¿YACHARQANKICHU?
Yachayniyoj runas tarisqanku Bibliaj nisqanpi creenanchejpaj, ¿yanapawanchejchu?
Asiriamanta rey Sargón II (Isaías 20:1)
Ñaupa Testamentopeqa ashkha runaspa kausayninkumanta parlan. ¿Imallapis rikuchinchu paykuna kasqankutapuni? Arí. Kay revista Biblical Archaeology Review nisqanman jina yachayniyoj runas unay tiempomanta tarisqanku imasqa, 50 runas kasqantapuni rikuchin. Chaykunataj kanku: 5 faraones; Asiriamanta, Babiloniamanta, Moabmanta, Persiamanta, Siriamantawan 19 reyes; Israelmanta, Judamantawan 14 reyes ima. Chay 14 reyesmanta wakenqa David jina, Ezequías jina may rejsisqas karqanku, wankintaj Manahem jina, Peka jina mana ancha rejsiqaschu karqanku. Chantapis chay revistapeqa leymanta yachachej uj runamanta, kuraj sacerdotesmanta, waj autoridadesmanta ima parlan.
Chay 50 runas pichus kasqankumanta parlaspataj, ashkha yachayniyoj runas uj yuyayllaman chayanku. Chaywanpis waj imas rikuchillantaj Herodes, Poncio Pilato, Tiberio, Caifás, Sergio Paulo ima kasqankutapuni. Paykunamantataj Mosoj Testamentopi parlakushan.
Biblia parlan chay lugarespi, ¿maykʼajtaj leones chinkaporqanku?
Babiloniamanta perqapi uj león ruwasqa kashan
Biblia parlan chay lugarespeqa, manaña leones kanchu. Jinapis Bibliaqa 150 kutista leonesmanta parlan. Chaytaj rikuchin Bibliata qhelqajkuna leonesta rejsisqankuta. Sutʼincharinapaj, Biblia niwanchej Sansón, David, Benaía ima leonesta wañuchisqankuta (Jueces 14:5, 6; 1 Samuel 17:34, 35; 2 Samuel 23:20). Chantá nillawanchejtaj leones wakin runasta wañuchisqankuta (1 Reyes 13:23, 24; 2 Reyes 17:25). Wakin kutis Biblia leonesmanta parlaspaqa, mana leonesmantapunichu parlan.
Ñaupa tiempopeqa Biblia parlan chay lugarespi, leonesta runas machachikoj, yupaychaj ima kanku. Chantapis wakinkunaqa perqasninkupi leonesta dibujaj chayri pintaj kanku. Sutʼincharinapaj, Vía Procesional de Babilonia nisqaqa ladrillowan ruwasqa kachan. Chaypitaj leones dibujasqa kashanku.
Yachakusqanman jina, Palestinapi soldados guerrapi kashaspa, leonesta japʼisqanku. Chayqa karqa (1101-1200) wataspi. Yachakusqanman jinataj, 1300 watas chaynejpi Palestinamanta leones chinkaporqanku. Mesopotamiamanta, Siriamantataj (1801-1900) watas chaynejpi. Chantá Iranpi, Irakpi imataj 1900 watas chaynejpi chinkaporqanku.