“Maypitaj Tata Dios kashanri?” nispa, ¿tapukunchikpunichu?

1, 2. a) Jeremiaspa llaqtamasisnin, ¿imaynataq Diosta yupaychayninkupi kachkarqanku? b) Unqusqasjina kachkasqankurayku, ¿imatá ruwananku karqa?

JEREMIASQA mayta waqarikuchkan. Imaynachus Jerusalén llaqta kachkasqanta, Dios nisqanmanjina aswan qhipaman imapichus tukunanta yachaspa ima, sunqunta nanachikun. Chayrayku, ñawisnin yaku juturijina kananta munan, tuta pʼunchay waqananpaq. Jeremiasqa, llaqtanmanta llakikunallanta llakikuchkarqa (Jer. 9:1-3; Jeremías 8:20, 21 ñawiriy). Imaraykuchus llaqtaqa, Diospa Leyninta qhisachaspa, mana kasuyta munarqankuchu, chayraykutaq Diosqa, ñakʼariyta paykunaman apachinanta nirqa (Jer. 6:19; 9:13).

² Judiosqa, llulla profetasmanta, sacerdotesmanta ima, tukuy imapis allillan kachkasqanta uyariyta munaq kanku. Manataq imatachus Jehová, paykunamanta yuyasqanta yachayta munarqankuchu (Jer. 5:31; 6:14). Paykunaqa, doctorpaman “allillan kachkanki” nichikunanpaq riq unqusqaman rikchʼakurqanku, mayqinchus imayna unqusqapunichus kachkasqanta, mana willachikuyta munanchu. Ñuqanchik may unqusqa kachkasunman chayqa, ¿manachu juk tratamientota tiemponpi ruwanapaq, imawanchus kachkasqanchikta yachayta munasunman? Jeremiaspa llaqtamasisninqa, Diosta yupaychayninkupi unqusqasjina kachkarqanku, chayrayku Diospa yanapanta maskʼananku karqa. Tapurikunankutaq karqa: “Maypitaj Tata Dios kashanri?”, nispa (Jer. 2:6, 8).

3. a) “Maypitaj Tata Dios kashanri?” nispa tapukuy, ¿imataq judiospaq ninayanman karqa? b) ¿Imaynatataq judíos, Jehovata maskʼananku karqa?

³ “Maypitaj Tata Dios kashanri?” nispa tapukuyqa, ima ruwaypipis Diospa yanapanta maskʼaywan ninakun. Judiostaq, mana chayta ruwarqankuchu. Jerusalén thuñikuptinraq, Babiloniamanta llaqtankuman kutinpuptinkuraq, Jehovata maskʼarqanku. Profecía nisqanmanjinataq, chaymantaraq Jehovata tarirqanku, ñankunasnintapis riqsirqanku (Jeremías 29:13, 14 ñawiriy). ¿Imaynatataq judíos, Jehovata maskʼananku karqa? Diospa yuyaychayninta tukuy sunqu mañakuspa. Rey Davidqa, chayta ruwarqa. Pay mañakurqa: “Ñankunaykita rikuchiway, Tata Dios, purinasniykinejta pusaway”, nispa (Sal 25:4). Sedequías 10 watataña kamachichkaptin, mañakuykunata Uyariq Jehová, Jeremiasniqta llaqtaman nirqa: “Qhaparikamuway, noqataj kutichispa, sutʼinchasqayki jatuchaj imasmanta, mana yachasqayki pakasqa imasmantapis”, nispa (Jer. 33:3). Rey Sedequías, llaqta ima, Jehovaman qhaparikunkuman karqa chayqa, Payqa “pakasqa imasmantapis” paykunaman sutʼinchanman karqa. Nisunman Jerusalenpa thuñikuyninmanta, 70 watamanta watiqmanta sayachisqa kananmanta ima.

4, 5. ¿Imaynasmantawan judíos, Jehovata maskʼananku karqa?

⁴ ¿Imaynamantawan judíos, Jehovata maskʼananku karqa? Imaynatachus Jehová, llaqtanta ñawpaq wataspi yuyaychasqanta ukhuncharispa. Ajinamantaqa, imachus Jehovata kusichisqanta, phiñachisqanta ima yuyarinkuman karqa. Paykunaptaqa, Moisespa qillqasqan libros, Bibliap wakin librosnin, Judá, Israel llaqtasmanta reyespa ruwasqankumanta libros ima kapurqaña. Tukuy chaykunapi tʼukuriy, chiqa profetasta uyariy ima, “maypitaj Tata Dios kashanri?” nisqa tapuypa kutichiyninta tarinankupaq yanapanman karqa.

