Qotuchakuypi ruwanasta japʼinaykipaj, ¿kallpachakushankichu?
1. ¿Maykʼajmantapachataj qharis kajkuna 1 Timoteo 3:1 nisqanman jina ruwankuman?
1 Kay 1 Timoteo 3:1 nin: “Kuraj qhawaj kayta munajqa allin ruwanatapuni ruwayta munan”, nispa. Chay palabrasqa, hermanosta qotuchakuypi ruwaykunata japʼinankupaj kallpachan. Chayta ruwanankupaj, ¿wiñay tukusqa kaytarajchu suyananku tiyan? Mana. Siervo ministerial jina llankʼanankupaj, waynuchitumantapacha wakichikuyta qallarinkuman (1 Tim. 3:10). Bautizasqa waynuchus, ¿imatataj qotuchakuypi yanapakunankupaj ruwankuman?
2. ¿Imaynatá yanapakunaykipaj sonqoykita kallpachawaj? ¿Imaynasmantá wajkunata yanapawaj?
2 Yanapakunaykipaj sonqoykita kallpachay. “Allin ruwanata[qa]” mana wajkunawan qhawachikuyta maskʼaspachu ruwanayki tiyan. Chayrayku hermanosta, hermanasta yanapayta munanaykipaj sonqoykita kallpachay. Jesuspa ruwasqanpi tʼukuriy (Mat. 20:28; Juan 4:6, 7; 13:4, 5). Wajkunaj allinninta mana maskʼayta atillankichu chayqa, Jehovamanta yanapata mañakuy (1 Cor. 10:24). Onqosqa chayri machitu hermanosta, ¿imaynallamantapis yanapariwajchu? ¿Tantakuna Wasita llimphuchaysikuwajchu chayri imallatapis allinchawajchu? Diosmanta Parlayta Yachanapaj tantakuypi umallirichej mana jamojtin, ¿qan umallirichinaykipaj wakichikuwajchu? Wajkunata yanapayqa, mayta kusichisonqa (Hech. 20:35).
3. Qotuchakuypi yanapakuyta munaj, ¿imaynataj kanan tiyan, imataj chaypaj yanapanman?
3 Diosta yupaychaypi sinchʼita sayay. Qotuchakuypi yanaparikuyta munajqa, Diosta yupaychaypi sinchʼi sayasqa kanan tiyan. Nitaj imatapis allinta ruwayta yachajpunichu kanan tiyan. Astawanqa Jehová jina, Jesús jinataj yuyananpaj kallpachakun (1 Cor. 2:15, 16). Chantapis “espirituman jina kawsa[n]” (Gál. 5:22, 23). Diospa Reinonta ñaupajman churan, sonqo kʼajaywantaj willamun (Mat. 6:33). Diosta yupaychaypi sinchʼita sayanaykipajqa: Bibliata sapa pʼunchay leeriy, sapa llojsimoj Torremanta Qhawaj, ¡Despertad! revistastapis, tantakuykunapaj wakichikuy, amataj tantakuyta saqeychu (Sal. 1:1, 2; Heb. 10:24, 25). Pablo, joven Timoteota ñaupajman rinanpaj kallpachashajtin, jinata nerqa: “Allinta qhawakuy, [...] yachachisqaykitapis”, nispa (1 Tim. 4:15, 16). Diosmanta Parlayta Yachanapaj tantakuypi umallirichinaykipaj, willamunaykipaj ima sumajta wakichikuy. Mana saykʼuspa willay. Imaynasmantachus Diospaj astawan llankʼanaykipi tʼukuriy, ichá precursor kaspa, Betelpi sirvispa, chayri Soltero Cristianospaj Escuelaman rispa. Chayta juntʼanaykipajtaj kallpachakuy. Diosta yupaychaypi sinchʼita sayayqa, ‘waynaspa sajra munayninkumanta’ jarkʼakunaykipaj yanapasonqa (2 Tim. 2:22).
4. ¿Imaraykutaj allinta juntʼaj, atienekunapaj jinataj kana tiyan?
4 Allinta juntʼaj, atienekunapaj jinataj kay. Ñaupa cristianospa tiemponkupi manchay yarqhay kasqanrayku, apostolesqa mikhunata rakʼinapaj “allin kawsayniyoj[...]” qharista ajllarqanku, pikunachus atienekunapaj jina, kamachisqata allinta juntʼajkunataj karqanku. Apostolesqa, paykunapi atienekusqankurayku, ruwanasninkuta allinta juntʼayta aterqanku (Hech. 6:1-4). ¿Imatataj yachakuwaj? Kamachisusqankuta, tukuy atisqaykiman jina allinta juntʼay. Noemanta yachakuy, payqa arcata Dios nisqanman jina ruwarqa (Gén. 6:22). Maychus kamachisusqankuman jina imatapis juntʼajtiykeqa, Jehová allinpaj qhawasonqa, wiñay tukusqa kasqaykitataj rikuchinki (1 Cor. 4:2; “Waynuchusta wakichinapuni” nisqa recuadrota leey).
5. ¿Imaraykutaj waynuchus qotuchakuypi llankʼanankupaj kallpachakunanku tiyan?
5 Isaías 60:22 nin jina, Jehovaqa cosechanta usqhayllata oqharishan. Sapa wata, 250.000 runas bautizakunku. Jehovaj llajtan mayta wiñasqanrayku, qotuchakuyta ñaupajman pusanapaj wakichisqa qharis astawan necesitakun. Mana jaykʼaj jina, Jehovata yupaychaypi ashkha llankʼay tiyan (1 Cor. 15:58). Chayrayku qotuchakuypi llankʼanapaj kallpachakoj waynuchusqa, allin ruwanatapuni ruwayta munanku.
[2 paginapi dibujo/foto]
Jehovaj llajtan mayta wiñasqanrayku, qotuchakuyta ñaupajman pusanapaj wakichisqa qharis astawan necesitakun
[3 paginapi dibujo/foto]
Waynuchusta wakichinapuni
Ancianosqa, allinpaj qhawasqa waynuchusman wakin ruwanasta qonkuman, yachachinkumantaj. Sutʼinchanapaj, qotuchakuykunata waturej hermano, tantakuy tukukusqantawan uj hermanota plataformapi kallpachasharqa. Jinallapi qayllankupi uj yoqallituta sayashajta rikusqa, tapurisqataj: “¿Noqawanchu parlayta munanki?”, nispa. Yoqallitutaj plataformata pichananpaj kamachisqa kasqanta nisqa. Tatasnin ripuytaña munajtinkupis, mana pichaspaqa mana kuyuriyta munarqachu. Chayrayku qotuchakuykunata waturejqa, wajnejman suchurikorqa. Qhepaman pay nerqa: “Ancianosqa, chay qotuchakuypi waynuchusta wakin ruwanasta kamachispa wakichillajpuni kanku. Chay qotuchakuyta sapa waturejtiy, uj hermanollatapis siervo ministerial sutichanapaj wakichej kanku”, nispa.