Cristiano Kausayninchej tantakuypaj referencias
6-12 DE MAYO
BIBLIAMANTA SUMAJ YACHACHIYKUNA | 2 CORINTIOS 4-6
“Mana saykʼunchejchu”
(2 Corintios 4:16) Chayrayku mana saykʼunchejchu. Imaraykuchus cuerponchej maukʼayajtinpis, sonqonchej, yuyayninchejpis sapa pʼunchay mosojyachisqa kashan.
w04-S 15/8 pág. 25 párrs. 16, 17
Mana saykʼunchejchu
16 Jehová Diosmantaqa yachakunallanchejpuni tiyan. Jehová Diospa amigosnin kasunchej chayqa, ni jaykʼaj payta yupaychaspa saykʼusunchejchu. Payqa “saykʼusqa kajta astawan kallpachan, pisi kallpayojmampis kallpata qon” (Isaías 40:28, 29). Apóstol Pablopis kausayninpi chayta repararqa, chayrayku pay nerqa: “Mana saykʼunchejchu. Imaraykuchus cuerponchej maukʼayajtinpis, sonqonchej, yuyayninchejpis sapa pʼunchay mosojyachisqa kashan”, nispa (2 Corintios 4:16).
17 Chay versiculopi “sapa pʼunchay” nispaqa nishawanchej Jehová Dios imastachus qowasqanchejwan sumajta yanapachikunata. Uj hermanamanta parlarina. Payqa 43 watastaña misionera jina sirvispa wakin kuti saykʼusqa, llakisqataj sientekorqa. Jinapis ñaupajllamanpuni rerqa. Pay nin: “Sapa paqarin tutamanta jatarikuspa Jehová Diosmanta mañakuni, Bibliatataj leeni. Chayta ruwasqayrayku kunankama aguantashallanipuni”, nispa. Jehová Diosman orakusun, imayna Dioschus kasqanpi, imastachus qoyta munawasqanchejpi sapa día tʼukurisun chayqa, payqa “sapa pʼunchay” atiyninwan yanapawasun.
(2 Corintios 4:17) Ñakʼarisqanchejqa uj tiempollapaj, nitaj imapischu. Chay ñakʼarisqanchejraykutaj tʼinkata japʼisunchej. Chaytaj ni imawan kikinchakunchu, wiñaypajtaj.
it-1-S pág. 70 párr. 3
Aguantana
Wiñaypaj kausakuyta suyakushasqanchejtaqa manapuni qonqanachu tiyan. Imaraykuchus kay mundomanta runas qhatiykachawajtinchejpis, wañuchiytataj munawajtinchejpis manapuni suyakuyninchejmanta karunchayta atiwasunchu (Ro 5:4, 5; 1Te 1:3; Ap 2:10). Kunan tiempo ñakʼariykunaqa mana imapischu, qhepaman imatachus Dios qowasun chaywan kikinchasqaqa (Ro 8:18-25). Kay tiempopeqa ñakʼarinchej, imaymana llakiykunapitaj rikukunchej. Jinapis paraisopi imaynatachus kausakunanchejpi tʼukurispaqa “uj tiempollapaj, nitaj imapischu” (2Co 4:16-18). Llakiykuna uj tiempollapaj kasqanta yachaspa, Jehová Diospitaj suyakuspaqa mana llakiywan atipachikusunchu, nitaj paytapis wasanchasunchu.
(2 Corintios 4:18) Chayrayku noqanchejpa yuyayninchejqa mana rikukoj imaspi kashan, manataj rikukoj imaspichu. Imajtinchus rikukoj imasqa mana unaypajchu, mana rikukoj imastajrí wiñaypaj.
