Cristiano Kausayninchej tantakuypaj referencias
5-11 DE MARZO
BIBLIAMANTA SUMAJ YACHACHIYKUNA | MATEO 20, 21
“Qankunamanta kuraj kayta munajqa, kamachiykichej kanan tiyan”
(Mateo 20:3) Ujtawan las nueveta jina llojsispa, mercado plazapi mana llankʼanayoj runasta sayashajta rikullasqataj.
nwtsty dibujo
Mercado plaza
Cristiano Kausayninchej folletopi mercado plazamanta uj dibujo kashan. Chay jina mercadosqa callellapi kaj. Vendejkunataj calle juntʼata vendenasninkuta churaj kanku. Chayrayku runasqa chayninta kʼiskillata purej kanku. Chay lugarmanta runasqa, mercadomanta rantikamoj kanku: wasipi imachus necesitakusqanta, tʼuru platosta, tʼuru mankasta, vidriomanta may valesqa imasta, frutasta, aychata, waj imastawan. Qʼoñi lugar kasqanrayku, rantikusqankoqa mana unaytachu aguantaj. Chayrayku runasqa sapa día mercadoman rej kanku. Chantapis chayman rispaqa, imachus llajtapi chayri waj ladospi kashasqanta yachaj kanku. Mercado plazaspeqa wawas pujllaj kanku, trabajayta munajkunapis chaypi trabajota suyakoj kanku. Jesusqa mercado plazapi kashaspa onqosqasta sanoyacherqa. Pablopis mercado plazaspi yachacherqa (Hch 17:17). Jinapis fariseoswan leymanta yachachejkunawanqa, mercado plazasman rej kanku runaswan rikuchikunankupaj chayri napaykuchikunankupaj.
(Mateo 20:20, 21) Chantá Zebedeoj warmenqa wawasninwan Jesusman qayllaykuspa qonqoriykukorqa, uj imata mañakunanpaj. 21 Jesustaj nerqa: “¿Imatataj munankiri?”, nispa. Paytaj kuticherqa: “Niy ari kay iskay wawasniy Gobiernoykipi tiyaykukunankuta, ujnin pañaykipi, ujnintaj lloqʼeykipi”, nispa.
nwtsty Mt 20:20, 21 sutʼinchaykunasnin
Zebedeoj warmenqa wawasninwan: Payqa Salomé sutikorqa, apóstol Santiagojta, apóstol Juanpatawan mamanku karqa. Salomeqa ichapis Jesuspa tian karqa. Marcos libro nisqanman jina, Santiagowan Juanwan Jesusman chimpaykorqanku. Chaytaj rikuchiwanchej, paykunapuni chay sumaj puestosta mamankuwan mañachisqankuta (Mt 27:55, 56; Mr 15:40, 41; Jn 19:25).
ujnin pañaykipi, ujnintaj lloqʼeykipi: Chayqa ninakun jatunpaj qhawasqa kaywan, autoridadniyoj kaywan ima. Jinapis pañapi kajqa, aswan jatunpaj qhawasqa (Sl 110:1; Hch 7:55, 56; Ro 8:34).
(Mateo 20:25-28) Jesustajrí yachachisqasninta wajyaspa nerqa: “Qankunaqa yachankichej kay jallpʼapi kamachejkunaqa munayninkuman jina runasta kamachisqankuta, autoridadespis atiyninkuwan runasta ñakʼarichinku. 26 Qankuna ukhupeqa mana ajinachu kanan tiyan. Astawanpis pichus qankunamanta kuraj kayta munajqa, kamachiykichej kanan tiyan. 27 Chantá pichus qankunamanta ñaupajpi kayta munajqa, esclavo jina sirvisunaykichej tiyan. 28 Noqapis mana sirvichikojchu jamuni, manachayqa sirvej, kausayniytataj qosaj ashkha runasta kacharichinaypaj”, nispa.
nwtsty Mt 20:26, 28 sutʼinchaykunasnin
kamachiykichej: Chayri “wajkunata sirvej”. Kay palabraqa griego parlaypi diákonos nisqa palabramanta tijrachikun. Chaytaj niyta munan, wajkunata llampʼu sonqowan sirvej runa. Diákonos palabrata Bibliapi churakorqa: Jesuspaj (Ro 15:8), Cristoj kamachisninpaj (1Co 3:5-7; Col 1:23), siervos ministerialespaj (Flp 1:1; 1Ti 3:8), wasipi kamachispaj (Jn 2:5, 9), autoridadespaj ima (Ro 13:4).
