Ñanta allinchaj nacekun

Mariaqa kinsa killata jina Elisabetwan qhepakorqa. Chantá llajtan Nazaretman kutiporqa. Chay llajtaqa Elisabetpa wasinmanta karupi kasharqa. Chaymanta sojta killanmantaj, Mariapis wawitayoj kanan karqa. Elisabetrí jatun onqojña kasharqa.

María ripusqanmanta pisi tiemponmantaj, Elisabetqa wawitanta nacechikorqa. Paypis, wawitanpis sanitos kasharqanku. Chayrayku Elisabetwan Zacariaswanqa, mayta kusikorqanku. Vecinosninku, familiaresninkupis, wawitata rikuspa kusikullarqankutaj.

Diosninchejqa israelitasman uj Leyta qorqa. Chay Leypitaj kamacherqa, qhari wawitasta nacekusqankumanta pusaj pʼunchayninman circuncidanankuta. Israelitasqa qhari wawitasninkuta circuncidaj kanku, jispʼanitanpa puntitanmanta qaritanta khuchurparispa. Chantapis paykunaqa chay diallataj wawitaman sutita churaj kanku (Levítico 12:2, 3). Zacariaspa wakin familiasnenqa, wawitanman Zacarías sutita churayta munarqanku. Elisabettajrí nerqa: “Mana. Wawayqa Juan sutikonqa”, nispa (Lucas 1:60). Yachakorqanchej jina, ángel Gabrielqa Elisabetpa qosanman nerqa wawitanqa Juan sutikunanta.

Jinapis runasqa Elisabetman nerqanku: “Mana pipis familiaykipi chay sutiyojqa kanchu”, nispa (Lucas 1:61). Chayrayku Zacariastañataj señaswan taporqanku, ima sutitachus wawanman churayta munasqanta. Zacariastajrí uj tablitata mañakuspa qhelqarqa: “Sutenqa Juan kanqa”, nispa (Lucas 1:63).

Chay ratopacha, Zacariasqa watejmanta parlarerqa. Yachakorqanchej jina, Zacariasqa opayaporqa ángel Gabrielta mana creesqanrayku. Runasqa Zacariasta parlajta uyarispa, mayta tʼukorqanku. Paykunapurataj ninakorqanku: “¿Chantá imayna runapunitaj chay wawa kanqari?”, nispa (Lucas 1:66). Ajinapi repararqanku, Zacariaspa wawitanman Diospuni Juan sutita churasqanta.

Chaymanta Zacariasqa, Diospa atiyninwan juntʼa kaspa nerqa: “Jatunchasqa kachun Israelpa Jehová Diosnenqa, payqa llajtanta khuyakuspa kacharichenqa. Kamachin Davidpa familianmantataj atiyniyoj salvajta sayarichipuwanchej”, nispa (Lucas 1:68, 69). Zacariasqa ‘atiyniyoj salvajmanta’ parlaspa, Señorninchej Jesusmanta parlasharqa, pichus chaypacha niraj nacekusharqachu, chaymanta. Pay nerqa: “Diosqa enemigosninchejpa makisninmanta kacharichiwasqanchejtawan, mana manchachikuspa yupaychananchejta saqewasunchej, ajinamanta kausashaspa payta mana wasanchananchejpaj, cheqan kajtataj ruwananchejpaj”, nispa (Lucas 1:74, 75).

Chantá Zacariasqa wawitanman nerqa: “Qantajrí wawitáy, Aswan Patapi kaj Diospa profetan kanki. Jehová Diospa ñaupaqenta rinki ñanninta allinchanaykipaj, llajtanmantaj rejsichinaykipaj, Diosqa juchasninkuta pampachaspa salvananta jatun khuyakuyninrayku. Chay khuyakuynintaj cielomanta kʼanchamuwasun, imaynatachus inti sutʼiyayta kʼanchamun ajinata, kʼanchayta qonanpaj laqhapi tiyakojkunaman jinallataj wañuypa llanthunpi kajkunamanpis. Chay kʼanchayqa rikuchiwasun imatachus ruwananchejta sonqo tiyasqa kausakunapaj”, nispa (Lucas 1:76-79). Zacariaspa nisqanqa, maytachá runasta kusicherqa.

Chaykamataj Mariaqa Nazaret llajtanman chayaporqaña. Jinapis chaypachaqa niraj casarasqachu kasharqa, nitaj pi llajta masinpis onqoj kashasqanta yacharqachu.