Sumaj yachachiykunata maskʼana
(2 Corintios 4:7) Tʼuru vasos jinalla kajtiykupis, may sumaj llankʼayta japʼerqayku. Ajinamanta sutʼi rikukunanpaj, may sumaj ateyqa Diosmanta jamusqanta, manataj noqaykumantachu.
w12-S 1/2 pág. 28
“Jehová Diosta kusichiychej”
David Splane hermanoqa Diospa Llajtanta Kamachejkunamanta ujnin. Payqa 2 Corintios 4:7 versiculomanta parlarqa. Nerqataj chay sumaj llankʼayqa mana uj runa yachayniyoj kasqanchu kasqanta. Manachayqa apóstol Pablo nisqanman jina chay sumaj llankʼayqa Jehová Diosmanta runasman willay kasqanta (2 Corintios 4:1, 2, 5). Hermano Davidqa chay clasemanta estudiantesman nerqa chay phishqa killaspi yachakusqankoqa, paykunata Diosmanta sumajta willanankupaj wakichisqanta. Chaytataj paykunaqa jatunpaj qhawananku karqa.
Hermano Davidqa sutʼincharqa ‘tʼuru vasosqa’ cuerponchejwan ninakusqanta. Chantataj parlarqa uj tʼuru vasomanta qori vasomantawan. Tʼuru vasotaqa ima ratopis oqharillanchej, qori vasotarí jatun pʼunchayllapi oqharinchej. Qori vasopi imallatapis waqaychajtinchejqa qori vasota jina valorniyojllatataj qhawasunman. Chayrayku hermano Davidqa estudiantesman nerqa: “Runasqa Jehová Diosta jatunpaj qhawananku tiyan, nitaj qankunatachu. Chayrayku jatunchakunaykichejmantaqa kʼumuykukuychej. Tʼuru vasos jinataj kaychej”, nispa.
(2 Corintios 6:13) Chayrayku wawasniyman jina niykichej: Qankunapis sonqoykichejta noqaykupaj jatunta kichariychej.
Hermanosninchikta astawan munakunachik
7 ¿Noqanchejrí? Hermanosninchejta astawan munakunapaj, ¿sonqonchejta jatunta kicharisunmanchu? Yachanchej jina, mitanchejmanta kajkunawan, noqanchej jina kajkunawan imaqa, allinta apanakuyta atillanchej. Chaywanpis, ajinata ruway wajkunamanta karunchawajtinchejqa, sonqonchejta astawan kicharinanchej tiyan. Chayrayku, allin kanman tapurikunanchej: “¿Amigosnillaywanchu astawan willamuni? Maymanpis puriykacharej rinapaj, chayri imatapis ruwayta munashaspa, ¿waj hermanosta wajyarinichu? Tantakuykunaman manaraj unaychu jamojkunamanta, ¿ichapis astawan qhepaman amigosniy kanqanku nispachu karunchakuni? Qotuchakuypi, ¿tukuy hermanostachu qʼapirini chayri parlapayarini?”.
Bibliata leenapaj
13-19 DE MAYO
BIBLIAMANTA SUMAJ YACHACHIYKUNA | 2 CORINTIOS 7-10
“Llakiypi tarikoj hermanosta yanapanchej”
(2 Corintios 8:1-3) Kunanqa hermanos yachanaykichejta munayku, Macedoniamanta congregaciones Diospa jatun khuyakuyninta japʼisqankurayku imatachus ruwasqankuta. 2 Paykunaqa jatun llakiypi kashaspa, ñakʼarisharqanku. Jinapis kusikuyninkoqa may jatun karqa, qorikuyta yachasqankutataj rikucherqanku. Chaytataj ruwarqanku may wajchas kashaspapis. 3 Paykunaqa tukuy atisqankuta qorqanku. Nitaj chayllatachu, manachayqa atisqankumantapis astawanraj. Chaymantaqa noqa testigo kani.
w98-S 1/11 pág. 25 párr. 1
“Diosqa kusiywan qojta munakun”
Pabloqa Corintomanta hermanosman parlarerqa Macedoniapi kaj hermanosmanta. Macedoniapi kaj hermanosqa wajkunata sumajta yanaparerqanku. Pay nerqa: “Paykunaqa jatun llakiypi kashaspa, ñakʼarisharqanku. Jinapis kusikuyninkoqa may jatun karqa, qorikuyta yachasqankutataj rikucherqanku. Chaytataj ruwarqanku may wajchas kashaspapis”, nispa. Macedoniosqa wajkunata yanaparinankupaj mana yuyarichinata necesitarqankuchu. Astawanpis Pablo nerqa: “Chay hermanosqa maytapuni niwarqayku, paykunapis kapuyninkumanta qoyta munasqankuta”, nispa. Macedoniosqa “may wajchas” kashaspapis qorikuyta yacharqanku (2 Corintios 8:2-4).