⁵ Judiosqa, Jehovata maskʼanallankutaq karqa, kawsayninkupi rikusqankumanta, wakkunap kawsayninkumanta ima yachakuspa. Chayqa, mana ninayarqachu pantasparaq yachakunanku kasqanta. Manaqa kawsayninkupi imatachus ñawpaqpi ruwasqankupi, imatachus Jehová chaykunamanta yuyasqanpi ima, tʼukurinanku karqa. Allinta qhawarikuspaqa, imatachus Jehová ruwasqankumanta yuyasqanta entiendenkuman karqa (Pro. 17:10).

6. ¿Imaynatá Jobpa kawsaynin yanapawanchik?

⁶ ¿Imatá ñuqanchik yachakusunman? Imata ruwanallapaqpis, “maypitaj Tata Dios kashanri?” nispa, ¿sapa kutichu tapurikunchik? Mana jinata tapukusqanchikta reparakuspaqa, ama anchata llakikunachu. Chiqa sunqu Jobpis, sinchi llakiykunapi rikukuspa, payllapi yuyarqa. Chayraykutaq Elihuqa, Diosmanta wakin kuti qunqakapusqanchikta nirqa, ajinata nispa: “Mana pipis ninchu: Maypitaj kashan ruwawajniy Dios[?]”, nispa (Job 35:10). Chantá Jobman yuyaycharqa: “Sumajta unanchay Dios imastachus may tʼukunasta ruwasqanta”, nispa (Job 37:14). Jobqa, Diospa may sumaq ruwasqasninpi, chantá imaynatachus runasta qhawasqanpi, yanapasqanpi ima tʼukurinan karqa. Jobqa, kawsayninpi rikusqanrayku, Jehovap ñankunasninta entienderqa. Chayrayku pruebanta atipaytawan, imaynatachus Jehová yanapasqanta rikuytawan ima, jinata nirqa: “Noqaqa parlasharqani imastachus mana yachasqayta, chay jina tʼukuna imasta mana entiendesqayta. Kunankama, uyarispalla qantaqa rejserqayki, kunantajri, ñawisniywan rikuyki”, nispa (Job 42:3, 5).

7. ¿Imatataq ukhunchasunchik? (Kay 116 paginapi rikhuriq dibujomantawan sutʼinchariy.)

⁷ Jeremiasqa, Diosta maskʼallarqapuni, tarirqataq. Llaqtamasisninmanta nisqa, payqa may unayta profetajina llamkʼasqanpi, “maypitaj Tata Dios kashanri?”, nispa tapukullarqapuni. Kunanqa, Jeremiaspa kawsayninta ukhunchaspa, imaynatachus mañakuyniqta, Bibliata ukhunchayniqta, kawsayninchikpi rikusqanchikniqta ima, Jehovata maskʼaspa tariyta atisqanchikta yachakusun (1 Cró. 28:9).

JEREMIASQA MAÑAKUYNIQTA JEHOVAMAN QAYLLAYKURQA

8. ¿Ima kutispitaq Jeremías, Diosmanta mañakurqa?

⁸ Jeremiasqa, Diospa sutinpi Judá llaqtaman achkha watasta willasqanpi, tukuy sunqu mañakuspa Jehovata maskʼarqa. Arí, willayninta runa mana uyariyta munaptin, manaña ñawpaqman riyta atiptin, imaraykuchus imapis kasqanta mana entiendeptin ima, Jehovap yanapayninta mañakurqa. Diostaq, imastachus ruwananta yuyaychaspa, mañakuyninman kutichirqa. Chaykunamanta wakinta qhawarina.

9. a) Jeremías 15:15, 16 pʼitispi, ¿imatá profeta, Diosmanta mañakurqa, chantá imaynatá Jehová kutichirqa? b) ¿Imaraykutaq imaynachus sientekusqanchikta Diosman willakunanchik may allin?

