Cristiano Kausayninchej tantakuypaj referencias
2-8 DE OCTUBRE
BIBLIAMANTA SUMAJ YACHACHIYKUNA | DANIEL 7-9
“Profeta Danielqa maykʼajchus Mesías chayamunanta willarqa”
(Daniel 9:24) Qankuna israelitaspaj, Diospa santo llajtampaj ima qanchis chunka semanas pasananku tiyan, Diospa contranta oqhariykuna, juchallikuypis tukukunampaj, juchamanta perdonta tarinapaj, wiñaypajtaj cheqan kajta sayarichinapaj. Ajinamanta mosqoypi jina rikusqasniyki, profetaspa willasqasninku ima juntʼakonqa, santo kajtaj jawisqa kanqa.
it-2-S pág. 1017 párr. 6
Setenta semanas
Diospa contranpi oqharikuy, juchallikuypis tukukun. Jesús wañusqanrayku, kausarimusqanrayku, cieloman kutirisqanrayku ima, Diospa contranpi oqharikuy, juchallikuypis tukukonqa, juchasninchejmantataj perdonasqas kasunchej (Daniel 9:24). Leypa tratonqa judiospa juchasninkuta sutʼiman orqhorqa, juchacharqataj, mana Leyta kasukusqankuraykutaj llakiypi rikukorqanku. Jinapis runas mayta juchallikojtinku, Diosqa astawanraj jatun khuyakuyninta Mesiasnejta rikucherqa (Ro 5:20). Jesús wañusqanrayku Diospa contranpi oqharikojkuna, juchasninkumanta tukuy sonqo pesachikojkunapis perdonasqas kayta atinku.
(Daniel 9:25) Kayta yachay, unanchaytaj: Jerusalén llajta watejmanta ruwakunampaj kamachisqa kanqa, chay ratomantapacha Kamachej Mesías chayamunankamaqa qanchis semanas kanqa. Chantá Jerusalenpa callesnin, muyuynimpi perqasnimpis watejmanta ruwasqas kanankamataj, sojta chunka iskayniyoj semanas kanqa. Chaywampis manchay llakiy pʼunchaykuna kanqa.
it-2-S pág. 1016 párr. 5
Setenta semanas
Mesías chayamun sojta chunka jisqʼonniyoj semanas pasasqantawan. Sojta chunka iskayniyoj semanasqa 7 semanas pasasqantawan qallarinan karqa (Da 9:25). Chayrayku “Jerusalén llajta watejmanta ruwakunampaj” kamachikusqan ratomantapacha, Mesías chayamunankamaqa 7 semanas chantá 62 semanaspiwan kanan karqa. Nisunman 69 semanas chayri 483 watas pasanan karqa. Chaytaj karqa Jesús niraj jamushajtin 455 watamanta, Jesús jamusqanmantaña 29 watakama. Jesusqa 29 watapi septiembre chayri octubre killas chaynejpi bautizakorqa. Chaypitaj espíritu santowan ajllasqa karqa, “Kamachej Mesías” jinataj predicayta qallarerqa (Lu 3:1, 2, 21, 22).
(Daniel 9:26, 27a) Chay sojta chunka iskayniyoj semanas qhepata chay Mesiasta wañuchenqanku. Uj rey jamuspa, Jerusalén llajtata, jinallataj Templotapis runasninwan thuñiykuchenqa. Tukukoyqa usqhayllata chayamonqa, jatun mayu yaku jina. Chay tukukuykama kallanqapuni wañuchinaku maqanakuykuna, phirinakuy ima, nisqa kasqanman jina. 27 Uj semanatawan, chay reyqa tratota ruwanqa ashkha runaswan. Chawpi semanapitajrí uywa wañuchisqa qʼolachisqa jaywanata, ofrenda qonatapis sayachenqa.
it-2-S pág. 1017 párr. 1
Setenta semanas
Chaupi semanapi Mesías “wañuchisqa karqa”. Ángel Gabrielqa Danielman nerqa: “Chay sojta chunka iskayniyoj semanas qhepata chay Mesiasta wañuchenqanku”, nispa (Da 9:26). Chay 69 semanas pasasqanmanta pisi tiemponman, nisunman kinsa wata khuskanninman jina, Jesucristota uj rakhu kʼaspipi wañucherqanku, ajinamanta kausayninta tukuy runasrayku qorqa (Isa 53:8). Jesusqa kinsa wata khuskanniyojta runasman predicarqa. Uj kuti ichapis 32 watapi septiembre octubre killas chaynejpi, Israel llajtata higo sachʼawan kikincharqa, chay sachʼaqa kinsa watata jinaña mana poqosqachu (Mt 17:15-20; 21:18, 19, 43 kikinchay). “Huertata qhawajtaj nisqa: ‘Patronníy, kay watatawan kallachunraj ari. Noqaqa sachʼaj muyuyninta allaspa wanuchaykurisaj. Poqojtenqa allin kanqa, mana poqojtintaj kʼuturparichinki”, nispa (Lu 13:6-9). Ichapis chaypeqa mana uyariyta munaj llajtaman kinsa watataña predicasqanmanta parlasharqa, jinapis khuskan watatawanraj predicanan karqa.
it-2-S pág. 1017 párr. 4
Setenta semanas
Khuskan semanaqa 7 wataspa khuskannin. Kay 70 kaj semanaqa 29 watapi Jesús bautizakushajtin, espíritu santowantaj ajllasqa kashajtin, septiembre octubre killas chayta qallarerqa. Chaymantapacha 33 watapi marzo abril killaskamataj kinsa wata khuskanniyoj pasarqa, nisunman 33 watapi Pascua tiempokama (14 de Nisán). Calendario gregoriano nisqanman jinataj, ichapis chayqa karqa 1 de abril 33 watapi (J.j.). (CENA DEL SEÑOR [Cuándo se instituyó] nisqata qhawariy). Apóstol Pablo nerqa Jesusqa Tatanpa munayninta ruwaj jamusqanta, Leyman jina uywa wañuchisqasta, jaywanasta ima chinkachinanpaj, chaytataj ruwarqa kausayninta qospa (Heb 10:1-10).
Sumaj yachachiykunata maskʼana
(Daniel 9:24) Qankuna israelitaspaj, Diospa santo llajtampaj ima qanchis chunka semanas pasananku tiyan, Diospa contranta oqhariykuna, juchallikuypis tukukunampaj, juchamanta perdonta tarinapaj, wiñaypajtaj cheqan kajta sayarichinapaj. Ajinamanta mosqoypi jina rikusqasniyki, profetaspa willasqasninku ima juntʼakonqa, santo kajtaj jawisqa kanqa.
w01-S 15/5 pág. 27
Leejkunaj tapuyninku
Daniel 9:24 versículo nisqanman jina, ¿maykʼajtaj “Santo” kaj ajllasqa karqa?