Sumaj yachachiykunata maskʼana
(Mateo 21:9) Ñaupaqenta rejkuna, qhepanta rejkunapis qhaparisharqanku: “Diosníy, Davidpa Wawanta salvanaykita mañakuyku. Jehová Diospa sutinpi jamojqa bendecisqa kachun. Cielopi kashaj Diosníy, payta salvanaykita mañakuyku”, nispa.
nwtsty Mt 21:9 sutʼinchaynin
salvanaykita mañakuyku: Griego parlaypi nin, “Hosanna”. Kay palabraqa niyta munan, “salvanaykita mañakuyku” chayri “salvay ari”. Kay versiculopi, runasqa Diosmanta salvacionta chayri atipanapaj yanapata mañakushanku. Chantapis “Hosanna” palabraqa, niyta munallantaj “payta salvariy ari”. Chaymanta qhepaman, runasqa chay palabrata oqharej kanku Diosmanta mañakushaspa, alabanzasta takishaspa ima. Chay palabraqa, hebreo parlaypi Salmo 118:25 versiculopi rikhurin. Chay salmoqa, 113-118 salmosmanta ujnin. Israelitasqa chay salmosta Pascua tiempopi takej kanku. Chayraykuchá Jesús Jerusalenman yaykushajtin, runasqa nerqanku: “Salvanaykita mañakuyku”, nispa. Diostajrí chay mañakuyninkuta uyarerqa, Jesusta kausarichispa. Mateo 21:42 versiculopi, Jesusqa Salmo 118:22, 23 versiculosta oqharerqa. Nerqataj chay palabrasqa Mesiaspi juntʼakusqanta, nisunman paypi.
Davidpa Wawanta: Jesusta chayta nispa, runasqa nisharqanku Davidpa mirayninmanta jamusqanta, Mesías kaspa imatachus ruwananta ima.
(Mateo 21:18, 19) Qʼayantin paqarin Jerusalenman kutishaspa, Jesús yarqhachikorqa. 19 Ñan patapitaj higo sachʼata rikorqa, qayllaykuspataj mana higosta tarerqachu, manachayqa laqhesllata. Chantá chay sachʼata nerqa: “Kunanmantapacha manaña jaykʼajpis poqonkichu”, nispa. Higo sachʼataj chay ratopacha chʼakiporqa.
Higo sachʼamanta parlaspa creeyniyoj kayta yachacherqa
Chanta, ¿imajtintaj Jesús higo sachʼata chʼakicherqa? Pay nerqa: “Cheqatapuni niykichej: Creeyniyojchus kawajchej, manataj iskayrayawajchejchu chayqa, mana higo sachʼawan ruwasqallaytachu ruwawajchej. Astawanqa sichus kay orqotapis niwajchej: ‘Jatariy, qochamantaj wijchʼuykukuy’, nispa chayqa, nisqaykichejman jina ruwakunman. Chantá creespachus tukuy imata Diosmanta mañakunkichej chayqa, mañakusqaykichejta japʼinkichej”, nispa (Mateo 21:21, 22). Jesusqa chayta nispa, sinchʼi creeyniyoj kanamanta ujtawan yachachisharqa (Mateo 17:20).
Jesusqa higo sachʼata chʼakichispa Diospi creenapuni kasqanta yachachisharqa. Pay nerqa: “Diosmanta imatapis mañakuspaqa japʼinaykichejtapuni creeychej, japʼinkichejtaj”, nispa (Marcos 11:24). Chayta yachayqa maytapuni Jesuspa yachachisqasninta yanaparqa, astawanraj apostolesnintaqa. Imajtinchus pisi tiemponman ashkha llakiykunapi rikukorqanku. Jinapis Jesusqa, higo sachʼamanta parlaspa mana chayllatachu yachachisharqa, imamantawanchus parlashasqanta qhawarina.