⁹ Juk kuti, Jeremiasqa Diospa juiciosninta willachkaptin, tukuy maldecichkasqankuta yuyarqa. Chayraykutaq Diosmanta mañakurqa, paymanta yuyarikunanta. Jeremías 15:15, 16 (ñawiriy) pʼitispitaq, Dios mañakuyninman kutichisqan, imaynatachus Jeremiasta sientechisqanta ñawirinchik. Chaypi nisqanmanjina, payqa llakiyninta Diosman willakurqa, chantá Diospa nisqasninta mikhuykuptin nisunman uyariptin, sunqun qhallallarqa. Jehovaqa, sutinpi willamusqanta jatunpaq qhawananpaq yanaparqa. Ajinamantataq, Jeremiasqa maypichus Jehová kachkasqanta sutʼita rikurqa. ¿Imatá chaymanta yachakunchik?

10. Jeremías, Jehovaman manaña sutinpi parlananta niptin, ¿imatá Pay kutichirqa?

¹⁰ Juk kuti, Imerpa churin sacerdote Pasur, Jeremiasta jasutʼichirqa. Jeremiastaq, manaña Jehovap sutinpi parlananta nirqa. ¿Imaynatá Jehová, Jeremiaspa nisqanman kutichirqa? (Jeremías 20:8, 9 ñawiriy.) Bibliaqa, Jehová janaqpachamantapacha profetanwan parlasqanta, mana sutʼinchanchu. Chaywanpis Diospa nisqanqa, Jeremiasta sunqunpi ninajina ruphaykurqa, tullusninkamataq chayarqa, chayraykutaq willallarqapuni. Diospa munayninta mana sumaqta yachaptinpis, Diosman tukuy sunqu parlasqan profetajina llamkʼanallanpaqpuni yanaparqa.

11, 12. Jeremías, Jehovaman imaraykuchus saqra runasta allin risqanmanta tapuptin, ¿imatá Jehová kutichirqa?

¹¹ Jeremiasqa, imaraykuchus juchasapasta allin risqanta mana entiendeyta atirqachu, chaytataq Jehovaman willarqa (Jeremías 12:1, 3 ñawiriy). Payqa, mana Diospa chiqan kayninmantachu iskayrayarqa, manaqa tapuyninpaq juk kutichiyta munarqa. Sunqunpi imachus kasqanta, Diosman sutʼita willaspaqa, Jehovata Tatantajina qhawasqanta rikuchirqa. Imaynatachus juk wawa, tatanman kʼaskakun, ajinata Jehovaman kʼaskakurqa. Jeremiasqa, imaraykuchus kʼullu judiosta allin richkasqanta, mana entienderqachu. Chay tapuyninpaq, ¿kutichiyta tarirqachu? Arí, Jehovaqa, chay saqra runasta jallpʼankumanta tʼirananta nirqa (Jer. 12:14). Imaynatachus Jehová mañakuyninman kutichisqanqa, maytachá Jeremiasta kallpacharqa, Jehovap chiqan kayninpi atienekunallanpaqpuni. Chayrayku Jeremiasqa, ichá Jehovamanta tukuy sunqu sapa kuti mañakurqa.

¹² Sedequiaspa kamachiynin tukukuchkaptin, nisunman babilonios Jerusalenta muyuykuchkaptinku, Jeremiasqa Diosman nirqa: “Qan rikunki runaspa tukuy ruwasqasninkuta, chay ruwasqasninkuman jinataj qan qopunki”, nispa (Jer. 32:19). Jeremiasqa, Jehová chiqan kaqtapuni ruwasqanta yacharqa. Arí, Jehovaqa, imatachus sapa juk kamachin ruwasqanta qhawan, mañakuyninkutapis uyarin. Kamachisnintaq, Jehová, paykunaman ‘ruwasqasninkumanjina’ qusqanta astawan astawan rikunku.

13. ¿Imaraykutaq Jehová munayninta juntʼananpi atienekunchik?