Daniel 9:24-27 versiculospi profeciaqa “Kamachej Mesías” Jesucristo rikhurinanmanta parlan. Chayrayku “Santo kajtaj jawisqa kanqa” nispaqa mana Jerusalén temploj aswan santo lugarninmantachu parlashan (Santisimo). “Santo kaj” palabrawanqa cielopi Diospa kamachina lugarninmanta, nisunman Diospa mana rikukoj templonmanta parlashan (Hebreos 8:1-5; 9:2-10, 23).
¿Maykʼajmantapachataj Diospa mana rikukoj templon sayachisqa karqa? Jesús 29 watapi bautizakushajtin imachus kasqanmanta parlarina. Bautizakusqanmantapacha imatachus Salmo 40:6-8 nisqan juntʼakuyta qallarerqa. Apóstol Pablotaj aswan qhepaman nerqa imatachus Jesús Tatanman uj mañakuypi nisqanta. Pay nerqa: “Uywa wañuchisqasta, jaywanastapis mana munarqankichu. Chaywanpis uj cuerpota wakichipuwarqanki”, nispa (Hebreos 10:5). Jesusqa yacharqa Jehová Diosninchej Jerusalén templopi uywa wañuchisqasta jaywanata manaña munasqanta. Chayrayku Jehovaqa mana juchayoj cuerpota wakicherqa uj jaywanata jina qonanpaj. Jesús tukuy sonqo nerqa: “Kaypi kashani, Diosmanta Qhelqasqapi nisqanman jina Diosníy, tukuy sonqo munayniykita ruwayta munani”, nispa (Hebreos 10:7). ¿Imatá Jehová kuticherqa? Mateo libropi nin: “Jesusqa bautizachikuytawan, yakumanta llojserqa, cielotajrí kicharikorqa, Diospa atiynintataj palomata jina paypa patanman uraykamojta rikorqa. Jinallapi cielomanta Dios nimorqa: “Kaymin munasqa Wawayqa, paytaqa allinpaj qhawani”, nispa (Mateo 3:16, 17).
Jehová Dios Jesuspa cuerponta uj jaywanata jina japʼisqanqa, Jerusalén templopi altarmanta nisqa aswan sumaj kasqanta rikuchin. Jesús mana juchayoj cuerponta uj jaywanata jina noqanchejrayku qosqanqa Diospa munaynin karqa (Hebreos 10:10). Jehová Diosqa Jesusta espíritu santowan ajllaspa, mana rikukoj templonta sayaricherqa. Jesús bautizakusqanmantapachataj, cielopi Diospa kamachina lugarninta “Santo” kajta jina ajllakorqa, Diospa mana rikukoj templonpi.
(Daniel 9:27) Uj semanatawan, chay reyqa tratota ruwanqa ashkha runaswan. Chawpi semanapitajrí uywa wañuchisqa qʼolachisqa jaywanata, ofrenda qonatapis sayachenqa. Uywata wañuchisqa qʼolachina altarpa ñawpaqempi ashkha millay imasta ruwanqanku, imachus ruwakunampaj nisqaña karqa, chayqa, millay imasta ruwachejpa patanman urmamunankama.
w07-S 1/9 pág. 20 párr. 4
Daniel libromanta wakin allin yachachiykunas
9:27. ¿Mayqen tratotaj 70 semanas tukukuykama chayri 36 watakama kallarqapuni? Abrahanwan ruwakusqan trato karqa, nitaj Leypa tratonchu. Imaraykuchus Leypa tratonqa 33 watapi Jesuspa wañuyninwan tukukorqa. Abrahanwan ruwakusqan tratotaj israelitaspaj 36 watakama kallarqapuni. Imaraykuchus Jehovaqa judiosta Abrahanpa miraynin kasqankurayku llajtanpaj qhawallarqapuni. Chantapis chay tratoqa Diospa llajtan Israelpa, nisunman ajllasqa cristianospaj valeshallanpuni (Gálatas 3:7-9, 14-18, 29; 6:16).
Bibliata leenapaj
(Daniel 7:1-10) Este versículo está unido al siguiente. 2 Uj tuta, Belsasar ñawpaj watata Babiloniapi rey kashajtin, Danielqa mosqoypi jina ashkha imasta rikorqa. Rijchʼarispataj, chay ratopacha qhelqarqa mosqoypi jina rikusqasninta. Kaymin chay qhelqasqanqa: Noqa rikorqani mosqoyniypi, tawantin wayras phukumuspa, jatun qochapi kaj yakusta qhollchoqeyachejta. 3 Kaymanta jina, tawa jatuchaj animales, sapa uj waj rijchʼayniyoj, chay jatun qochamanta llojsiramorqanku. 4 Ñawpaj kajqa leonman rijchʼakorqa, lijrasnintaj ankajta jina karqa. Qhawashajtillayraj, lijrasnenqa sikʼirasqa karqanku, paytaj pampamanta oqharisqa karqa. Chantá iskay chakimanta sayarichisqa karqa, runa jina, runa sonqotaj payman qosqa karqa. 5 Qhepa kaj animalqa jukumariman rijchʼakorqa; ujnin ladonqa aswan alto karqa ujnin ladonmantaqa. Kirusnin chawpipi kinsa wajtanes kasharqa, uyarerqanitaj payman nishasqankuta: Jatarikuspa riy, atisqaykita aychata mikhumuy, nispa. 6 Kinsa kaj animalqa rijchʼakorqa chʼejchi leonman, wasampitaj tawa lijrasniyoj karqa. Chantapis tawa umasniyoj karqa, paymantaj atiy qosqa karqa. 7 Tawa kaj animalta rikorqani, chaytaj ancha mancharina jina karqa, manchachikunapaj jinapuni, manchay kallpayojtaj. Kirusnenqa fierromanta karqanku, jatuchajtaj. Tukuy imata mikhukapoj chhikan chhikanta mithaspa, puchojtataj saruraj. Mosqoyniypi rikorqani chaykunamanta kay kajqa waj laya animalpuni kasqanta. Umampis chunka wajrasniyoj karqa. 8 Chay wajrasta qhawashaspa, rikorqani aswan juchʼuy wajritata pʼutumojta chay ujkunaj chawpinkumanta, chantá kinsa wajras sikʼirasqa kasqanta, chay juchʼuy wajrita chaypi kanampaj. Chay juchʼuy wajritaj ñawisnintaj runaj ñawisninman rijchʼakorqanku, siminwantaj jatun imasta parlaj runaykachaspa. 9 Esta unido al siguiente versículo. 10 Qhawallarqanipuni, kamachina tiyanas churasqa kanankukama. Chantá Machu Runaqa tiyarikorqa. Paypa pʼachan ritʼi jina yuraj karqa, umampi kaj chujchantaj yuraj ritʼi millma jina karqa. Kamachina tiyanaj ruedasnimpis larwaj nina jina karqanku, ñawpaqenmantataj uj nina mayu llojserqa. Waranqa waranqastaj payta sirverqanku, millones millonestaj paypa ñawpaqempi sayarasharqanku. Chay juezqa tiyaykorqa juzgayta qallarinampaj, librostaj kicharisqas karqanku.
