LECCIÓN 58
Jehovatapuni kasukuna
Cheqa cristianosqa mana saqenchejchu ni pi, ni ima Jehovata yupaychaymanta karunchanawanchejta. Qanpis ajinallatatajchá ruwayta munanki. Jehovaqa payta tukuy sonqo sirviyta munasqanchejta may allinpaj qhawan (1 Crónicas 28:9 leey). ¿Ima kutispitaj Jehovata mana kasukuyta atillasunmanchu? ¿Imatá chay kutispi ruwasunman? Chay imasta kaypi yachakusun.
1. ¿Imastá wakin ruwanku Jehovamanta karunchachinawanchejpaj?
Wakin runasqa Jehovamanta karunchachinawanchejpaj tukuy imata ruwanku. Chaykunamanta wakenqa Diosta wasanchajkuna kanku. Paykunaqa Diospa llajtanmanta llullasta parlanku iskayrayachinawanchejpaj. Wakintajrí iglesiaspi yachachejkuna kanku. Paykunaqa Jehovaj testigosninmanta llullasta parlanku, Bibliamanta yachakojkuna manaña Jehovata sirvinankupaj. Chay runasqa Diospa enemigosninman tukunku. Chayrayku paykunaj librosninkuta leey, Internetpi imatachus churasqankuta, videosninkutapis qhawayqa pantachiwasunman. Iskayrayachiyta munawanchej chaykunamanta parlaspa, Jesús nerqa: “Jina kachunku. Paykunaqa ciegos kashaspa wajkunata pusaykachanku. Sichus uj ciego waj ciegota pusaykachan chayqa, iskayninku tʼoqoman urmaykonqanku”, nispa (Mateo 15:14).
2. Jehovallata kasukuyta munasqanchejrayku, ¿imastá ruwana tiyan?
Jehovata munakusqanchejrayku llulla religioneswan mana chhapukuyta munanchejchu. Ni trabajonchejpis, ni uj organizacionpi kasqanchejpis, ni ima ruwasqanchejpis llulla religioneswan chhapusqachu kanan tiyan. Jehovaqa niwanchej: “Llojsipuychej chay llajtamanta [Jatun Babiloniamanta]”, nispa (Apocalipsis 18:2, 4).
ASTAWAN YACHAKUNA
Kaypi yachakusun pillapis Jehovamanta karunchachiyta munawajtinchej imatachus ruwanata. Yachakullasuntaj Jehovata kasukuyta munasqanchejrayku Jatun Babiloniamanta llojsipuna kasqanta.
3. Llulla yachachiykunata qhesachana
Diospa llajtanmanta sajrata parlajtinku, imatachus ruwanata qhawarina. Proverbios 14:15 leeriychej, chantá yachakojta tapuriy:
¿Imaynataj allin yachayniyoj runa?
2 Juan 9-11 leeriychej, chantá yachakojta tapuriy:
Jehovata wasanchajkunawan, ¿imastataj mana ruwanañachu kasqa?
Jehovata wasanchaj runaswan mana parlajtinchejpis, ¿imaynasmantataj creeyninchejta iskayrayachinkuman?
¿Jehová kusikunmanchu paymanta, llajtanmantapis sajrata parlajkunata uyarejtinchej?
4. Uj hermano juchallikojtin ama Diosta wasanchanachu
Congregacionmanta uj hermano jatun juchapi urmasqanta yachaspa, ¿imatá ruwananchej tiyan? Israelitasman ima kamachiytachus Jehová qosqanman jina ruwana tiyan. Levítico 5:1 leeriychej.
Kay versículo nisqanman jina, pillapis jatun juchapi urmasqanta yachanchej chayqa, ancianosman willana tiyan. Niraj chayta ruwashaspaqa juchallikojwan parlarina tiyan ancianosman juchanta willananpaj. Juchallikoj mana ancianosman willajtintaj, Jehovata munakusqanchejrayku noqanchej willana tiyan.
Chayta ruwaspa, ¿Jehovata munakusqanchejta rikuchinchejchu?
Chayta ruwaspa, ¿juchallikoj hermanota munakusqanchejta rikuchinchejchu?
Chayta ruwaspa, ¿congregacionmanta hermanosta munakusqanchejta rikuchinchejchu?
Uj hermano juchallikusqanta yachanki chayqa yanapariy.
5. Jatun Babiloniamanta llojsipuna
Lucas 4:8; Apocalipsis 18:4, 5 leeriychej, chantá yachakojta tapuriy:
¿Mayqen religionpipis anotasqarajchu kashanki?
¿Allinchu kanman llulla religionespa apaykachasqanku organizacionespi kanayki?
¿Allinchu kanman llulla religioneswan chhapusqa llankʼaykunata japʼikunayki?
¿Imaynallamantapis llulla religioneswan chhapukushankirajchu?
Imaynallamantapis llulla religioneswan chhapukushankiraj chay, ¿imatá ruwanayki kanman?
Imayna kajtinpis allin kajta ajllasun chayqa, mana sonqonchej juchachawasunchu, Jehovata kasukusqanchejtataj rikuchisun.
Llulla religionespa apaykachasqanku organizacionesmanta kajkuna, yanapananchejta niwajtinchej, ¿imatá ruwasunman?
WAKIN RUNAS NINKU: “Diosta wasanchajkuna imatachus Jehovaj testigosninmanta nisqankutaqa yachanaypuni tiyan, mana ajinachu kasqanta ninaypaj”, nispa.
¿Ajinata yuyananchej allinchu kanman? ¿Imaraykutaj chayta ninki?
¿IMASTÁ YACHAKUNCHEJ?
Kaypi yachakunchej Jehovata kasukunapajqa, Jehovamanta karunchachiyta munawanchej chaykunawan mana masichakunachu kasqanta.
Yuyarikunapaj
¿Imaraykú mana uyarinachu Diosta wasanchajkunaj nisqankuta?
Uj hermano jatun juchapi urmasqanta yachaspa, ¿imatá ruwana tiyan?
¿Imatataj ruwana tiyan llulla religionesmanta llojsipunapaj?
ASTAWAN YACHAKUNAYKIPAJ
¿Imatá ruwasunman Jehovaj testigosninmanta llullasta parlajtinku? Chayta yachanaykipaj kayta leeriy.
“Ama imatapis creenallachu” (Torremanta Qhawaj, agosto de 2018)
Llulla religionespa apaykachasqan organizacionesman mana chhapukunapaj, ¿imatá ruwasunman? Chayta yachanaykipaj kayta leeriy.
Diosta wasanchajkuna, ¿imasta ruwaspataj engañawasunman? Chayta yachanaykipaj kay videota qhawariy.
Uj sacerdote sintoísmo religionmanta llojsiporqa. Paymanta astawan yachanaykipaj “Wawamantapacha Diosmanta yachakuyta munarqani” nisqata leeriy.
“Bibliaqa cambianankupaj yanaparqa” (La Atalaya, 1 de julio de 2011)