¹³ Diospa chiqan kayninmanta, munayninta allin yachaywan juntʼachkasqanta, juntʼanamanta ima, ichá mana iskayrayanchikchu. Chaywanpis, Jeremiaspa kawsayninpi tʼukuriy, imaschus llakichiwasqanchikta Jehovaman willakuy ima, mayta yanapawasunman. Jeremiasjina, llakiyninchikmanta Diosman tukuy sunqu willaptinchikqa, Jehovapi, munayninta juntʼananpi ima, astawan atienekusun. Imaraykuchus imapis kasqanta, mana allinta entiendeptinchikpis, chayri Diospa munaynin qhipakusqanta yuyaptinchikpis, Diosman mañakuyniqta, makinpi tukuy ima kachkasqanpi atienekusqanchikta nisunman. Jehovaqa munayninta maychus tiemponpi, munasqanmanjinataq ruwanqa. Chaytaq juntʼakunqapuni, ni imarayku chaymanta iskaychakunachu kanman. Chantapis, “maypitaj Tata Dios kashanri?” nispa tapukullasunpuni, imaraykuchus munayninta sumaqta entiendenapaq mañakullasunpuni, imaynatachus munaynin juntʼakusqantapis rikullasunpuni (Job 36:5-7, 26).

JEREMIASQA SUMAQTA UKHUNCHARQA

14. ¿Imaynatá yachanchik Jeremías, Diospa llaqtan ñawpa wataspi imatachus ruwasqanmanta ukhunchasqanta?

¹⁴ Jeremiasqa, “maypitaj Tata Dios kashanri?” nisqa tapuyman kutichinanpaq, ‘Jehovata riqsinan’ kasqanta yacharqa (Jer. 9:24). Ñawpa kaq, iskay kaq Reyes nisqa librosta qillqachkaptin, chiqamantachá Diospa llaqtan imastachus ñawpa wataspi ruwasqanta ukhuncharqa. Imaraykuchus chay librospiqa parlarqa: “Salomonpa ruwasqasninmanta willaj, chay libro[manta]”, “Israelmanta reyespa ruwasqasninkumanta willaj, chay libro[manta]”, “Judamanta reyespa ruwasqasninkumanta willaj libro[manta]” ima (1 Rey. 11:41; 14:19; 15:7). Chayraykutaq, imaraykuchus Jehová wakin kutispi imatapis ruwasqanta, sumaqta entienderqa. Chantapis, imaschus Payta kusichisqanta, llaqtanpa ruwasqasninmanta imatachus yuyasqantapis, allinta yachallarqataq. Chay tiempopaqqa, Diospa yuyaychasqan wakin libros karqaña, nisunman Moisespa, Josuep, Samuelpa, Davidpa, Salomonpa ima qillqasqasninku. Chiqamantachá Jeremiasqa, ñawpa profetasta, tiemponpi llamkʼaq profetasta ima, sumaqta riqsirqa. ¿Imaynatá chaykunata ukhunchariy yanaparqa?

15. Eliaspa profecianta ukhunchay, ¿imapitaq Jeremiasta yanaparqa?

¹⁵ Jeremiasqa, Samariata kamachiq Achabpa saqra warmin Jezabelmanta qillqarqa. Chantá qillqallarqataq, Elías, Jezabelta Jezreel pirqa kʼuchupi allqus mikhuykunankuta profetizasqanta (1 Rey. 21:23). Yachanchikjina, chay profeciaqa, willakusqanmanta 18 watasninman juntʼakurqa. Nikusqanmanjinataq, Jezabelta ventanamanta wikchʼuykamurqanku, Jehutaq carretanwan saruchirqa, ayantataq allqus mikhuykurqanku (2 Rey. 9:31-37). Eliaspa profecianta, imaynatachus juntʼakusqanta ima ukhunchasqanqa, maytachá Jeremiasta Diospa Palabranpi atienekunanpaq kallpacharqa. Arí, Diospa ruwasqasninta ukhunchasqanqa, mana saykʼuspa llamkʼanallanpaqpuni kallpacharqa.

16, 17. ¿Imaraykutaq Jeremías saqra reyesman mana saykʼuspa willallarqapuni?

¹⁶ Kaypiñataq tʼukurina. ¿Imaraykutaq Jeremías, qhatiykachasqa kaspapis, Diospa nisqasninta saqra kamachiqkunaman willallarqapuni, nisunman Joacimman, Sedequiasman ima? Jehová, payta Judá llaqtap kamachiqkunap ñawpaqinpi, “may sinchʼi jarkʼachasqa llajtata jina, fierromanta ruwasqa sayantata jina, broncemanta perqa ruwasqata jina”, churasqanrayku (Jer. 1:18, 19). Chantapis yuyarikuna, Jeremiasqa Judá, Israel llaqtata ima, pikunachus kamachisqankuta, imaynatachus kamachisqankutapis, sumaqta ukhunchallarqataq. Payqa allinta yacharqa, Manasés “Diospa Templompa iskaynin patiosnimpi” “cielopi tukuy chʼaskaspaj” altaresta ruwachisqanta, churinta ninapi qʼulachisqanta, achkha mana juchayuqkunata wañurachisqanta ima (2 Rey. 21:1-7, 16; Jeremías 15:4 ñawiriy). Chantapis yachallarqataq, Manasés, Jehovap ñawpaqinpi kʼumuykukuspa kutin kutita mañakuptin, “Diosqa chay mañakusqanta uyarispa, Jerusalenman kutichimp[usqanta], rey jina kamachinallampajpuni” (2 Crónicas 33:12, 13 ñawiriy).