9-15 DE OCTUBRE
BIBLIAMANTA SUMAJ YACHACHIYKUNA | DANIEL 10-12
“Jehovaqa reyes rikhurinanta nerqa”
(Daniel 11:2) Kunantaj cheqa kajta rejsichisqayki: Kinsa reykunawanraj Persiapi kamachenqanku. Chaykunamanta qhepata tawa kaj rey kamachenqa. Payqa aswan qhapaj kanqa chay ñawpaj kinsa reykunamantaqa. Maypachatajchus qhapaj kasqanwan atiyta tarenqa chaypacha, tukuy runasta enqhaykonqa Grecia reinoj contrampi oqharikunankupaj.
dp-S págs. 212, 213 párrs. 5, 6
Iskay reyes
5 Ñaupaj kaj kinsa reyesqa karqanku Ciro el Grande, Cambises II, Darío I ima. Bardiyaqa ichapis atiyninwan kamachej yaykoj Gaumata karqa jinapis 7 killasllata kamacherqa, chayrayku Danielpa profecianqa mana paymantawanchu parlashan. Kinsa kaj rey Darío I, Jesús niraj jamushajtin 490 watapi Grecia llajtata watejmanta chinkachiyta munarqa, jinapis mana atiparqankuchu manaqa llakiyta atipachikuspa Asia Menorman ayqerqanku. Tawa watanman Darioqa watejmanta wakichikusharqa Grecia llajatata chinkachinanpaj, jinallapitaj wañuporqa. Chaymantataj paypa cuentanmanta “tawa kaj” rey yaykorqa, chaytaj wawan rey Jerjes I karqa. Payqa Esterpa qosan rey Asuero karqa (Ester 1:1; 2:15-17).
6 Jerjes I tukuy runasta tanqarqa Grecia reinoj contranpi oqharikunankupaj. The Medes and Persians libro nin: “Kamachiyninpi llankʼajkunata uyarispa, Jerjesqa tukuy soldadosninta Greciaj contranpi maqanakunankupaj jallpʼanta, mama qochanta ima kachaykorqa”, nispa. Jesús niraj jamushajtin 401 a 500 watas chaynejmanta Greciamanta qhelqaj Heródoto qhelqarqa: “Jerjes Gresiaj contrampi maqanakunanpaj soldadosta wakichisqanqa tʼukunapaj jina karqa”. Chayrayku qhelqasqanpi nin: “Mama qochanta rejkunaqa quinientos diecisiete mil seiscientos diez soldados karqanku. Chantá chakipi rejkuna un millón setecientos mil soldados karqanku, caballospi rejkunataj ochenta mil. Chantapis camellospi purejkuna árabes, libiomanta carretasta apajkuna ima veinte mil karqanku. Tukuynin maqanakoj rejkunaqa dos millones trescientos diecisiete mil seiscientos diez soldados karqanku”, nispa.
(Daniel 11:3) Chay qhepata manchayta maqanakoj rey rikhurenqa; jatun nacionta kamachenqa, munasqantataj ruwanqa.
dp-S pág. 214 párr. 8
Iskay reyes
8 Ángel Gabriel Danielman nerqa: “Chay qhepata manchayta maqanakoj rey rikhurenqa; jatun nacionta kamachenqa, munasqantataj ruwanqa”, nispa (Daniel 11:3). Alejandro Magnoqa Jesús niraj jamushajtin 336 watapi, 20 watasniyoj Macedoniapi kamachiyta qallarerqa, “manchayta maqanakoj” reymantaj tukorqa. Alejandro Magnoqa tatan Filipo II imatachus ruwayta munasqanman jina, Persiaj kʼoñi jallpʼasninta japʼikaporqa. Paypa 47.000 maqanakoj runasnenqa Éufrates, Tigris mayusta pasaspa Gaugamelaman chayarqanku, chaypitaj Darioj (Darío III) 250.000 soldadosninta chʼeqeracherqanku. Dariopis ayqekullarqataj jinapis aswan qhepanejman wañucherqanku. Ajinamanta Persiaqa chinkachisqa karqa, Greciataj may atiyniyoj suyuman tukorqa, Alejandro Magnotaj chay jatun nacionta kamachispa munayninta ruwarqa.
(Daniel 11:4) Paypa reinon sumaj sayachisqaña kaspa, tʼustisqa kanqa, tawamantaj tʼaqasqa kanqa. Chay reypa atiynenqa mirayninman mana qosqachu kanqa, manataj jatun nacionnimpis chhika atiyniyojchu kanqa ñawpajta jinaqa. Reinoqa paymanta qhechusqa kanqa, wajkunañataj kamachenqanku paypa cuentanmanta.
dp-S pág. 215 párr. 11
Iskay reyes
11 Alejandro Magno wañupusqantawan kamachiynenqa tawaman tʼaqasqa karqa. Soldadosnenqa maqanakorqanku japʼikapusqan jallpʼasta partinakuyta munaspa. Antígono I atiyniyoj reyqa Alejandroj cuentanmanta kamachiyta munarqa, jinapis Frigiapi, Ipsos maqanakupi atipachikorqa. Kay 301 (J.n.j.) watapi, Alejandroj japʼikapusqan jallpʼasta tawa sojdadosnin kamachisharqanku. Casandro kamachisharqa Macedoniata, Greciatawan. Lisímaco kamachisharqa Asia Menorta, Traciatawan. Seleuco I Nicátor kamachisharqa, Mesopotamiata, Siriatawan. Tolomeo Lagotaj Egiptota, Palestinatawan. Danielpa profecian nisqanman jina Alejandro Magnoj kamachiynenqa tawaman tʼaqakorqa.
Sumaj yachachiykunata maskʼana
(Daniel 12:3) Yachayniyoj runasqa cielo jina lliphipirenqanku, ashkha runasman cheqa kajta yachachejkunataj wiñaypaj lliphirenqanku chʼaskas jina.
w13 15/7 pág. 13 párr. 16, sutʼinchaynin
“Yachaychej, Noqa Qankunawan Tuta Pʼunchay Kasqayta”
Daniel 12:3 nin: “Yachayniyoj runasqa [ajllasqa cristianos] cielo jina lliphipirenqanku”, nispa. Paykunaqa Jallpʼapiraj kashaspa, willasqankunejta lliphipinku. Chaywanpis, Mateo 13:43 versiculoqa Tatankoj Reinonpi lliphipinankumanta parlashan. Ñaupajtaqa iskaynin textos runasman willakusqanwan ninakusqanta yuyakoj.