Israel nacionqa chay sachʼa jinallataj karqa. Qhawarisqalla allinman rijchʼakorqa. Diosqa Israel nacionwan uj tratota ruwarqa. Jinapis chay nacionqa mana Diospa Leyninta kasukorqachu, mana creeyniyojkunataj karqanku. Chantapis Diospa Wawanta qhesacharqa. Chayrayku chay nacionqa mana poqoj higo sachʼa jina karqa. Jesusqa mana poqoj higo sachʼata chʼakichispa, imapichus chay mana creeyniyoj nación tukunanta rikuchisharqa.
Bibliata leenapaj
12-18 DE MARZO
BIBLIAMANTA SUMAJ YACHACHIYKUNA | MATEO 22, 23
“Aswan kuraj kamachiykunata kasukuna”
(Mateo 22:36-38) “Yachachejníy, ¿mayqen kamachisqataj Leymanta aswan kurajri?”, nispa. 37 Jesustaj kuticherqa: “‘Jehová Diosniykitaqa munakunayki tiyan tukuy sonqoykiwan, tukuy kausayniykiwan, tukuy yuyayniykiwantaj’. 38 Chaymin aswan kuraj, ñaupaj kaj kamachisqataj.
nwtsty Mt 22:37 sutʼinchaynin
sonqoykiwan: Sonqo palabrata oqharikun, uj runa imaynachus kasqanmanta parlanapaj. Jinapis “sonqo” palabra, “kausay”, “yuyay” palabraswan khuska rikhurin chayqa, parlashan runaj munayninmanta, imaynachus kashasqanmanta ima. Kay versiculopi sonqo, kausay, yuyay palabrasqa, khuskachasqa kashanku. Chaywantaj entiendenchej, Jehová Diosta mana iskay sonqollachu, nitaj tumpallatachu munakunanchej kasqanta.
kausayniykiwan: Chayri “almaykiwan”.
yuyayniykiwantaj: Nisunman piensayta atisqanchej. Uj runaqa yuyayniyoj kasqanrayku, Diosta rejsiyta, munakuyta ima atin (Jn 17:3; Ro 12:1). Hebreo parlaypi Deuteronomio 6:5 versiculopi, kay kinsa palabrasta oqharin: “sonqo, alma, kallpa”. Jinapis Mateo librota griegoman tijrachishajtinku, “kallpa” palabraj cuentanmanta “yuyay” palabrata churarqanku. ¿Imaraykutaj mana kikin palabratachu churarqanku? Ichapis ajinata churarqanku, ñaupa hebreo parlaypi “yuyay” palabra mana kasqanrayku. Paykunaqa yuyaymanta parlanankupaj, “sonqo” palabrata oqharej kanku. “Sonqo” palabrata oqharispa parlaj kanku: uj runaj yuyayninmanta, imaynachus kasqanmanta, imatachus ruwayta munasqanmanta, imaraykuchus imatapis ruwasqanmanta ima (Dt 29:4; Sl 26:2; 64:6; sonqoykiwan palabraj sutʼinchayninta leeriy). Chayrayku hebreopi “sonqo” palabra rikhurejtenqa, Septuaginta Bibliapi “yuyay” palabra rikhurin (Gé 8:21; 17:17; Pr 2:10; Isa 14:13). Chantapis mana chayraykullachu, Mateo libropi “kallpa” palabraj cuentanmanta “yuyay” palabrata churarqanku. Ichapis ajinata churarqanku, hebreo parlaypi “kallpa” palabra, runaj kallpanwan yuyasqanwan ima ninakusqanrayku. Chay palabraqa, hebreo parlaypi griego parlaypipis casi kikillan kanku. Chayraykuchá Mateo, Marcos, Lucas, Juan librosta qhelqajkunaqa, mana kikintachu chay palabrata tijracherqanku.