Hermanosta yanapanapaj llankʼana
KAY 46 wata chaynejta Judeapi jatun yarqhay karqa. Mikhunaqa may valesqa karqa, chaypi tiyakoj Cristoj yachachisqasnintaj, ni pisi mikhunata rantikunallankupajpis alcanzachikorqankuchu. Chayrayku mana yarqhayllapichu rikukusharqanku, manaqa wañuy patapiña. Chaywanpis Jehovaqa cheqa sonqo kamachisninta yanapanman karqa, chay kutikamataj ni mayqen cristiano rikusqachu Jehová ajinata yanapasqanta. ¿Imataj karqa?
(2 Corintios 8:4) Chay hermanosqa maytapuni niwarqayku, paykunapis kapuyninkumanta qoyta munasqankuta. Ajinamanta Diospaj tʼaqasqa kajkunata yanapaysikunankupaj.
Hermanosta yanapanapaj llankʼana
4 Apóstol Pabloqa Corintiosman iskay kaj cartanpi, cristianospa ruwayninkumanta parlan. Chay carta ajllasqa cristianospaj kajtinpis, “waj ovejas[manta]” kajkunata yanapallantaj (Juan 10:16). Pablo sutʼinchasqanman jinaqa, iskay ruwaykunata juntʼananchej tiyan. Ujnenqa runasman willay, yachachiy ima, nisunman Dioswan “allinyakuna kasqanta parla[sqanchej]” (2 Cor. 5:18-20; 1 Tim. 2:3-6). Ujnintaj hermanosta yanapanapaj llankʼasqanchej, Pabloqa llakiypi kaj hermanosman “yanapata” apanamanta parlarqa (2 Cor. 8:4). Chay iskaynin ruwaykunapajqa griego parlaypi diakonía palabrallata churakorqa. ¿Imaraykutaj kikin palabrallata churakorqa?
5 Pabloqa kikin palabrallata chay iskaynin ruwaykunapaj oqharispa, hermanosta yanapanapaj llankʼayqa, qotuchakuypi ruwaykunawan ujlla kasqanta nisharqa. Aswan ñaupajta kayta sutʼincharqa: “Evangeliopeqa imaymana sirviykuna tiyan; chaywampis uj Señorllata sirvinchej. [...] Imaymana ruwaykuna tiyan; chaywanpis [...] tukuy imasta ruwanapaj atiyta qoj Espiritoqa ujlla”, nispa (1 Cor. 12:4-6, 11). Chay ruwaykunataj Diosta yupaychanapaj kasqanta nerqa (Rom. 12:1, 6-8). Chayraykuchá Pabloqa “hermanosta yanapanapaj” tiempochakoj (Rom. 15:25, 26).
6 ¿Imaraykutaj hermanosta yanapay, Jehovata yupaychaywan uj ruway jinalla? Pabloqa Corintomanta hermanos chayta entiendenankupaj, llakiypi kajkunata cristianos yanapasqankoqa, “Cristoj evangelionta kasusqa[nkurayku]” kasqanta nerqa (2 Cor. 9:13). Nisunman cristianosqa Cristoj yachachiykunasninman jina ruwayta munaspa, hermanosninkuta yanapanku. Ajinamanta, Pablo nisqanman jinaqa “Diospa qhasilla kʼacha yanapaynin” hermanosta yanapasqankupi rikukun (2 Cor. 9:14; 1 Ped. 4:10). Chayrayku 1976 watapi 1 junio killamanta Torremanta Qhawaj revistapi, hermanosta yanapanapaj llankʼaymanta parlaspa kayta nerqa: “Ni jaykʼaj yuyanachu Jehová Dios, ni Churin Jesucristopis chay ruwayta pisipaj qhawasqankutaqa”, nispa. Arí, hermanosta yanapanapaj llankʼaspaqa, Diosta yupaychashanchej (Rom. 12:1, 7; 2 Cor. 8:7; Heb. 13:16).