(Daniel 12:13) Qantaj, Daniel, purillaypuni tukukuykama, chantá samarikunki. Qhepa pʼunchaykunapitaj jatarikunki tʼinkaykita japʼikapunaykipaj.
dp-S pág. 315 párr. 18
Jehová Diosqa Danielman kausarimunanta nerqa
18 Daniel libroqa Jehová Dios uj sumaj suyakuyta Danielman nisqanwan tukukun. Jehovaj angelnenqa Danielman nerqa: “Jatarikunki tʼinkaykita japʼikapunaykipaj”, nispa. ¿Imatá chaywan niyta munasharqa? Samarikunki nispaqa wañupunanta nisharqa, jatarikunki nispataj Daniel kausarimunanta nisharqa. Bibliamanta ashkha yachaj runasqa ninku, hebreo qhelqasqaspi Daniel 12 capitulopi wañusqas kausarimunankumanta aswan sutʼita parlasqanta (Daniel 12:2). Jinapis chay runaspaj nisqankoqa mana cheqachu, imaraykuchus Danielqa sutʼita yacharqa runas kausarimuyta atisqankuta.
Bibliata leenapaj
(Daniel 11:28-39) Wichay ladomanta kaj rey llajtanman kutiriponqa, ashkha imasta aparisqa. Chantá santo kaj trato ruwasqaj contranta sayarenqa. Yuyaychakusqanta juntʼanqa, chantataj llajtanman kutiriponqa. 29 Señalasqa rato chayamojtin, chay reyqa ujtawan soldadosninwan puririllanqataj uray ladopi kaj reypa contrampi. Chay maqanakupitajrí, mana ñawpajta jina atipayta atenqachu. 30 Inti yaykuynej ladomanta soldados barcospi jamuspa, paypa contrampi yaykuykamonqanku, wichay ladomanta kaj reypa soldadosnintaj manchachikuspa, ayqenqanku. Chantá wichay ladomanta kaj reyqa may santo tratoj contrampi phiñakonqa, kutirimonqataj chay tratomanta tʼaqakorqanku, chaykunapi atienekuspa. 31 Paypa soldadosnenqa Diospa Templonta chʼichichanqanku, jinallataj sinchʼi jarkʼachasqa wasistapis. Diosman sapa pʼunchay jaywana kajtapis sayachenqanku. Aswampis uj millay lantita chayman churanqanku. 32 Reyqa miskʼi palabrasllawan, pikunachus Diospa trato ruwasqanta pʼakerqanku, chaykunajta sonqosninkuta suwanqa. Diosta munakojkunatajrí cheqampi sayanqanku, maychus kajta ruwaspa. 33 Runas ukhupi yachayniyojkunaqa ashkha runasta yachachenqanku. Chay yachayniyojkunatatajri wakinta wañuchenqanku, wakintataj ruphachenqanku, wakinmantataj kapuyninkuta suwanqanku, wakinkunataj waj nacionesman presos apasqa kanqanku. Chaywampis chayqa pisi tiempollapaj ajina kanqa. 34 Urmanqanku chaypachaqa, uj pisita yanaparisqas kanqanku, ashkhastaj paykunawan ujchakonqanku waj yuyayllawan. 35 Yachayniyojkunamanta wakinkuna qhatiykachasqasllataj kanqanku. Ajina ñakʼariynejta paykunaqa llimphuchasqas, sumajyachisqas, yurajyachisqastaj kanqanku, tukukuypaj wakichisqa hora chayamunankama. 36 Wichay ladomanta kaj reyqa tukuy ima munasqanta ruwanqa. Jatunchakuynenqa maypuni kanqa. Tukuy dioskunajpata kurajninku kasqanta yuyakonqa. Cheqa Kaj Diospa contranta manchay sajrata parlanqa. Tukuy imataj paypajqa allin renqa, Dios paypaj castigota apachimunankama. Diosqa, imaynatachus ruwanan karqa, chaytaqa juntʼanqapuni. 37 Chay reyqa ñawpa tatasnimpa diosninkuta mana kasuta ruwanqachu, ni warmispa munasqa diosninkuta, nillataj waj dioskunatapis kasonqachu. Paylla tukuyninkoj kurajninku kasqanta yuyakonqa. 38 Aswanqa, sinchʼi jarkʼachasqa wasispa diosninta yupaychanqa. Mayqentachus ñawpa tatasnin manapuni yupaycharqankuchu, chay diosta yupaychanqa. Chay diosmantaj jaywanqa qorita, qolqeta, kʼacha valorniyoj rumista, ashkha valorniyoj imastawan. 39 Pakakunapaj sinchʼi jarkʼachasqa wasista waqaychanampajqa pay minkʼanqa waj llajtamanta kaj lantita yupaychaj runasta. Pikunachus payta yupaychanqanku, chay runasta jatumpaj qhawachenqa, kuraj kamachejkuna kanankupajtaj paykunata churanqa. Tʼinkata jina jallpʼasta paykunaman rakʼiranqa.
16-22 DE OCTUBRE
BIBLIAMANTA SUMAJ YACHACHIYKUNA | OSEAS 1-7
“Jehovaqa munakuyniyoj kanata munan. ¿Noqanchejrí?”
(Oseas 6:4, 5) Tata Diosqa nin: Efraín, imatataj qanwan ruwasajri? Judá, qanwampis imatataj ruwasajri? Noqapaj munakuyniykichejqa tutamanta phuyu jinalla, chayri tutamanta chinkaripoj chhulla jinalla. 5 Chayrayku profetasniynejta chhikan chhikanta tʼunarqaykichej, willachimusqaywantaj wañucherqaykichej. Justiciaytaj uj kʼanchayjina llojsimun.
‘Khuyakuyta qhatiqqa, kawsayta tarinqa’
18 Hermanosninchikmanqa, tukuy imapi chiqa munakuyninchikta rikuchinanchik tiyan. Wakin kutispi mana atikuptinpis, munakuywan, kʼacha kaywan imapuni, parlananchik tiyan. Jehovaqa, israelitaspa munakuyninku, kʼacha kayninku ima, “tutamanta chinkaripoj chhulla jinalla” chinkapusqanta rikuspa, sunqunta mayta nanachikurqa (Ose. 6:4, 6). Chaywanpis, kamachisnin tukuy imapi munakuyta, kʼacha kayta ima, rikuchiptinkuqa mayta kusikun, chayraykutaq paykunata yanapan. ¿Imaynamantá?
(Oseas 6:6) Noqaqa munani munakunawaykichejta, manataj uywa wañuchisqasta jaywanallawaykichejtachu. Astawan munani Diosniykichejta jina rejsinawaykichejta, uywa wañuchisqa qʼolachinasmanta nisqaqa.
w07-S 15/9 pág. 16 párr. 8
Oseas libromanta wakin allin yachachiykuna
6:6. Diospa contranpi juchallikullaypuneqa payta mana munakusqanchejta rikuchin. Juchallikullasunpuni chayqa Jehovapaj tukuy ima ruwasqasninchej qhasillapaj kanqa.
w07-S 15/6 pág. 27 párr. 7
Jehovaqa kasukusqanchejta jatunpaj qhawan
7 Jehová Diosqa ñaupa tiempopi llajtanman nerqa, kamachiykunasninta kasukunanku astawan sumaj kasqanta uywasta jaywanankumanta nisqaqa (Proverbios 21:3, 27; Oseas 6:6; Mateo 12:7). ¿Imaraykú chayta nerqa? ¿Manachu payllataj chayta ruwanankuta llajtanman nerqa? ¿Imayna sonqowantaj chay jaywanasta jaywanchej? ¿Imaraykutaj imatapis Jehovapaj ruwanchej? ¿Diosta munakusqanchejraykuchu chayrí Dios mañawasqanchejraykullachu? Diosta tukuy sonqo munakusunchej chayqa, tukuy kamachiykunasninta kasukusun. Diosqa mana uywa wañuchisqasta jaywananchejtachu suyan, jinapis payta tukuy sonqo kasukusunman.