¹⁷ Jeremiasqa, Jehová, Manasesman khuyakuyninta rikuchisqanmanta, qillqasqasninpi mana parlanchu. Chaywanpis Jeremiasqa, Manasés wañupusqanmanta 15 watallanman, profetajina churasqa karqa. Chayrayku, kay saqra rey ruwasqasninmanta pesachikuptin, imachus kasqanta yacharqachá. Manasespa saqra ruwasqasninta, pesachikuspa imastachus tarisqanta ima ukhunchasqanqa, maytachá Jeremiasta yanaparqa, saqra kamachiqkunaman nisunman Sedequiasmanjina, Diospa khuyakuyninta, kʼacha kayninta ima, maskʼanankuta ninallanpaqpuni. Arí, lantista yupaychaq, mana juchayuq runasta wañuchiq reypis, pesachikusqanrayku perdonasqa karqa. Ñuqanchik, Jeremías kasunman karqa chayqa, Manasesmanta yachasqanchik, ¿wak saqra reyespa tiemponkupi Diosmanta willanallapaqpuni kallpachawasunmanchu karqa?

KAWSAYNINCHIKPI RIKUSQANCHIKMANTA YACHAKUNA

18. ¿Imatá Jeremías Uriasmanta yachakurqa, imaynatá chayta yachanchik?

¹⁸ Jeremiasqa, profetajina llamkʼachkaspa, imatachus llaqtamasisnin wakin kutispi ruwasqankumanta yachakurqa. Juknin llaqtamasinqa, profeta Urías karqa. Payqa, Joacim kamachichkaptin, Jerusalenpa, Judap contranpi ima, profetizarqa. Chaywanpis reyta manchachikusqanrayku, Egiptoman ayqirikapurqa. Reytaq, runasninwan Egiptomanta apachimuspa wañuchichirqa (Jer. 26:20-23). Urías imapichus tukusqanmanta, ¿imallatapis Jeremías yachakurqachu? Arí, imaraykuchus Jeremiasqa, templo chayniqpipis, judiosman llakiypi rikukunankuta mana manchachikuspa willallarqapuni, Jehovataq ni jaykʼaq saqirparirqachu. Safanpa churin Ahicamtapis, Jeremiasta jarkʼanapaq tanqarqa (Jer. 26:24).

19. ¿Imatá Jeremías, Jehová llaqtanman profetasta kutin kutita kachasqanmanta yachakurqa?

¹⁹ Chantapis Jeremiasqa, Jehovap nisqasninta llaqtanman willachkaspa, kawsayninpi rikusqanmanta yachakullarqataq. Joacim 4 watataña kamachichkaptin, Jehovaqa, Josiaspa tiemponmantapacha chay kutikama nisqasninta, Jeremiaswan qillqachirqa. ¿Imapaqtaq? Judíos, saqra ruwayninkumanta pesachikuspa, perdonta tarinankupaq (Jeremías 36:1-3 ñawiriy). Jeremiasqa, judiosman kutin kutita saqra ruwaykunasninkuta saqinankuta nirqa (Jer. 44:4). Chantapis kawsayninpi rikusqanrayku, Jehová khuyakuyninrayku profetasta llaqtanman kachasqanta entienderqa. Chaytaq khuyakuyniyuq kananpaq yanaparqachá (2 Cró. 36:15). Chayrayku Jerusalén thuñikuchkaptin, nirqa: “Diospa khuyakuynenqa mana jaykʼajpis tukukunchu; munakuynimpis mana tukukuyniyojchu. Sapa paqarin mosojyanku”, nispa (Lam. 3:22, 23).