(2 Corintios 9:7) Sapa uj sonqonpi yuyasqanman jina churachun, mana llakikuspa, nitaj kamachisqa jinachu. Imaraykuchus Diosqa kusiywan qojta munakun.
¿Ima qolqewantaj Diospa Reinonmanta willakun?
10 Uj kaj, Jehovata munakusqanchejrayku kapuyninchejmanta qonchej, chantapis “imachus payta kusichin” chayta ruwayta munanchej (1 Juan 3:22). Jehovaqa mayta kusikun payta yupaychajkuna tukuy sonqo qojtinku. Apóstol Pabloqa, cristianos ajinata ruwasqankumanta parlarqa (2 Corintios 9:7 leey). Uj cheqa cristianoqa mana kamachisqa jinallachu qon, manaqa kusiywan “sonqompi yuyasqanman jina”. Nisunman imachus necesitakusqanta reparaspa imaynatachus yanapananpi tʼukurin, chayman jinataj ruwan. Chay jina runatamin Jehovaqa allinpaj qhawan, “imaraykuchus Diosqa munakun pichus kusiywan qojta”.
Sumaj yachachiykunata maskʼana
(2 Corintios 9:15) Diosman agradecekuna, may sumaj regalota qowasqanchejmanta.
¿Agradecekunchejchu Dios noqanchejrayku Jesusta kachamusqanmanta ruwasqanta?
2 Pablo yacharqa Jehová, Jesuspa wañuyninnejta tukuy ima nisqanta juntʼananta (2 Corintios 1:20 leey). Dios ‘mana willay atina qowasqanchejqa’ Wawanpa kausayninta qosqanwan, mayta munakuwasqanchejwan, tukuy ima allin kajta qowasqanchejwan ima ninakun. Jehová kay regalota qowasqanchejqa may sumajpuni. ¿Imaynataj sientekunchej aswan jatun regalota Jehová qowasqanchejmanta? ¿Imatataj ruwasunman Jesuspa Wañuyninta Yuyarinapaj tantakuy qayllapiña kasqanrayku? Chay tantakoyqa miércoles 23 de marzo de 2016 watapi ruwakonqa.
(2 Corintios 10:17) Diosmanta Qhelqasqapi nin: “Jatunchakojqa, Jehová Diospi jatunchakuchun”, nispa.
g99-S 8/7 págs. 20, 21
¿Allillanchu jatunchakuy?
Bibliapeqa Mosoj Testamentopi griego parlaypi kau·kjá·o·mai, rikhurin. Chaytaj niyta munan “jatunchakuy, may kasqanchejta yuyakuy”. Chaytataj oqharikun allin kajmanta mana allin kajmanta jatunchakojkunamanta parlanapaj. Por ejemplo, Pablo nerqa: “Kusikunachej Dios jatunchanawanchejta suyakuspa”, nispa. Chantapis nillarqataj: “Jatunchakojqa, Jehová Diospi jatunchakuchun”, nispa (Romanos 5:2; 2 Corintios 10:17). Chaywantaj niyta munasharqa Jehová Diosninchejmanta jatunchakunanchejta, kusikunanchejtataj.