Sumaj yachachiykunata maskʼana
(Oseas 1:7) Judaj reinonmantarí khuyakusaj; noqa Señorninku Tata Diosmin paykunataqa salvasaj mana maqanakuwanchu, nitaj flechawanchu, nitaj espadawanchu, nillataj caballospi lloqʼajkunawanchu, nispa nerqa Tata Diosqa.
w07-S 15/9 pág. 14 párr. 7
Oseas libromanta wakin allin yachachiykuna
1:7 ¿Maykʼajtaj Jehová ‘Judaj reinonmanta’ khuyakorqa, salvarqa ima? Jesús niraj jamushajtin 732 watapi rey Ezequías kamachishajtin. Chay pʼunchaykunapi Jehovaqa asirio soldadosta pantacherqa llajtanwan mana maqanakunankupaj. Uj angelnejtataj uj chʼisillapi 185.000 soldadosta wañuracherqa (2Re 19:34, 35). Ajinata Jehovaqa Judaj reinonta uj angelnejta salvarqa, manataj uj maqanakuwanchu, nitaj uj flechawanchu, nitaj espadawanchu, nillataj caballospi lloqʼajkunawanchu.
(Oseas 2:18) Jaqay tiempopeqa Israelman kutisqata uj tratota ruwasaj, kʼita animaleswan, pʼisqoswan, katariswan ima, jinallatataj kay jallpʼamanta chinkachisaj flechana arcosta, wañuchinaku maqanakutapis, jinamanta aylloyqa ni imata manchachikuspa samarikunampaj.
w05-S 15/11 pág. 20 párr. 16
Oseaspa profeciasnenqa Dioswan allinpi kanapaj yanapawanchej
16 Diosqa profeta Oseasman nisqanta juntʼallarqataj, pay nerqa: “Jaqay tiempopeqa Israelman kutisqata uj tratota ruwasaj, kʼita animaleswan, pʼisqoswan, katariswan ima, jinallatataj kay jallpʼamanta chinkachisaj flechana arcosta, wañuchinaku maqanakutapis, jinamanta aylloyqa ni imata manchachikuspa samarikunampaj”, nispa (Oseas 2:18). Wakin judíos Babiloniamanta Jerusalenman kutipuspa, ni ima animalesmanta manchikuspa allinpi kausakorqanku. Chay profeciaqa watejmanta kay 1919 watapi juntʼakullarqataj, Jehová Diospa llajtanqa Jatun Babiloniamanta, nisunman llulla religionpa yachachiykunasninmanta kacharichisqa karqa. Kay tiempopi Diospa llajtanpi kajkunaqa ni imamanta manchachikuspa kusisqas kausakunku, kay jallpʼapitaj wiñaypaj kausakuyta suyakushanku. Paykuna ukhupeqa mana chejninakuy kanchu, allinpitaj kausakunku (Apocalipsis 14:8; Isaías 11:6-9; Gálatas 6:16).
g05-S 8/9 pág. 12 párr. 2
Uj pʼunchay tukuy allinpi kausakonqanku
Animalesqa tukuywan allinpi kausakonqanku, imaraykuchus Jehová Diosqa runasman yachachenqa kay jallpʼata imaynatachus sumajta cuidanankuta. Jehovaqa tukuy monte animaleswan uj tratotapis ruwanman jina kanqa, runasta mana ni imananankupaj, runaspa atiyninpitaj kanankupaj (Oseas 2:18; Génesis 1:26-28; Isaías 11:6-8).
Bibliata leenapaj
(Oseas 7:1-16) Efraínta, Samariatawan jampikapuyta munarqani chaypachaqa, juchasninku sutʼinchakorqa. Tukuyninku llullas kanku, suwas jina wasisman yaykuykunku, ñan patapi runasmantapis kallpaman atienekuspa suwaj churakunku. 2 Mana reparankuchu chay tukuy sajra ruwasqasninkuta yuyayniypi japʼishasqayta. Kunanqa chay kikin ruwasqasnillankutaj paykunata wisqʼaykun, chay tukuytataj noqa rikushani. 3 Aylloyqa millay ruwasqasninkuwan llulleriosninkuwantaj reyta, kurajkunatapis kusichinku. 4 Tukuyninku khuchi kawsayniyoj purinku. Paykunaqa horno japʼichisqa jina kanku, mayqentachus enqhajqa saqerparin masa poqonankama, chay jina. 5 Maypachachus reyninchej pilluchakorqa chaypacha, kurajkunaqa payta onqoykucherqanku vinota ujyachispa. Paytaj makinta jaywarqa alqochakojkunaman. 6 Sonqonkoqa uj horno jina kʼajarin sajra ruwayta wakichisqankuwan. Phiñakuyninku brasas jina kʼajarin chʼisipi, tutamantataj nina jina larwarin. 7 Arí, tukuy paykunaqa horno jina kʼajarishanku, kamachejkunankutataj qʼolaykunku. Tukuy reyesninku urmasqaña kashanku, manañataj ni ujpis kanchu qhaparikamuwajqa. 8 Efraínqa waj aylluswan chhapuykukun. Efraínqa, imaynatachus uj tʼanta uj ladollanmanta ruphaykun, jinamin kashan. 9 Mana rejsisqa runas kallpanta chʼonqanku, paypa mana rikukusqallan. Chujchasnimpis yurajyaporqa mana reparakusqallan. 10 Israelpa runaykachasqanqa testigo jina contrampi sutʼinchashan. Chaywampis paykunaqa mana kutirikorqankuchu, nitaj Señorninku Tata Diosta maskʼarqankuchu. 11 Efraínqa mancharisqa paloma jina, mana allin yuyayniyoj; Egiptomanta yanapata mañakun, chantarí Asiriamampis qayllaykullantaj. 12 Jaqayman rejtinkurí, chʼipayta paykunaj patankuman choqaykusaj pacha, pʼisqosta jina urmarachisaj. Ajinata paykunata castigasaj juchasninkurayku. 13 Ay paykunamanta, noqamanta tʼaqakuwasqankurayku. Chinkachisqa kananku pʼunchay chayamonqa contrayta oqharikusqankurayku. Munani paykunata salvayta, paykunatajrí contraypi llullasta parlanku. 14 Qhaparikamuwanku puñunankupi kashaspa, manataj tukuy sonqochu wajyakuwanku. Trigota, vinotawan mañakuspa cuerponkuta khuchurakunku, contraypitaj oqharikorqanku. 15 Noqa paykunata yachacherqani, makisninkupipis kallpata qorqani, paykunarí contraypi sajra ruwayta yuyaychakorqanku. 16 Lantisman kutiporqanku manataj Diosmanchu. Imaynatachus uj wistʼu arcoj flechan waj ladollaman ripun, ajinallatataj paykunapis waj ladollaman ripunku. Runaykachaspa parlasqankurayku kurajkunanku espadawan wañuchisqas kanqanku, Egiptopitaj paykunamanta runas asiykukonqanku.
