Jesús Diospa Gobiernonmanta willan

Jesusqa bautizakusqanmanta pisi tiemponman willayta qallarerqa: “Diospa Gobiernon qayllapiña”, nispa. Discipulosnintaj paywan tukuynin Galileata, tukuynin Judeata purimorqanku. Jesusqa Nazaret llajtanman kutipuytawan, sinagogaman yaykuspa Isaiaspa kʼuyuna libronta jatunmanta leerqa: “Jehová Diosqa espiritunta qowan sumaj willaykunata willanaypaj”, nispa. Runasqa milagrosta ruwananta munarqanku. Jesusqa mana milagrosta ruwanallanpajchu Diospa espiritunta japʼerqa, manaqa sumaj willaykunata willamunanpajpis. Payta uyarejkunamantaj nerqa: “Chay leesqayqa kunan juntʼakushan”, nispa.

Chantá Jesusqa Galilea qochaman rispa tawa pescadoreswan tinkorqa. Paykunataj discipulosninman tukorqanku. Jesusqa paykunata nerqa: “Qhepayta jamuychej, runa japʼej pescadoresman tukuchisqaykichej”, nispa. Paykunaqa karqanku: Pedro, Andrés, Santiago, Juan ima. Paykunataj chʼipasninkuta saqeytawan chay rato Jesuspa qhepanta rerqanku. Tukuy Galileatataj muyumorqanku Diospa Gobiernonmanta willaspa. Predicarqanku sinagogaspi, mercadospi, callespi ima. Ashkha runastaj qhepankuta rej kanku. Jesuspa ruwasqasninmantaqa tukuynejpi yachakorqa, karu llajta Siriapipis.

Tiemponmantaj Jesusqa wakin discipulosninman atiyta qorqa supayniyoj runasta, onqosqasta ima sanoyachinankupaj. Wakin discipulosnintaj paywan khuska predicaj kanku llajtamanta llajta, ranchomanta rancho. Wakin warmispis paywan rillajtaj kanku payta, discipulosninta ima yanapanankupaj. Chay warmis karqanku: María Magdalena, Juana, Susana, waj warmis ima.

Jesusqa discipulosninta wakichiytawan predicanankupaj kacharqa. Galileapi predicashajtinkutaj ashkha runas Jesuspa discipulosninman tukorqanku, bautizakorqanku ima. Ashkha runas Jesusta qhatiyta munarqanku. Chayrayku Jesusqa paykunata poqosqa chajrawan kikincharqa, nerqataj: “Jehová Diosmanta mañakuychej cosechanman oqharejkunata kachamunanta”, nispa. Chantá Jesusqa 70 discipulosninta iskaymanta iskay kacharqa Diospa Gobiernonmanta tukuy Judeapi predicanankupaj. Kutimuspataj Jesusman willayta munarqanku predicamusqankumanta. Diabloqa ni imata ruwayta aterqachu mana predicanankupaj.

Jesusqa tukuy imata wakicherqa, pay cieloman kutipojtin discipulosnin willanallankupajpuni. Payqa nerqa: “Sumaj willaykunata jallpʼantinpi willaychej. Diospa Palabranmanta runasman yachachiychej, bautizaychejtaj”, nispa.