¿Yacharqankichu?

¿Imaraykutaj Jesús nerqa ama juraychejchu nispa?

MOISESPA Leyninman jina wakin kutisqa, allillan karqa uj juramentota ruway. Jinapis Jesuspa tiemponpi judiosqa, imallamantapis jurajpuni kanku. Judiosqa juraj kanku, nisqankuta runas creenankupaj. Chaywanpis Jesusqa, iskay kutipipuni judiosman nerqa ama juranankuta. Astawanpis nerqa: “Parlasqaykichej kay jina kachun: ‘Arí’ nisqaykichejqa, arí kachun, ‘mana’ nisqaykichejpis, mana kachun”, nispa (Mat. 5:33-37; 23:16-22).

Uj diccionario nisqanman jina, judiosqa manchayta juraj kanku mana llullata parlashasqankuta rikuchinankupaj. Chantapis judiospa Talmud nisqa libronkupi nej, mayqen juramentotachus juntʼanankuta, mayqen juramentotatajchus mana juntʼanankuta.

Waj religionmanta judiospis, imallamantapis jurayta mana allinpajchu qhawaj kanku. Chay judiosmanta parlaspa, Flavio Josefo jinata nerqa: “Paykunaqa mana jurajchu kanku. Imaraykuchus nej kanku jurayqa, llullakuy jina kasqanta. Yuyajtaj kanku pillapis parlasqanta valechinanpaj jurajqa, llullakusqanta”, nispa. Chantá Eclesiástico libro juramentota ruwaymanta parlallantaj. Chay libroqa judiospata. Chaypitaj jinata nin: “Anchata jurajqa, anchatataj juchallikun”, nispa (23:11). Reparanchej jina, Jesuspis imallamantapis juray mana allinchu kasqanta nerqa. Imaraykuchus judiosqa mana piensarispa, tukuy imapaj juraj kanku. Achhayrayku noqanchej mana llullakuspa parlajtinchej mana juranachu kanqa, parlasqanchejta creenawanchejpaj.