Jesusqa Capernaumpi milagrosta ruwan

Yachanchej jina, Jesusqa Pedrota, Andresta, Santiagota, Juantawan wajyarerqa runa japʼej pescadores kanankupaj. Chaymanta Samarikuna Pʼunchay chayamorqa, tukuyninkutaj Capernaum llajtapi sinagogaman rerqanku. Jesustaj chaypi kashaspa runasman yachacherqa. Runastajrí sumajta yachachisqanmanta mayta tʼukorqanku. Payqa atiyniyoj jina yachachisharqa, manataj leymanta yachachejkuna jinachu.

Chay sinagogapeqa supayniyoj runa kashallarqataj. Paytaj sinchʼita qhaparispa nerqa: “Nazareno Jesús, ¿ima ruwanayku tiyan qanwanri? ¿Tukuchejchu jamuwayku? Allinta yachani pichus kasqaykita. Qantaqa Dios kachamusunki”, nispa. Jesustajrí chay runapi kaj supayta kʼamerqa: “¡Chʼin kay! ¡Llojsiy kay runamanta!”, nispa (Marcos 1:24, 25).

Chay millay supaytaj runata sinchʼita thalaytawan, jatunmanta qhaparerqa. Chantá chay runamanta “llojserqa mana imanaspalla” (Lucas 4:35). Tukuy runastaj mayta tʼukuspa ninakorqanku: “¿Imataj kayri?”, nispa. Chantá nillarqankutaj: “Payqa supaykunata qharqonanpaj atiyniyoj, supaykunataj payta kasunku”, nispa (Marcos 1:27). Jesuspa ruwasqantaj, chay ratopacha tukuynin Galilea jallpʼapi uyarikorqa.

Sinagogamanta llojsiytawan, Jesusqa yachachisqasninwan khuska Pedroj wasinman rerqa. Chaypitaj Pedroj suegran calenturawan onqosqa kashasqanta willarqanku. Chantá Jesusmanta mañakorqanku payta sanoyachinanta. Jesustaj Pedroj suegranman qayllaykuytawan, makinmanta aysarispa sayaricherqa, calenturantaj chinkaporqa. Chantá Pedroj suegranqa paykunapaj waykʼorqa.

Inti chinkaykushajtinña, llajtantinmanta runas onqosqasninkuta Jesusman pusamorqanku. Pedroj wasi punkonqa runamanta juntʼa kasharqa. Jesustaj “sapa ujta sanoyacherqa makisninta paykunaman churaykuspa” (Lucas 4:40). Payqa tukuy rijchʼaj onqoyniyoj runasta thañicherqa. Ajinamantataj profeta Isaiaspa nisqan juntʼakorqa (Isaías 53:4). Chantapis Jesusqa, ashkha runasmanta supaykunata qharqorqa. Supaykunataj runasmanta llojserqanku, kay jinata qhaparispa: “Qanqa Diospa Wawan kanki”, nispa (Lucas 4:41). Jesustajrí chay supaykunata kʼamerqa, nitaj parlajta saqerqachu. Imajtinchus paykunaqa Cristo kasqanta yacharqanku. Jesustaj mana munarqachu runas yuyanankuta, chay supaykuna Diosta sirvisqankuta.