Bibliata leenapaj
20-26 DE MAYO
BIBLIAMANTA SUMAJ YACHACHIYKUNA | 2 CORINTIOS 11-13
“Pabloqa ‘aychanpi khishkayoj jina’ karqa”
(2 Corintios 12:7) Señor mosqoypi jina tʼukuna imasta willawajtinpis, mana pipis noqamanta kurajta yuyananchu tiyan. Ama anchata umata oqharinaypajqa, aychaypi khishkayoj jina kani. Chaytaj Satanaspa angelnin jina, ñakʼarichishawantaj. Ajinamanta ama anchata umata oqharinaypaj.
w08-S 15/6 pág. 3 párr. 3
Pisi kallpayoj kaspapis atiyniyoj kanchej
Apóstol Pablopis Jehová Diosmanta kinsa kutita mañakorqa, aychanmanta khishkata orqhonanta. Chaywantaj niyta munasharqa uj problema chayri uj llakiy ñakʼarichishasqanta. Mana yachanchejchu imachus chay problema kasqanta, jinapis khishka jina molestasharqa. Nisunman Pablota mana saqesharqachu Jehová Diosta kusisqa sirvinanta. Jehová Diostaj payman nerqa: “Jatun khuyakuyniytaqa maychus necesitasqaykiman jinaña rikuchiyki. Atiyneyqa pisi kallpayoj kasqaykipi astawan rikuchikun”, nispa. Jehová Diosqa apóstol Pabloj problemasninta mana chinkacherqachu. Jinapis Pabloqa aguantallarqapuni. Chayrayku nerqa: “Pisi kallpayoj kaspaqa atiyniyoj kani”, nispa (2 Cor. 12:7-10). ¿Imatataj niyta munasharqa?
(2 Corintios 12:8, 9) Kinsa kutita Señormanta mañakorqani, chay khishkata orqhonawanta. 9 Señortajrí niwarqa: “Jatun khuyakuyniytaqa maychus necesitasqaykiman jinaña rikuchiyki. Atiyneyqa pisi kallpayoj kasqaykipi astawan rikuchikun”, nispa. Chayrayku kusiywan jatunchakusaj, imaspichus pisi kallpa kasqaymanta. Ajinamanta Cristoj atiynenqa uj toldo jina qhataykuwanqa.
w06-S 15/12 pág. 24 párrs. 17, 18
Jehová Diosqa “atiyninta qonqa mañakojkunaman”
17 Jehová Diosqa Pabloman nerqa: “Jatun khuyakuyniytaqa maychus necesitasqaykiman jinaña rikuchiyki. Atiyneyqa pisi kallpayoj kasqaykipi astawan rikuchikun”, nispa. Pablotaj nerqa: “Chayrayku kusiywan jatunchakusaj, imaspichus pisi kallpa kasqaymanta. Ajinamanta Cristoj atiynenqa uj toldo jina qhataykuwanqa”, nispa (2 Corintios 12:9; Salmo 147:5). Chaywanqa Pablo nisharqa Jehová Dios Cristonejta atiyninwan uj toldowan jina jarkʼashasqanta. Kay tiempopipis Jehová Diosqa mañakusqanchejta uyarillawanchejtaj, imajtinchus kamachisninta jarkʼashallantaj.
18 Uj toldoqa paratawan wayratawan mana chinkachinchu, astawanqa chaykunamanta jarkʼawanchej. Ajinallatataj Cristoj atiyninpis llakiykunasninchejta mana chinkachinchu. Jinapis, kay mundoj sajra imasninmanta, Satanaspa trampasninmantawan jarkʼawanchej (Apocalipsis 7:9, 15, 16). Llakiykunasninchej mana chinkajtinpis, amapuni qonqanachu Jehová Dios yachasqanta ima llakiypichus kashasqanchejta. Chantapis payqa ‘qhaparikusqanchejta uyarishan’ (Isaías 30:19; 2 Corintios 1:3, 4). Pablo nerqa: “Diostajrí nisqasninta juntʼanpuni. Paytaj mana saqenqachu, mana sayay atinata juchaman tanqasqa kanaykichejtaqa. Astawanqa juchaman tanqasqa kashajtiykichej, Diosllataj yanapasonqachej lluspʼinaykichejpaj, sinchʼita sayanaykichejpajtaj”, nispa (1 Corintios 10:13; Filipenses 4:6, 7).