(Mateo 22:39) Iskay kajtaj ñaupaj kajman rijchʼakullantaj: ‘Runa masiykita munakunayki tiyan, qan kikiykita jina’.
nwtsty Mt 22:39 sutʼinchaynin
Iskay kajtaj: Uj fariseo Jesusta tapurejtin, payqa Mateo 22:37 nisqanta kuticherqa. Jinapis chay kutipi uj kamachiymantawan parlarqa (Le 19:18). Ajinamanta Jesusqa yachacherqa chay iskay kamachiykuna khuskachasqa kasqankuta, chaypitaj sayachisqa kasqanta “tukuynin Ley, Profetaspa” nisqankupis (Mt 22:40).
Runa masiykita: Griego parlaypeqa nin, “qayllaykipi kajta”. Chaytaj mana wasinchej qayllapi tiyakojkunamantachu parlashan. Ichapis chay palabraqa, mana rejsisqa runasmantawan parlashan (Lu 10:29-37; Ro 13:8-10).
(Mateo 22:40) Kay iskay kamachisqaspi sayachisqa kashanku, tukuynin Ley, Profetaspa nisqankupis”.
nwtsty Mt 22:40 sutʼinchaynin
Ley, Profetaspa: Kay versiculopi “Ley” nispaqa, parlashan Génesis libromanta Deuteronomio librokama. “Profetaspa” nisqankutaj, Isaías libromanta Malaquías librokama kashan. Chay iskay palabras khuska rikhurejtinkoqa, ichá Hebreo Qhelqasqaspi tukuynin librosmanta parlashan (Mt 7:12; 22:40; Lu 16:16).
sayachisqa kashan: Griego parlaypi nin, “warkhusqa kashan”. ¿Imatá Jesús chaywan yachachisharqa? Hebreo Qhelqasqasmanta tukuynin libros munakuypi sayachisqa kasqanta, manataj Moisespa Leynillanchu, nitaj chunka kamachiykunallachu (Ro 13:9).
Sumaj yachachiykunata maskʼana
(Mateo 22:21) Paykunataj kuticherqanku: “Cesarpata”, nispa. Jesustaj nerqa: “Jina kajtenqa, Cesarpata kajtaqa Cesarman qopuychej, Diospata kajtataj Diosman qopuychej”, nispa.
nwtsty Mt 22:21 sutʼinchaynin
Cesarpata kajtaqa Cesarman: Jesusqa uj kutillata Romapi kamachejmanta parlarqa, chaytaj Marcos 12:17; Lucas 20:25 versiculospi rikhurillantaj. ‘Cesarpata kajta’ nispaqa, parlashan impuestosta paganamanta, autoridadesta respetanamanta, maychus kajta kasukunamanta ima (Ro 13:1-7).
Diospata kajtataj Diosman: Chayta ruwasunman: Jehová Diosninchejta tukuy sonqonchejwan yupaychaspa, tukuy kallpanchejwan munakuspa, tukuy imapi kasukuspa, mana wasanchaspataj (Mt 4:10; 22:37, 38; Hch 5:29; Ro 14:8).
(Mateo 23:24) ¡Pusaykachaj ciego runas, chʼuspita chʼumankichej, camellotataj oqoykullankichej!
nwtsty Mt 23:24 sutʼinchaynin
chʼuspita chʼumankichej, camellotataj oqoykullankichej: Israelitas ashkha animalesta chʼichipaj qhawaj kanku. Aswan juchʼuy kajqa chʼuspi karqa, aswan jatun kajtaj camello karqa (Le 11:4, 21-24). Jesusqa chay rijchʼanachinawan, leymanta yachachejkunaman, fariseosman ima kayta nisharqa: “Ujyanasniykichejmanta chʼuspita wijchʼunkichej mana chʼichichakunaykichejpaj. Jinapis Leymanta aswan allin kajtaqa qonqapunkichej. Chayta ruwaspataj uj camellota oqoykushankichej”.