23-29 DE OCTUBRE
BIBLIAMANTA SUMAJ YACHACHIYKUNA | OSEAS 8-14
“Jehová Diosman noqanchejmanta aswan allin kajta qona”
(Oseas 14:2, NM) Tata Diosman kutiriychej; kay jinata payman mañakuspa, qayllaykuychej: Perdonapuwayku tukuy juchasniykumanta, kay allin ruwasqasniykutataj japʼiy. Kay yupaychaykunata apamusqaykutapis japʼikullaytaj.
w07-S 1/4 pág. 20 párr. 1
¿Imayna yupaychaykunatataj Jehová Dios allinpaj qhawan?
Bibliapi nin Jehovata siminchejwan yupaychayqa uywa wañuchisqata jayway jina kasqanta. Profeta Oseasqa “simiykumanta joven torillos” nispa nerqa. Chaywantaj niyta munasharqa siminchejwan Diosta yupaychayqa Diosman jaywanapaj uj sumaj torillo jina kasqanta (Oseas 14:2, NM). Apóstol Pabloqa hebreo cristianosman kayta nerqa: “Chayrayku Diosta jatunchanapuni Jesusnejta. Chayqa Diosman uj jaywanatapis jaywashasunman jina. Noqanchejqa siminchejwan runasman sutinta rejsichinchej”, nispa (Hebreos 13:15). Kay tiempopi Jehovaj testigosnenqa tukuy laya runasman Diospa Gobiernomanta predicashanku, Jesuspa yachachisqasninman tukunankupajtaj yanapashanku (Mateo 24:14; 28:19, 20). Paykunaqa tuta pʼunchay mundontinpi Jehová Diosta yupaychashanku (Apocalipsis 7:15).
(Oseas 14:4) Tata Diosqa nin: Noqa paykunata jampisaj juchachakusqankumanta. Noqa paykunata tukuy sonqo munakusaj mana munakunapaj jina kashajtinkupis, imaraykuchus phiñakuyneyqa paykunamanta tʼaqakapunña.
Dios allinpaq qhawawasqanchikqa, wiñay kawsayman pusawanchik
15 Juk toroqa, may valorniyuq karqa, chayrayku juk israelita Diosman juk valorniyuq jaywanata jaywayta munaspaqa chayta jaywaq. Chayrayku, ¿imataq siminchikmanta torillosjina kanku? Chaykunaqa tukuy sunqu, allinta tʼukurispa parlasqanchikwan chiqa Diosta yupaychasqanchik kanku. Ajinata yupaychasqankuta, ¿imaynatá Jehová qhawaq? Payllataq nin: “Paykunata tukuy sonqo munakusaj mana munakunapaj jina kashajtinkupis”, nispa (Ose. 14:4). Rikunchikjina, Payta jatunchaqkunataqa, perdonaq, allinpaq qhawaq, amigosninpaqtaq riqsikapuq.
(Oseas 14:9) Tukuy yachayniyojkuna, yuyayniyojkunapis kayta entiendechunku: Tata Diospa ñankunanqa cheqanmin, cheqan kawsayniyoj runastaj chaynejta purenqanku. Sajra kawsayniyojkunarí chaypi miskʼaspa urmanqanku.
jd-S pág. 87 párr. 11
Jehovata sirvina kamachiykunasninta kasukuspa
11 Oseas 14:9 versiculoqa Jehovaj cheqan kamachiykunasninta kasukuy imaspichus yanapawasqanchejta nin. Jehovaj kamachiykunasninta kasukoyqa allinninchejpajpuni. Imaraykuchus Jehovaqa Tukuy Imata Ruwaj Dios, yachantaj imayna ruwasqachus kasqanchejta, chayrayku imastachus ruwanata niwasqanchejqa allinninchejpajpuni. Jehová Dios sumajta rejsiwasqanchejta entiendenapajqa autosta ruwaj runapi tʼukurina. Autota ruwajqa yachan imaynachus auto ruwasqa kasqanta, yachallantaj ima mantenimientotachus ruwana kasqantapis, chayrayku mashkha unaymantachus aceiteta cambianatapis niwanchej. ¿Imataj kanman auto allillan kasqanta yuyaspa mana aceiteta tiemponpi cambiajtinchej? Motornin usqhayllata fregakunman, niñataj sirvinmanchu. Kikillantaj kanman noqanchejwanpis, Diospa kamachiykunasninta kasukoyqa allinninchejpajpuni (Isaías 48:17, 18). Diospa kamachiykunasninta kasukusqanchejrayku ima bendicionestachus japʼisqanchejta reparaspaqa, astawan Diospa kamachiykunasninta kasukuyta munasun (Salmo 112:1).
Sumaj yachachiykunata maskʼana
(Oseas 10:12) Paykunaman nerqani: Cheqan kaj ruwayta tarpuychej; munakuy cosechata oqhariychej. Wakichiychej jallpʼata watejmanta tarpunaykichejpaj, imaraykuchus Tata Diosta maskʼana tiempo chayamunña, pay jamuspa salvación parata apamunankama.
w05-S 15/11 pág. 28 párr. 7
“Tata Diospa ñankunanqa cheqanmin”
7 Jehovallata cheqan kajman jina yupaychasun chayqa pay jina munakuyniyoj kayta yachakusun. Payqa mana kasukoj israelitasman nerqa: “Cheqan kaj ruwayta tarpuychej; munakuy cosechata oqhariychej. Wakichiychej jallpʼata watejmanta tarpunaykichejpaj, imaraykuchus Tata Diosta maskʼana tiempo chayamunña, pay jamuspa salvación parata apamunankama”, nispa (Oseas 10:12).
(Oseas 11:1) Maypachachus Israel ayllu wawallaraj karqa chaypacha, noqaqa payta munakoj kani, waway kasqanrayku; chayrayku Egiptomanta wajyakaporqani.
