¿YACHARQANKICHU?

¿Ima ruwanasniyojtaj karqa Romamanta soldadospa capitannin?

Mosoj Testamentopeqa Romapi kaj capitanesmanta parlan. Chaykunamanta ujnenqa Jesusta wañuchichinanpaj kamachisqa karqa. Ujnintaj Cornelio karqa, payqa tukuy mana judíos kajkunamanta ñaupajta cristianoman tukuporqa. Apóstol Pablota jasutʼishajtinku qayllanpi kasharqa chay runapis, capitanllataj karqa. Julioqa Pablota Romaman presota aparqa, paypis capitanllataj karqa (Marcos 15:39; Hechos 10:1; 22:25; 27:1).

Capitanesqa 50 chayri 100 soldadosta kamachej kanku. Paykunaqa tukuy soldadosninkuta maqanakupaj wakichej kanku, maqanakuna pʼachasninkuta, imaswanchus maqanakunku chaykunatapis allinchus manachus kashasqanta qhawarejpuni kanku. Maqanakumanpis soldadospa ñaupaqenkuta rej kanku.

Tukuy soldadosqa capitanes kayta munaj kanku. Capitanesqa soldadosta allinta kamachinanku karqa. Paykunaj makinkupi kasharqa Romamanta soldados sumaj wakichisqa kanankoqa. Uj libro nin: “Capitanesqa sumajta yachaj runas kaj kanku, soldadosninkutataj allinta kamachej kanku”, nispa.

Ñaupa tiempomanta espejos ¿imaynataj kaj kanku?

Ñaupa tiempomanta espejostaqa metalmanta, cobremanta, qolqemanta, qorimanta, chayri qoritawan qolqetawan chajruykuspa ruwaj kanku. Bibliaqa espejo palabrata ñaupaj kutita oqharin, Dioswan tinkukuna toldota israelitas ruwashajtinku. Chay toldoqa Diosta yupaychanankupaj ruwasqa karqa. Warmisqa espejosninkuta qorqanku uj chʼillamita, sayanasnintawan cobremanta ruwanankupaj (Éxodo 38:8). Chayta ruwakunanpajtaj, espejosta unuyachej kanku.

Israel llajtapi allashaspa, warmispa kʼachanchakuna imasninkutawan khuska ashkha espejosta tarerqanku. Chay espejosqa tumpa chhoqos karqanku, japʼinasninpis warmiman rijchʼasqa karqa: kʼullumanta, metalmanta, marfilmanta ima ruwasqa. Wasa ladontajrí mana llosqʼochasqachu kasharqa.

Ñaupa tiempo espejospeqa ayphulla rikukoj, manataj kunan tiempo espejospi jina sutʼitachu. Chaychá Apóstol Pablopis nerqa: “Kunanqa rikunchej ayphu espejopi jina ayphullata”, nispa (1 Corintios 13:12).