(2 Corintios 12:10) Cristorayku kusikuni: pisi kallpayoj kasqaymanta, imaymanasta niwasqankumanta, pisichikusqaymanta, qhatiykachawasqankumanta, chʼampaykunapi rikukusqaymanta ima. Imaraykuchus pisi kallpayoj kaspaqa atiyniyoj kani.
Diosqa saykʼusqa kajta astawan kallpachan
8 (Isaías 40:30 leey). Wakin imasta sumajta ruwayta atejtinchejpis, Diospa yanapanta necesitanchejpuni. Chaytaqa amapuni qonqanachu. Apóstol Pablomanta parlarina. Payqa tukuy imata ruwayta munajtinpis, mana atejchu. Chayrayku payqa llakiyninta Diosman willakorqa. Diostaj Pabloman, jinata nerqa: “Atiyneyqa pisi kallpayoj kasqaykipi astawan rikuchikun”, nispa. Chayta Pablo sumajta entienderqa, nerqataj: “Pisi kallpayoj kaspaqa atiyniyoj kani”, nispa (2 Cor. 12:7-10). ¿Imatataj chanta chaywan Pablo niyta munasharqa?
9 Pabloqa chaywan nisharqa, Jehová Dios atiyta qonanta, ima llakiytapis aguantananpaj. Nishallarqataj Diospa atiyninwan mana ruway atinasta ruwananta. Arí, Jehová Diosqa noqanchejtapis yanapawasunman ima llakiytapis aguantanapaj.
Sumaj yachachiykunata maskʼana
(2 Corintios 12:2-4) Uj runata rejsini, pichus Cristoj yachachisqan. Payqa 14 watas ñaupajta, kinsa kaj cieloman ujllata oqharisqa karqa. Manataj yachanichu, aycha cuerponpichus oqharisqa kasqanta chayri manachus. Chaytaqa Dioslla yachan. Arí, chay runataqa rejsinipuni. Payqa paraisoman ujllata oqharisqa karqa. Manataj yachanichu, aycha cuerponpichus oqharisqa kasqanta chayri manachus. Chaytaqa Dioslla yachan. Paraisopi kashaspa, chay runaqa mana willay atina palabrasta uyarerqa, mayqenkunatachus runasqa mana parlanankuchu tiyan, chaykunata.
Leejkunaj tapuyninku
2 Corintios 12:2 versiculopi ‘kinsa kaj cielomanta’ parlan. Chay ‘kinsa kaj cieloqa’ ninakunman Señorninchej Jesús, 144.000 ajllasqa cristianoswan gobernamunankuwan. Chay Gobiernoqa ‘mosoj cielowan’ ninakullantaj (2 Ped. 3:13).
Chay Gobiernotaqa ‘kinsa kaj cielo’ nikun may sumaj Gobierno kasqanrayku.
¿Ima paraisomantataj apóstol Pablo parlasharqa? Ichapis parlasharqa kay jallpʼa patapi uj Paraíso kananmanta, mosoj jallpʼapi Diospa kamachisnin ujchasqas sonqo tiyasqastaj kausakunankumanta, cielopi kaj ‘Diospa paraisonmanta’ ima. Chaykunataj mosoj jallpʼapi kanqapuni.
(2 Corintios 13:12) Napaykunakuychej ujkuna ujkunata llimphu sonqowan muchʼaykunakuspa.
it-1-S pág. 317, párr. 5
Muchʼay
“Llimphu sonqowan muchʼaykunakuspa”. Mosoj Testamentoqa parlan runas ‘llimphu sonqowan’ chayri ‘munakuywan muchʼaykunakuspa’ saludanakusqankumanta (Ro 16:16; 1Co 16:20; 2Co 13:12; 1Te 5:26; 1Pe 5:14). Ichapis paykunaqa qharipura chayri warmipura ajinata saludanakoj kanku. Cristianosqa ichapis ajinata saludanakoj kanku, hebreos ñaupa tiempo ajinata saludanakusqankurayku. Bibliapeqa mana anchata parlanchu imaynatachus saludanakusqankumanta. Jinapis saludanakuspaqa ‘llimphu sonqowan muchʼaykunakuspa’ chayri ‘munakuywan muchʼaykunakuspa’ rikucherqanku congregacionpi munanakusqankuta, ujchasqataj kasqankuta (Jn 13:34, 35).