Bibliata leenapaj
19-25 DE MARZO
BIBLIAMANTA SUMAJ YACHACHIYKUNA | MATEO 24
“Qhepa pʼunchaykunapi rijchʼarisqallapuni kana”
(Mateo 24:12) Sajra kausay yapakusqanraykutaj, ashkhaspa munakuyninku chiriyaponqa.
it-1-S pág. 125 párr. 6
Munakuy
Munakuyninchej chiriyapunman. Jesucristoqa kay mundoj tukukuyninmanta yachachisqasninwan parlashaspa, nerqa wakin cristianospa munakuyninku (a·gá·pē) chiriyapunanta (Mt 24:3, 12). Apóstol Pabloqa nerqa, qhepa pʼunchaykunapi runas “qolqeta munakojkuna” kanankuta (2Ti 3:1, 2). Chayrayku runasqa imachus allin kasqanta yachaspapis qonqapunkuman, munakuyninkupis chinkapunman. Mana ajinapi rikukunapaj, Diospa Palabranpi tʼukurina tiyan, yuyaychaykunasninman jinataj kausananchej tiyan (Ef 4:15, 22-24).
(Mateo 24:39) Paykunaqa mana reparakorqankuchu Jatun Para chayamunankama, tukuyninkutaj chinkachisqa karqanku. Ajinallataj kanqa noqa kutimunay tiempopis.
w99-S 15/11 pág. 19 párr. 5
¿Diosninchej kamachiwasqanchejta juntʼashanchejchu?
5 Jesucristoqa kay tiemponchejmanta nerqa: “Imaynachus Noejpa tiemponpi karqa, ajinallataj kanqa noqa kutimunay tiempopis. Chay tiempomanta runasqa manaraj Jatun Para chayamushajtin, mikhusharqanku, ujyasharqanku, casarakusharqanku, arcaman Noé yaykunan pʼunchaykama. Paykunaqa mana reparakorqankuchu Jatun Para chayamunankama, tukuyninkutaj chinkachisqa karqanku. Ajinallataj kanqa noqa kutimunay tiempopis” (Mateo 24:37-39). Mikhuypis ujyaypis mana juchachu. Qhariwarmi kausaytapis Diosninchej rikhuricherqa (Génesis 2:20-24). Jinapis chay imasllamanta llakikunchej chayqa, Jehová Diosmanta mañakunanchej tiyan. Payqa yanapawasunman Gobiernonta ñaupajman churananpaj, cheqan kajta ruwananpaj, kamachiwasqanchejta kasukunapaj ima (Mateo 6:33; Romanos 12:12; 2 Corintios 13:7).
(Mateo 24:44) Chayrayku qankunapis wakichisqa kaychej, noqaqa mana yuyasqaykichej horapi jamusaj.
Apostolesqa uj señalta mañakunku
Jesusqa nerqa yachachisqasnin rijchʼarisqa, wakichisqataj kanankuta. Chayta aswan sutʼita entiendenankupaj nerqa: “Kayta yachaychej: Wasiyojchus yachanman ima horatachus suwa jamunanta chayqa, rijchʼarisqallapuni kanman, manataj saqenmanchu wasinman suwa yaykunanta. Chayrayku qankunapis wakichisqa kaychej, noqaqa mana yuyasqaykichej horapi jamusaj”, nispa (Mateo 24:43, 44).
Sumaj yachachiykunata maskʼana
(Mateo 24:8) Chay tukuy imasqa nanaykunaj qallariynillanraj kanqa, onqoj warmej nanaynin jina.
nwtsty Mt 24:8 sutʼinchaynin
nanaykunaj: Griego parlaypi parlashan, onqoj warmej nanayninmanta. Kay versiculoqa llakiykunamanta, ñakʼariykunamanta, imaymana problemasmantawan parlashan. Ichapis niyta munallantaj, imaynatachus uj warmej nanaynin wawitanta nacechikunan qayllata mayta sinchʼiyan, ajinallatataj jatun ñakʼariy qayllata llakiykuna, ñakʼariykuna, chʼampaykuna ima mayta yapakunanta, sinchʼiyanantataj (Mt 24:21).
(Mateo 24:20) Diosmanta mañakullaychejpuni chay ayqekunaykichej ama chiri tiempopi, nitaj Samarikuna Pʼunchaypi kananpaj.
nwtsty Mt 24:20 sutʼinchaynin
chiri tiempopi: Chay tiempoqa mayta paramun, yakupis juntʼaykamun, manchay chiritaj. Chayrayku ni pipis chiri tiempopi viajayta atejchu, mikhunapis pisi, jarkʼakunapaj lugarpis mana tariyta atikullajchu (Esd 10:9, 13).