Mesiasta suyakuchkarqanku
10 Israelitasjina Egiptomanta lluqsinan karqa (Ose. 11:1). Niraq Herodes qhari wawitasta wañuchikunanta kamachichkaptin, juk ángel Joseman, Mariata, Jesusta ima pusariykukuspa Egiptoman ayqinanta willarqa. Paykunaqa, Herodes wañunankama chaypi qhipakurqanku. Chaymantataq Joseqa, Jesusta watiqmanta Israelman pusarqa. Ajinamanta Jehová “[Oseas] profetanejta: Egiptomanta Churiyta wajyarqani” nisqan juntʼakurqa (Mat. 2:13-15). Arí, Jesusqa nacekunanmanta, wawa kayninmanta ima profeciastaqa mana juntʼachiyta atinmanchu karqa.
Bibliata leenapaj
(Oseas 8:1-14) Waqachiy cornetaykita, imaynatachus uj qhawaj soldadoqa Tata Diospa ayllunta mana puñuspa qhawan, jinata, imaraykuchus tratoyta pʼakinku. 2 Chaykamataj jamuwanku noqaman qhaparispa: Qanta rejsikapuyku Israelpa Diosnimpaj, nispa. 3 Israeltajrí allin kajta qhesachan, chayraykutaj enemigosnin payta qhatiykachanqanku. 4 Mana noqallawan reyesta churakunku. Kuraj kamachejkunatapis mana yachasqallay ajllanku. Qolqesninkuta, qorisninkutapis oqharispa, lantista ruwakunku, jinamanta paykuna kikinku chinkachisqa kanankupaj. 5 Esta unido al siguiente versículo. 6 Qan, Samaria, torillo lantita ruwakusqaykiwan millachikuni. Phiñakuyniy kʼajarin contraykichejpi. May unaypitaj llimphuchakuyta atinkichej, israelitas? Samariapi chay torillo lanteqa mana Dioschu. Chaytaqa runalla ruwan; chayraykumin phirisqa kanqa. 7 Paykunaqa wayrasta tarporqanku, oqharerqankutaj sinchʼi muyoj wayrata. Mana kanqachu cosechanankupaj jina chajrasninkupis, nitaj jakʼutapis orqhoyta atenqankuchu trigo umasmanta; sichus orqhonqanku chaypis, waj runaslla mikhukaponqanku. 8 Esta unido al siguiente versículo. 9 Israeltaqa oqoykonqanku. Waj llajtayojkunaqa Israelta qhawanqanku ni imapaj allin vasota jina, imaraykuchus Asiriaman wicharerqanku sapan purikoj kʼita burro jina. Efraínqa qolqewan minkʼakorqa qharisninta. 10 Esta unido al siguiente versículo. 11 Chay llajtas ukhupi tʼinkasta rakʼirachumpis, noqa paykunata chʼeqerachisajpuni. Jinamanta uj tiempotaqa ni reyes nitaj kurajkunapis kanqachu, imaraykuchus Efraínqa may chhika altaresta ruwakorqa, chaykunataj juchallinallampaj karqa. 12 Noqaqa may chhika yachachiykunata paypaj qhelqaporqani, paytajri mana rejsej tukorqa. 13 Paykunaqa anchatataj munanku uywa wañuchisqasta jaywayta, chay jaywasqaspa aychankutataj mikhukapunku. Tata Diostajrí mana chayta japʼikunchu; chay millay ruwasqasninkumanta yuyarikonqa, chay juchankumantataj paykunata castiganqa. Chantá paykuna Egiptoman kutirenqanku. 14 Israelqa kamachina wasista ruwan, ruwajnin Diosmantatajrí qonqakapun. Judapis oqharin ashkha jarkʼachasqa llajtasta, noqatajrí chay llajtasman ninata japʼiykuchisaj tukuy jatuchaj wasisninta ruphanampaj.
30 DE OCTUBRE–5 DE NOVIEMBRE
BIBLIAMANTA SUMAJ YACHACHIYKUNA | JOEL 1-3
“Churisniykichej, jinataj ususisniykichejpis noqaj sutiypi parlanqanku”
(Joel 2:28, 29) Kay imas qhepata, Espirituyta kachamusaj tukuy runasman. Churisniykichej, jinataj ususisniykichejpis noqaj sutiypi parlanqanku. Unay watasniyoj runas mosqokonqanku. Wayna runaspis mosqoypi jina imasta rikullanqankutaj. 29 Jinallataj wata runasman, qhari kajman, warmi kajmampis, jaqay pʼunchaykunapeqa Espirituywan juntʼachisaj.
w02-S 1/8 pág. 15 párrs. 4, 5
Diospa “may jatuchaj tʼukuna” ruwasqasnenqa paymanta predicanapaj yanapawanchej
4 Jerusalenpi Jesuspa discipulosnin Diospa atiyninta japʼiytawan chay ratopacha runas salvakuyta atisqankumanta predicayta qallarerqanku. Chaytataj ruwarqanku chay paqarin tantasqa kasharqanku chay runasman predicayta qallarispa. Chaytaj Petuelpa wawan profeta Joelpa nisqanman jina juntʼakusharqa. Profeta Joelnejta 800 watas ñaupajta jinaña Jehová Dios nerqa: “Espirituyta kachamusaj tukuy runasman. Churisniykichej, jinataj ususisniykichejpis noqaj sutiypi parlanqanku. Unay watasniyoj runas mosqokonqanku. Wayna runaspis mosqoypi jina imasta rikullanqankutaj. Jinallataj wata runasman, qhari kajman, warmi kajmampis, jaqay pʼunchaykunapeqa Espirituywan juntʼachisaj [...], Tata Diospa manchachikuna pʼunchaynin manaraj chayamushajtenqa” (Joel 1:1; 2:28, 29, 31; Hechos 2:17, 18, 20).
5 Jehovaqa, Davidta, Joelta, Deborata ima profetasta jina churarqa. Ashkha cristianostataj espíritu santonwan ajllarqa imachus aswan qhepaman kananta willanakupaj. Jinapis chay cristianosqa manaña David, Joel, Débora jina profetaschu karqanku. Chay cristianosqa Diospa atiyninwan yanapachikuspa chay tiempopi Jehovaj “may jatuchaj tʼukuna ruwasqasninmanta”, imastachus aswan qhepaman ruwananmanta ima predicarqanku. Ajinamanta Diospa sutinpi parlajkuna karqanku. ¿Imatá ruwarqanku chay willayta uyarej runas? (Hebreos 1:1, 2).
jd-S pág. 167 párr. 4
“Kayta willaraychej naciones ukhupi”
4 Jehovaqa profeta Joelnejta nerqa aswan qhepaman tukuy laya runas tukuynejpi predicanankuta, nerqataj: “Kay imas qhepata, Espirituyta kachamusaj tukuy runasman. Churisniykichej, jinataj ususisniykichejpis noqaj sutiypi parlanqanku. Unay watasniyoj runas mosqokonqanku. Wayna runaspis mosqoypi jina imasta rikullanqankutaj”, nispa (Joel 2:28-32). Kay Pentecostés 33 watapi Jesuspa discipulosnenqa Jerusalenpi uj wasej alto patanpi tantakorqanku. Chaypitaj Diospa atiyninta japʼispa, Diospa “may jatuchaj tʼukuna ruwasqasninmanta” predicayta qallarerqanku. Apóstol Pedrotaj chayta rikuspa profeta Joelpa nisqan paykunapi juntʼakushasqanta nerqa (Hechos 1:12-14; 2:1-4, 11, 14-21). Kay tiempopi profeta Joelpa nisqanqa, 1901 watas chaynejmantapacha astawanraj juntʼakushan. Chay tiempomanta ajllasqa cristianosqa Diospa “may jatuchaj tʼukuna ruwasqasninmanta”, nisunman Diospa Gobiernon kamachishasqanmantaña predicayta qallarerqanku.