“MAYPITAJ TATA DIOS KASHANRI?”, NISPA, ¿SAPA PʼUNCHAYCHU TAPUKUNCHIK?

20. Imallatapis akllana kaptin, ¿imaynatá Jeremiasjina ruwasunman?

²⁰ Sapa pʼunchay imata ruwaytapis akllanchik. ¿Diospa munayninmanjina ruwanapaq kallpachakunchikchu? Nisunman “maypitaj Tata Dios kashanri?” nispa, ¿tapukunchikchu? (Jer. 2:6-8.) Jeremiasqa, llaqtamasisninmanta nisqaqa, imata ruwanallanpaqpis, Tukuy Atiyniyuq Diosman qayllaykurqa. Imata ruwanallapaqpis Jeremiasjina Jehovap yuyaychayninta maskʼayqa, may sumaq.

21. Willaypi kachkaptinchik, pillapis qhapariykuwaptinchik, ¿imatataq Diosmanta mañakusunman?

²¹ Ima ruwaytachus akllachkasqanchikqa, mana jatun ruwaypunichu kanan tiyan. Sutʼinchanapaq, ichá ima pʼunchaychus willayman lluqsiyta akllarqanki chay kanman. Ichapis rikchʼarispa, janaqpachata yana phuyullata rikunki, wasimanta mana lluqsinapaqjinataq kachkan. Ichá willanki chaypi sapa kuti willakun, chayri yuyarikunki wakin runas, mana uyarisusqankuta wakintaq qhapariykususqankuta ima. Ajinapi rikukuspa, Diospa yanapayninta mañakuy. Chaytaq sumaq willaykunata willachkasqaykipi tʼukurinaykipaq yanapasunqa. Chantá, willamunayki Diospa munaynin kasqanta astawan sutʼita reparanki. Astawanpis, Diospa nisqasninqa, Jeremiastajina sunqu qhallallarisqa kanapaq, kusisqa kanapaq ima, yanapawasun (Jer. 15:16, 20, 21). Willaypi kachkaptiyki, phiña runawan tinkuspa manchachisunanpaqjina qhapariykusunki chayqa, Jehovaman willakuy. Ama qunqaychu, imatachus kutichiyta yachanaykipaq Dios espíritu santonta qusunqa. Jinamanta Diospa nisqanta willayta munasqayki, sunquykipi ima saqra yuyaytapis atipanqa (Luc. 12:11, 12).

22. ¿Imaraykutaq Jehová wakin mañakuykunata mana uyarinmanchu?

²² Chaywanpis wakin mañakuykunaqa, mana Jehovaman chayanmanchu, nisunman jarkʼasqa kankuman (Lamentaciones 3:44 ñawiriy). Jehovaqa, kʼullu judiospa mañakuyninkuta mana uyarirqachu, imaraykuchus paykunaqa ‘Diospa kamachisqanta mana uyarispa’, saqrallatapuni ruwachkarqanku (Pro. 28:9). Jeremiasqa, pillapis mañakusqanmanjina mana ruwaptin, Diosta phiñachisqanta, mañakuyninta mana uyarisqanta ima sutʼitachá entienderqa. Ñuqanchikpis chayta sumaqta entiendena tiyan. Chayrayku ni imatapis Diospa sunqunta nanachinapaqjina ruwanachu.

23, 24. a) Diospa munayninta riqsinapaq, ¿imatá ruwasunman? b) Sapallanchikpi Bibliata ukhunchasqanchik sumaqta yanapanawanchikpaq, ¿imatá ruwasunman?

²³ Jehovap yuyaychayninta tukuy sunqu mañakuspapis, Bibliata sapallanchikpi ukhunchananchik tiyan, imaraykuchus ajinallamanta Diospa munayninta riqsisunchik. Jeremiasmanta nisqaqa, ñuqanchikpataqa Biblia kapuwanchik. Jeremiasqa, librosninta qillqananpaq sumaqta ukhuncharqa, ñuqanchikpis Bibliata ukhunchaspa, “maypitaq Tata Dios kashanri?”, nispa yuyaychayninta maskʼanallataq tiyan. Diospa munayninta riqsinapaq kallpachakuspaqa, paypi atienekusqanchikta rikuchinchik. Jinamantataq “mayupi sachʼa jina ka[sun], mayunejman saphichakuj” (Jeremías 17:5-8 ñawiriy).