Samarikuna Pʼunchaypi: Judea jallpʼapeqa Samarikuna Pʼunchayta jatunpaj qhawanku. Chay diaqa mana karusta puriyta atejchu kanku, nitaj qʼepistapis apaykachanankuchu karqa. Chantapis llajtaj punkusnenqa wisqʼakoj (Hch 1:12, Bibliata estudianapaj yanapa folletopi, 16 rakʼiyninta qhawariy).
Bibliata leenapaj
26 DE MARZO–1 DE ABRIL
BIBLIAMANTA SUMAJ YACHACHIYKUNA | MATEO 25
“Rijchʼarisqallapuni kaychej”
(Mateo 25:1-6) ”Chantá, cielopi kaj Gobiernoqa rijchʼakun chunka doncellasman. Paykunaqa mecherosninkuta oqharispa noviota taripaj llojsisqanku. 2 Phishqaqa mana yuyayniyoj kasqanku, phishqataj yuyayniyoj. 3 Chay mana yuyayniyoj doncellasqa mecherosnillankuta apakusqanku, nitaj aceiteta apakusqankuchu mecherosninkuman yapanankupaj. 4 Yuyayniyoj doncellastaj mecherosninkuta apakusqanku, aceitetapis yurusninkupi apakullasqankutaj. 5 Novio mana usqhayta chayamojtintaj tukuyninku puñuywan atipachikuspa puñurparisqanku. 6 Chaupi tutata uj qhapariy uyarikusqa: ‘Kaypiña novio kashan. Taripaj llojsimuychej’, nispa.
(Mateo 25:7-10) Chay chunka doncellastaj jatarikusqanku mecherosninkuta wakichinankupaj. 8 Mana yuyayniyoj doncellasqa, allin yuyayniyoj doncellasman nisqanku: ‘Qoriwayku uj chhika aceiteta. Mecherosniykoqa wañupushankuña’, nispa. 9 Allin yuyayniyoj doncellastaj kutichisqanku: ‘Qorejtiykoqa tukuyninchejta pisiwasunman. Astawanqa rispa vendejkunamanta ranterqakamuychej’, nispa. 10 Rantimunankukamataj, novio chayamusqa, wakichisqa doncellastaj noviowan khuska casamiento wasiman yaykusqanku, punkutaj wisqʼakapusqa.
(Mateo 25:11, 12) Chaymantaraj chay wakin doncellasqa chayamuspa nisqanku: ‘Señor, Señor, kicharimuwayku’, nispa. 12 Noviotajrí kutichisqa: ‘Qankunataqa mana rejsiykichejchu’, nispa.
Sumaj yachachiykunata maskʼana
(Mateo 25:31-33) ”Maypachachus jatun atiyniypi tukuy angeleswan jamusaj chaypacha, noqaqa lliphipej jatun kamachina tiyanaypi tiyaykukusaj. 32 Tukuynejmantataj tukuy laya runas ñaupaqeyman tantasqa kanqanku. Noqataj chay runasta iskayman tʼaqasaj, imaynatachus michejpis ovejasta cabrasmanta tʼaqan, ajinata. 33 Ovejastaqa pañayman churasaj, cabrastataj lloqʼeyman.
Cristoj wauqesninta yanapana
7 Kay tiempopeqa ovejasmanta, cabrasmanta rijchʼanachinata aswan sutʼita entiendenchej. Yachanchejtaj Runaj Churin chayri rey, Jesús kasqanta. Reypa wauqesnin espíritu santowan ajllasqa kajkuna kasqankuta, pikunachus Jesuswan khuska janaj pachamanta kamachimonqanku (Rom. 8:16, 17). Ovejaswan, cabraswantaj “tukuy laya runas” kasqankuta. Paykunaqa manchay ñakʼariy tiempo tukukushajtin juzgasqas kanqanku, chay tiempotaj tumpamantawan qallarenqa. Yachallanchejtaj, Jesús paykunata juzgananta kay Jallpʼapiraj kaj ajllasqa cristianosta imaynatachus yanapasqankuman jina. Jehovaman mayta agradecekunchej Mateo 24, 25 capitulospi parlakusqan rijchʼanachinasta aswan sutʼita entiendenapaj yanapawasqanchejmanta.
