LECCIÓN 02

Bibliaqa sumaj kausaymanta parlan

Imprimisqapi

Tukuy runas problemasniyoj kanchej. Chaytaj phutichiwanchej, llakichiwanchej chayri sonqonchejta nanachiwanchej. Ichá qanpis onqosqa kasqaykirayku chayri pi familiaykipis wañupusqanrayku llakisqa kashanki. Ichá ninki: “¿Maykʼajllataj kay llakiykuna tukukonqari?”, nispa. Bibliaj nisqanqa mayta sonqochawanchej.

1. ¿Imatá Biblia willawanchej?

Bibliaqa willawanchej imaraykuchus kay mundopi llakiykuna, problemas ima kasqanta. Chantapis willawanchej tukuy chay llakiykuna tumpamantawan chinkananta. Bibliaqa nillawanchejtaj ‘aswan qhepaman allin kausay kananta’ (Jeremías 29:11, 12 leey). Chayta yachayqa llakiykunata aguantanapaj yanapawanchej. Yanapallawanchejtaj kay tiempopiña kusisqa kausakunanchejpaj. Chantapis willawanchej wiñaypaj kusisqa kausakunanchejta.

2. ¿Imas kanantataj Biblia willawanchej?

Bibliaqa willawanchej aswan qhepaman ‘manaña wañuy kananta, nitaj llakiypis, nitaj waqaypis, nitaj nanaypisʼ (Apocalipsis 21:4 leey). Chay tiempopeqa manaña imamantapis llakikusunchu. Manaña pobre runas kanqankuchu. Onqoykunapis wañuypis chinkanqa, tukuypajtaj justicia kanqa. Bibliaqa willallawanchejtaj kay jallpʼanchej uj kʼachitu paraisoman tukunanta. Chaypitaj runasqa wiñaypaj kusisqas kausakonqanku.

3. ¿Imaynatá yachasunman Bibliaj nisqan juntʼakunantapuni?

Bibliaj nisqan juntʼakunanta yachanapajqa, Bibliata ‘allinta estudiana’ tiyan (Hechos 17:11). Ashkha runasqa kausay allinyananta piensanku. Jinapis mana yachankuchu ajinapunichus manachus kananta. Bibliaj nisqanwantajrí mana ajinachu. Chayrayku Bibliata estudiananchej tiyan. Chayta ruwaspaqa, noqanchejpuni yachasun Bibliaj nisqan juntʼakunantachus manachus.

ASTAWAN YACHAKUNA

Kaypi yachakusun Biblia sumaj kausaymanta parlasqanta. Chantá yachakullasuntaj imaynatachus chayta yachay wakin runasta yanapashasqanta.

Dibujos: Kay dibujospi rikukun imaynatachus kay tiempopi runas kausakushasqankuta, imaynatachus jamoj tiempopi kausakunankuta ima. Sapa dibujo aswan urapi rikhurillantaj.

4. Biblia nin llakiykuna chinkananta, wiñaypaj kusisqa kausakunatapis

Kay urapi rikhurej listasta leeriychej. Chantá yachakojta tapuriy: ¿Mayqentaj astawan gustasunki? ¿Imaraykutaj chay gustasunki?

Chantá tukuynin versiculosta leeriychej. Chaymantataj yachakojta tapuriy:

Kay versiculospi nisqan, ¿sonqochasunkichu? Familiaresniykita chayri rejsisqasniykita, ¿sonqochallanmantajchu?

Kausayqa kay jina kanqa:

NI PI	TUKUYPIS
Ni pi llakiymanta waqasunñachu, nitaj viejoyasunchu, nitaj wañusunchu (Isaías 25:8).	Tukuypis wañusqa familiaresninchejwan watejmanta tinkukapusun. Paykunaqa paraisopi kausarimonqanku (Juan 5:28, 29).
Ni pi onqosunñachu, nitaj cojitos, cieguitos, joqʼaritas, opitaspis kanqachu (Isaías 33:24; 35:5, 6).	Tukuypis sanitos kasun, jovenyapusuntaj (Job 33:25).
Ni pi justiciata mañakuspa purisunñachu (Isaías 32:16, 17).	Tukuypis ashkha mikhunayoj kasun, kʼachitu wasiyoj, sumaj trabajoyoj ima (Salmo 72:16; Isaías 65:21, 22).
Ni pi guerrasrayku, chʼajwasrayku sufrisunñachu (Salmo 46:9).	Tukuypis ni ima llakiyniyoj allinta kausakusun (Salmo 37:11).
Ni pi llakiykunasninchejta yuyarikusunñachu (Isaías 65:17).	Tukuypis kʼachitu jallpʼapi wiñaypaj kausakusun (Salmo 37:29).