²⁴ Bibliata ñawirichkaspa, chaypi tʼukurichkaspa ima, imatachus Jehová ruwananchikta suyasqanta reparana. Chantá ima yuyaychaykunatachus yuyariyta munasunman chayri mayqinkunachus yanapawasunman, chaykunata maskʼana. Unay tiempopi imachus ruwakusqanta, Diospa leyesninta, yuyaychaykunasninta, chayri yachaywan nisqasta ukhunchachkaspaqa, imaynatachus kawsayninchikpi yanapanawanchikpi tʼukurina. Diospa yanapayninta maskʼasun chayqa, Payqa Palabranniqta chʼampaykunata atipanapaq wakichiwasun. Arí, Jehovaqa, “jatuchaj imasmanta mana yachasqa[nchik] pakasqa imastapis” sutʼinchawasunman (Jer. 33:3).

25, 26. Kawsayninchikpi chayri wakkunap kawsayninkupi tʼukuriy, ¿imarayku yanapawanchik?

²⁵ Kawsayninchikpi chayri wakkunap kawsayninkupi tʼukuriyqa, yanapallawasunmantaq. Sutʼincharinapaq, wakin cristianosqa Uriasjina manaña Jehovapi atienekunkuchu (2 Tim. 4:10). Paykunajina llakiypi mana kanapaq, pantasqasninkumanta yachakuna. Jehová kʼacha kayninta, munakuyninta ima, rikuchiwasqanchikpi sapa kuti tʼukurina. Imaynatachus Jeremías, Jehová khuyakuyninta rikuchisqanmanta agradecesqa kachkarqa ajinata. Chʼampayninchikta mana atipanapaqjina qhawaptinchikpis, Dios mana ñuqanchikmanta qunqakusqanta yuyarina. Imaraykuchus Payqa, Jeremiastajina jarkʼawasun.

²⁶ Jehová kay tiempopi kamachisninta yanapasqanpi tʼukurispaqa, sapa pʼunchay tukuy imaymanamanta yanapachkawasqanchikta reparasun. Japonmanta Aki sutiyuq hermana, cristianajina mana valesqanta yuyarqa. Juk pʼunchay, qutuchakuykunata waturiq hermanop warminwan willayman lluqsirqa, chaypitaq payman nirqa: “Manasina Jehová llamkʼasqaywan kusisqachu kachkan, mayta kallpakuchkani siminmanta mana aqtumunawanpaq”, nispa. Hermanataq, “sunqu kʼajaywan Diosta yupaychaq cristianatajina qhawayki”, nispa, payta kallpacharqa. Chantá Akiqa, parlarisqankupi tʼukurirqa, qhasillata jinata yuyasqanta reparakuspataq, Diosmanta mañakurqa: “Jehová maymanchá kachawayta munanki chayman kachaway, munayniykita ruwasaq”, nispa. Chaymanta pisi tiemponman Akiqa, wak suyuman rirqa, chaypitaq japonés qalluta parlaq qutituta waturisqa, chay qallupi parlaqta necesitakuchkasqantataq yachasqa. Chantapis Akiqa, chay suyupi paqarikusqa, chayraykutaq chayman tiyakuq rispaqa mana ancha tramitesta ruwananchu karqa. Chaywanpis, ¿maypitaq tiyakunman karqarí? Juk hermana, wawan wak ladoman ripusqanrayku, wasinpi tiyakunanta nisqa. Aki nin: “Tukuy chaykunaqa, Jehová paypaq llamkʼanaypaq punkutajina kicharichkawasqanta rikuchiwarqa”.

27. ¿Imaraykutaq niraq imatapis ruwachkaspa, “maypitaj Tata Dios kashanri?”, nispa tapukunanchik tiyan?

²⁷ Achkha hermanos, Jehovap yanapayninta rikusqankuta ninkuman, ichá Bibliata ñawirichkaptinku chayri sapallankupi Bibliata ukhuncharichkaptinku, chayta rikurqanku. Ichá qampis chayta kawsayniykipi rikullarqankitaq. Chaytaq Jehovaman qayllanaykipaq kallpachasunan tiyan, chantapis tukuy sunqu sapa kuti mañakunaykipaq tanqasunan tiyan. Arí, “maypitaj Tata Dios kashanri?”, nispa, sapa kuti tapurikuptinchikqa, Jehová chiqan ñanta rikuchiwasun (Isa. 30:21).