(Mateo 25:40) Noqataj Rey jina paykunaman kutichisaj: ‘Cheqatapuni niykichej: Imatachus kay aswan juchʼuy hermanosniymanta ujninpaj ruwarqankichej, chaytaqa noqa kikiypaj ruwarqankichejʼ, nispa.
w09 15/10 pág. 16 párrs. 16-18
“Qankunaqa kawsaqesniy kankichej”
16 Diospa Reinon kay Jallpʼata kamachishajtin kausakuyta suyakushanchej chayqa, Cristoj wauqesninpa amigosnin kasqanchejta rikuchinanchej tiyan. ¿Imaynatá chayta ruwasunman? Kinsa ruwaykunata ruwaspa. Ñaupajtaqa, allin willaykunata willamunapaj atisqanchejta ruwana. Jesusqa, wauqesninman Jallpʼantinpi willamunankuta kamacherqa (Mat. 24:14). Chaywanpis, kay tiempopi Jallpʼapi kausaj wauqesnenqa, pisillaña kanku; waj ovejasmanta kajkuna mana yanapajtinkoqa, mana chay kamachiyta juntʼayta atillankumanchu. Chayrayku waj ovejasmanta kajkunaqa, Diosmanta willamuspa, Cristoj hermanosninta yanapashanku. Chay yanapataj, Cristopaj, allin kamachi yuyayniyojpajpis, may allin.
17 Chantapis, Diosmanta willakunallanpajpuni kapuyninchejwan yanapayta atisunman. Jesusqa, discipulosninman “kay pachaj qhapaj kayninwan” amigosta tarinankupaj yanapachikunankuta nerqa (Luc. 16:9). Chayta nispa, ¿Jesuswan, Jehovawan ima, qhapaj kaspalla amigos kayta atisqanchejtachu nisharqa? Mana. Kapuyninchejwan, Reinonmanta allin willaykuna willakunallanpajpuni yanapayta atisqanchejta nisharqa. Jinamanta mana “simillawanchu munanakusun, astawanqa cheqamanta ruwasqasninchejwan [...] munakusqanchejta” rikuchisun (1 Juan 3:16-18). Arí, Jallpʼantinpi Reinomanta willakunanpaj, Tantakunapaj Wasis ruwakunanpaj chayri allinchakunanpaj, kapuyninchejmanta qospa, willayman rispa ima, yanapashanchej. Kapuyninchejmanta pisitapis, ashkhatapis kusisqa qosqanchejtaqa, Jehovawan Jesuswan may allinpaj qhawanku (2 Cor. 9:7).
18 Jesuspa amigosnin kasqanchejtaqa, qotuchakuypi ancianosta tukuy sonqo kasukuspa, rikuchillasunmantaj. Imaraykuchus Cristo, chay hermanosta espíritu santonejta ancianos kanankupaj churan (Efe. 5:22, 23). Pablo nerqa: Qotuchakuypi “kurajkunaykichejta [ancianosta] kasuychej, paykunaj kamachiynimpitaj kaychej”, nispa (Heb. 13:17). Chaywanpis wakin kuteqa, ancianos Biblia nisqanman jina yuyaychawasqanchejta, mana kasukuyta atillanchejchu. Pantaj runas kasqankuta yachasqanchejrayku, yuyaychawasqanchejta, ichapis pisipaj qhawasunman. Jina kajtinpis, qotuchakuypa Uman Cristoqa, chay runasta noqanchejta qhawanawanchejpaj churan. Chay hermanosta mana kasukuspaqa, manachá Jesuspa amigosnin kayta munasqanchejta rikuchishasunmanchu. Chayrayku, ancianospa yuyaychasqankuta tukuy sonqo kasukojtinchejqa, Jesusta munakusqanchejta rikuchishanchej.
Bibliata leenapaj