Mateo 6:34 | “Qʼaya imachus kananmanta ama phutikuychejchu”

“Ama jaykʼajpis phutikuychejchu imachus qʼaya kananmanta, qʼaya pʼunchaypa llakiynenqa kallanqa. Sapa pʼunchaypa llakiynenqa kallan” (Mateo 6:34, Diospa Palabran).

“Qʼaya imachus kananmanta ama phutikuychejchu, imaraykuchus qʼaya pʼunchay chayamojtenqa, chaypachalla chaymanta phutikuyta atinki. Sapa pʼunchaypa llakiynenqa chay pʼunchayllapaj kachun” (Mateo 6:34, Diospa Qhelqachisqan).

¿Ima niytá munan Mateo 6:34?

Jesusqa kay palabrasta nispa, nisharqa mana anchata phutikunata qʼaya ima llakiyniyojchus kanamanta. Astawanqa nisharqa sapa diamanta llakiykunallata allinchanata.

Jesusqa chayta nispa, mana nisharqachu qʼaya chayri aswan qhepaman imastachus ruwananchejpi mana yuyanachu kasqanta (Proverbios 21:5). Astawanpis Jesusqa nisharqa mana anchata llakikunata qʼaya pʼunchay imachus pasananmanta. Qʼaya imachus kananmanta llakikusun chayqa, mana kusisqachu kasun, nitaj kunan pʼunchaypaj ruwanasninchejtapis ruwayta atisunchu. Qʼaya pʼunchaymanta llakikuspaqa, mana imatapis allinchasunchu. Chantapis imaschus llakichiwanchej chay imasqa, mana pasanpunichu, pasanman chaypis mana yuyasqanchejman jinapunichu.

Mateo 6:34 ñaupaqenpi, qhepanpi kaj versículos

Kay palabrasqa kashan Jesús Orqopi Yachachisqanmanta. Chaytaj kashan Mateo 5 a 7 capitulospi. Chaypi Jesusqa sutʼincharqa anchata llakikuspaqa mana aswan kusisqaschu kasqanchejta, nitaj aswan unaytachu kausananchejta (Mateo 6:27). Chantá Jesús nisqanman jina, Jehová Diosta kausayninchejpi ñaupajman churasun chayqa, mana anchata llakikusunchu qʼaya imachus kananmanta. Diosqa animalesta, plantastapis cuidan. Chayrayku payta yupaychajtinchej, ¿manachu Diosqa noqanchejtapis cuidawasunman? (Mateo 6:25, 26, 28-33).