Wasa ladopi uj wawita onqosqa kashan. Ñaupajpitaj chay wawita mamanpa marqʼayninpi sanito kashan.

Wasa ladopi uj viejito ñakʼayta purikushan. Ñaupajpitaj chay viejitoqa joven kashan, uj carretillapitaj verdurasta apashan.

5. Biblia allin kausaymanta parlasqan mayta yanapawanchej

Ashkha runasqa kay mundopi problemas kasqanrayku mayta llakikunku, wakintaj rabiakunku. Chayrayku wakin runasqa chay problemasta allinchanankupaj tukuy imata ruwanku. Jinapis nipuni allinchayta atinkuchu. Biblia allin kausaymanta parlasqanqa, ashkha runastaña yanapashan. Imaynatachus yanapashasqanta yachanapaj VIDEOTA qhawariychej, chantá yachakojta tapuriy:

VIDEO: Justicia kananta munarqa (4:07)

Fotos: “Justicia kananta munarqa” nisqa videomanta fotos. 1) Rafikaqa wawitallaraj kashan, waj runaswan khuskataj algodonta orqhoshan. 2) Rafikaqa ñaupaj asambleanpi kashan. Payqa tukuy laya hermanos ujchasqa kasqankuta rikuspa kusisqa kashan.

Kay videopi rikusqanchejman jina, ¿imatataj Rafika mana allinpajchu qhawasqa?
Bibliaj nisqan, ¿Rafikata yanaparqachu?

Bibliaj nisqanpi creeyqa, manaña llakikunapaj yanapawanchej. Chantapis llakiykunasninchejta kusiywan aguantanapaj yanapawanchej. Proverbios 17:22; Romanos 12:12 leeriychej. Chantá yachakojta tapuriy:

Biblia allin kausaymanta parlasqan, ¿kausayniykipi yanapasunkimanchu? ¿Imaynasmantataj yanapasunkiman?

WAKIN RUNAS NINKU: “Biblia allin kausaymanta parlasqanqa ni juntʼakunmanchu”, nispa.

Qanrí, ¿imatá niwaj? Bibliaj nisqan juntʼakunantachus manachus yachananchej, ¿yanapawasunmanchu?

¿IMASTÁ YACHAKUNCHEJ?

Kaypi yachakunchej Bibliaqa kusiy kausay kananmanta parlasqanta. Chayta yachayqa mayta kusichiwanchej, llakiykunasninchejta aguantanapajpis yanapawanchej.

Yuyarikunapaj

Biblia allin kausaymanta parlasqan, ¿runasta yanapanmanchu?
¿Imayna kausay kanantataj Biblia niwanchej?
Biblia allin kausay kananta nisqan, ¿kay tiempopi yanapawasunmanchu?

Estudiayta tukusqayki diata anotakuy:

Tarea

Bibliaj nisqasninta mana qonqanaykipaj, kay leccionmanta versiculosta watejmanta leeriy.

Waj tareas:

Your other goal

ASTAWAN YACHAKUNAYKIPAJ

¿Imaynatá allin imaspi yuyay yanapawasunman? Chayta yachanaykipaj kayta leeriy.

“¿Sumaj kausay kananta creesunmanchu?” (¡Despertad!, 22 de abril de 2004)

Onqoykuna chinkananta yachayqa, sinchʼi onqosqasta mayta yanapan. Imaynatachus yanapasqanta yachanaykipaj kayta leeriy.

“¿Biblia yanapawasunmanchu onqosqa kashajtinchej?” (Chaytaqa Internetpi jw.org nisqapi tarinki)

Kay musicayoj videota qhawarishaspaqa, mosoj jallpʼapi familiaykiwan khuska kashasqaykipi piensariy.

Sonqoyqa mosoj pachapi (3:37)

Biblia allin kausaymanta parlasqanqa, chʼajwasta jatarichej runata yanaparqa. Imaynatachus yanapasqanta yachanaykipaj kayta leeriy.

“Manaña chʼampaykunarayku maqanakunichu” (Torremanta Qhawaj, 1 de julio de 2013)