Jesusqa uj waynuchumanta supayta qharqon

Jesusqa Pedrowan, Santiagowan, Juanwan orqomanta uraykamushaspa, ashkha runasta rikorqa. Chay runasqa Jesuspa waj yachachisqasninwan kasharqanku. Chay runas ukhupitaj, leymanta yachachejkunaqa Jesuspa yachachisqasninwan siminakusharqanku. Ajinallapitaj Jesusta rikorqanku, payta taripajtaj correrqanku. Jesustaj paykunata taporqa: “¿Imamantataj yachachisqasniywan churanakushankichej?”, nispa (Marcos 9:16).

Uj runataj, Jesuspa ñaupaqenman qonqoriykukuspa nerqa: “Yachachejníy, wawayta pusamorqayki, opayachej supayniyoj kasqanrayku. Maypichá chay supay japʼin, chaypi pampaman wijchʼun, phosoqota ajtuchimun, kirusnintapis kʼarurachin, parti wañusqatataj saqen. Yachachisqasniykita nerqani chay supayta wawaymanta qharqonankuta, manataj aterqankuchu”, nispa (Marcos 9:17, 18).

Jesuspa yachachisqasnenqa mana chay supayta qharqoyta atisqankuchu. Leymanta yachachejkunataj, chayta rikuspa ichapis asikorqanku. Chayraykuchá Jesusqa nerqa: “Ay kay tiempomanta mana creej runas, juchasapas. ¿Maykʼajkamataj qankunawan kallasajpuniri? ¿Maykʼajkamataj aguantasqaykichejri? Chay waynuchuta kayman pusamuychej”, nispa (Mateo 17:17).

Pusamojtinkutaj, supayqa chay waynuchuta pampaman choqarqa, siminmantataj phosoqota ajtuchimorqa. Chay waynuchu pampapi suntʼiykachashajtin, Jesusqa waynuchoj tatanta taporqa: “¿Maykʼajmantapachataj ajinata ruwakun?”, nispa. Paytaj nerqa: “Wawamantapacha. Sapa kuti supayqa ninamantaj yakumantaj wawayta wijchʼuykun wañuchiyta munaspa. Imallatapis ruwayta atiwaj chayqa, khuyarikuwayku, yanapariwaykutaj ari”, nispa (Marcos 9:21, 22).

Chay waynuchutaqa mana yanapariyta aterqankuchu. Chayrayku tatanqa may llakisqachá kasharqa. Jesustajrí payta nerqa: “¿Imaraykutaj nishawanki: ‘Atiwaj chayqa’, nispari? Creejpajqa tukuy imapis atikullan”, nispa. Chay ratopachataj chay waynuchoj tatanqa qhaparerqa: “¡Creeni! Yanapaway ari astawan creenaypaj”, nispa (Marcos 9:23, 24).

Chay ratopunitaj, ashkha runas Jesusman correspa jamusharqanku. Jesusqa paykunata rikuytawan, tukuy runaspa ñaupaqenpi chay supayta kʼamerqa: “Opayachej, lojtʼuyachej supay, noqa kamachiyki: Llojsiy kay waynuchumanta, amataj ujtawan payman kutiykunkichu”, nispa. Chay supaytaj chay waynuchuta sinchʼita qhaparichispa, mayta thalaytawantaj llojserqa. Chantá waynuchoqa wañusqa jina wijchʼukorqa. Runastaj nisharqanku: “¡Wañupun!”, nispa (Marcos 9:25, 26). Jesús aysarejtintaj, “chay rato sanoyaporqa”, sayarerqataj (Mateo 17:18). Runasqa chayta rikuspa tʼukulla kasharqanku.

Jesusqa yachachisqasninta willamunankupaj kachashaspa, atiyta paykunaman qorqa supaykunata qharqonankupaj. Jinapis chay waynuchumantaqa mana qharqoyta aterqankuchu. Chayrayku wasipi kashaspa Jesusta sapallanpi taporqanku: “¿Imaraykutaj chay supayta mana qharqoyta aterqaykuchuri?”, nispa. Jesustaj nerqa: “Chay laya supaytaqa Diosmanta mañakuspalla qharqoyta atikun”, nispa (Marcos 9:28, 29). Arí, chay waynuchumanta supayta qharqonankupajqa, sinchʼi creeyniyoj kananku karqa, Diosmantataj mañakunanku karqa.

Chayrayku Jesús nerqa: “Cheqatapuni niykichej: Creesqaykichejchus mostaza mujitu chhikitallanpis kanman chayqa, kay orqota niwajchej: ‘Kaymanta jaqayman ithiriy’, nispa, ithirinmantaj. Mana imapis qankunapaj mana atikojqa kanmanchu”, nispa (Mateo 17:20). Tukuytaj ajina creeyniyoj kayta atisunman.

Jehová Diosta sirvispaqa, ichapis wakin problemaspi rikukusun. Chaykunataj uj jatun orqo jina kankuman. Jinapis sinchʼi creeyniyoj kaspaqa chaykunata atipasun.