukuychanapaq: Biblia, maykʼaqchus Satanás, saqra angelesnin ima, janaqpachamanta wikchʼuchikamusqankuta mana niptinpis, tukuy kay rikusqanchikqa, 1914 watapi Jesucristo Diospa Reinonpi kamachimunanpaq churasqa kasqanmanta, pisi tiempoman Satanás wikchʼuchikamusqanta rikuchiwanchik.

[Sutʼinchaykunasnin]