(Joel 2:30-32) Cielopi jatuchaj tʼukunasta rikuchisaj, kay pachapitaj rikuchisaj yawarta, ninata, phuyu jina qʼoshñitawan. 31 Inteqa laqhaman tukonqa, killataj yawarman jina tukonqa, Tata Diospa manchachikuna pʼunchaynin manaraj chayamushajtenqa. 32 Tata Diospa sutinta oqharispa Diosninkupaj rejsikapojkunarí, wañuymanta salvasqa kanqanku, imaraykuchus, Sion orqopi, Jerusalenpi salvación kanqa, Tata Diospa nisqanman jina. Pikunatacha pay ajllanqa, chaykuna kawsanqanku.
w07-S 1/10 pág. 13 párr. 2
Joel libromantawan Amós libromantawan wakin allin yachachiykunas
2:32 ¿Ima niyta munan Diospa sutinta oqhariy? Diospa sutinta oqhareyqa niyta munan sutinta rejsiy, sutinta respetay, paypi atienekuy ima (Romanos 10:13, 14).
Sumaj yachachiykunata maskʼana
(Joel 2:12, 13) Kunanqa Tata Dios nin: Noqaman tukuy sonqo kutirimpuychej, ayunota ruwaspa, waqaspa, qhaparikuspa ima. 13 Qankunaqa Señorniykichej Tata Diosman kutirikampuychej. Pʼachasniykichejta llikʼinaykichejtaqa, sonqoykichejta llikʼiychej, imaraykuchus Tata Diosqa may khuyakuyniyoj, wawa sonqotaj. Payqa may pacienciayoj, tukuy munakuyniyojtaj. Castiganan kajtimpis, sonqonta nanachikumpuni.
w07-S 1/10 pág. 13 párr. 5
Joel libromanta Amós libromantawan wakin allin yachachiykunas
2:12, 13. Cheqamantapuni imamantapis pesachikuspaqa sonqonchejmantapacha pesachikunchej, chaytataj ñaupa tiempopi runasqa pʼachasninkuta llikʼirakuspa rikuchej kanku, kay tiempopitaj sonqonchejtapis llikʼishasunman jina sonqomantapacha pesachikuspa rikuchinchej.
(Joel 3:14) Justicia ruwana vallepeqa, manchay ashkhapuni kashanku. Tata Diospa pʼunchaynenqa qayllamushanña.
w07-S 1/10 pág. 13 párr. 3
Joel libromanta Amós libromantawan wakin allin yachachiykunas
3:14 ¿Imawan “justicia ruwana” valle ninakun? Dios juiciosninta ruwasqanwan, chaytaj mana uj lugarpunichu. Rey Josafat Judapi kamachishajtin Jehovaqa enemigosninta pantachispa Judá llajtata salvarqa. Josafat suteqa, “Jehovamin Juezqa” niyta munan. Chayrayku justicia ruwana valle nisqata sutichakullantaj Josafat Valle nispa (Joe 3:2, 12). Kay tiempopitaj ninakun tukuy naciones uva sarunapi uvas jina sarusqas kanankuwan (Ap 19:15).
Bibliata leenapaj
(Joel 2:28–3:8) Kay imas qhepata, Espirituyta kachamusaj tukuy runasman. Churisniykichej, jinataj ususisniykichejpis noqaj sutiypi parlanqanku. Unay watasniyoj runas mosqokonqanku. Wayna runaspis mosqoypi jina imasta rikullanqankutaj. 29 Jinallataj wata runasman, qhari kajman, warmi kajmampis, jaqay pʼunchaykunapeqa Espirituywan juntʼachisaj. 30 Cielopi jatuchaj tʼukunasta rikuchisaj, kay pachapitaj rikuchisaj yawarta, ninata, phuyu jina qʼoshñitawan. 31 Inteqa laqhaman tukonqa, killataj yawarman jina tukonqa, Tata Diospa manchachikuna pʼunchaynin manaraj chayamushajtenqa. 32 Tata Diospa sutinta oqharispa Diosninkupaj rejsikapojkunarí, wañuymanta salvasqa kanqanku, imaraykuchus, Sión orqopi, Jerusalenpi salvación kanqa, Tata Diospa nisqanman jina. Pikunatachá pay ajllanqa, chaykuna kawsanqanku.
3 Tata Diosqa nillantaj: Chay pʼunchaykuna chayamonqa chaypachaqa, Judapi kaj runasta, Jerusalenpi kajkunata waj nacionesman presos apasqa kasqankumanta kutichikampusaj. 2 Tukuy nacionesmanta kaj runasta tantaykusaj, chantá Josafat Valleman paykunata apasaj. Chaypeqa noqa paykunamanta cuentata mañasaj imatachus Israel aylluywan ruwasqankumanta, imaraykutajchus paykunaqa israelitasta tukuy kay pachaman chʼeqeracherqanku, chantá jallpʼayta rakʼinakorqanku. 3 Suertesta choqaspa, aylluyta rakʼinakorqanku. Qhari wawasta, warmi wawastataj venderqanku, chay qolqewantaj vinota ranterqanku, wakintataj phisu warmiswan gastarqanku. 4 Qankunarí, imata munankichej noqamanta, Tiropi tiyakoj runas, Sidonpi tiyakoj runas, jinataj Filisteapi tiyakoj runaspis? Vengakuytachu munankichej noqawan? Chayri pagachikuwaytachu munashankichej? Pisimantawan imatachus mañakusqaykichejta jaywapusqaykichej. 5 Qankunaqa qolqeyta, qoriytapis suwawarqankichej, temploykichejmantaj kʼacha qhapaj imasniyta apakaporqankichej. 6 Judapi tiyakoj runasta karusman presosta aparqankichej, jinallataj Jerusalenpi tiyakoj runastapis. Griego runasmantaj paykunata venderqankichej wata runas kanankupaj. 7 Kunanqa noqa paykunata orqhokampusaj, maymanchus venderqankichej, chaymanta. Chantá qankunatañataj kikillantataj ñakʼarichisqaykichej. 8 Churisniykichejta, ususisniykichejta ima judiosman vendesaj, paykuna sabeo sutiyoj llajtayojkunamanñataj vendenankupaj, chay karu llajtayoj runasman. Noqa Tata Diosmin chaytaqa nini.