Bibliata leenapaj
27 DE MAYO–2 DE JUNIO
BIBLIAMANTA SUMAJ YACHACHIYKUNA | GÁLATAS 1-3
“Uyanpi niporqani”
(Gálatas 2:11-13) Chantá Cefas Antioquiaman jamojtin, uyanpi niporqani mana allinta ruwasqanta. 12 Imaraykuchus Santiagoj kachamusqan runas niraj chayamushajtinku, payqa mana judío kajkunawan mikhoj. Paykuna chayamojtinkutajrí, manaña chayta ruwarqachu. Astawanpis karunchakaporqa, judiosta manchachikusqanrayku. 13 Chay waj judiospis, Pedroj puraj uya kayninta qhatillarqankutaj. Bernabetapis chay puraj uya kayninkuwan pantachillarqankutaj.
Jehová jina cheqan kajta qhawana
16 (Gálatas 2:11-14 leey). Pedroqa runata manchachikorqa (Pro. 29:25). Payqa imatachus Jehová mana judío kajkunamanta yuyasqanta yacharqa. Jinapis manchachikorqa judíos pisipaj qhawanankuta, mana judío kaj hermanoswan khuska kasqanmanta. Apóstol Pabloqa, Pedroman “puraj uya” kasqanta nerqa. Imaraykuchus Pabloqa Jerusalenpi 49 watapi uj tantakuypi Pedrota uyarerqa, mana judío kajkunamanta sumajta parlasqanta (Hech. 15:12; Gál. 2:13). ¿Imatá ruwarqanku mana judío kajkuna Pedro sonqosninkuta nanachejtin? ¿Diosta yupaychayninkupi pantachinantachu saqerqanku? ¿Niñachu congregacionpi Pedro llankʼayninta ruwarqa?
(Gálatas 2:14) Paykuna mana cheqa kaj sumaj willaykunaman jinachu purishasqankuta rikuspa, Cefasta tukuypa ñaupaqenpi nerqani: “Qanchus judío kashaspa mana judío jina kausanki chayqa, ¿imaynatataj mana judío kajkuna, judío jina kausanankuta munankiri?”, nispa.
Mana imapis “miskʼachiyta” atiwanchejchu
12 Pedroqa Jesusman, Jehovaman ima cheqa sonqo kajtinpis, runata manchachikusqanrayku wakin kutispi mayta pantarqa. Sutʼincharinapaj, runaspa ñaupaqenpi Yachachejninta mana rejsisqanta nerqa, mana uj kutillatachu manaqa kinsa kutita (Luc. 22:54-62). Aswan qhepamantaj, mana cristiano jinachu ruwarqa, imajtinchus mana judío cristianosta pisipaj qhawasqanta rikucherqa. Apóstol Pablorí mana kikintachu yuyarqa. Payqa qotuchakuypi mana tʼaqanakus, nitaj qhawanakus kananta yacharqa. Pedroqa mana allintachu ruwasharqa. Chayrayku, niraj tukuy hermanos Pedroj puraj uya kayninta qhatishajtinku, Pabloqa uyanpi niporqa mana allinta ruwashasqanta (Gál. 2:11-14). ¿Maytachu Pedro chaymanta phiñarikorqa, wiñay kausayman apaj ñanmantapis llojsiporqachu? Mana. Payqa Pabloj yuyaychasqanpi tʼukurispa kasukorqa, ñaupajllamanpunitaj rerqa.
Sumaj yachachiykunata maskʼana
(Gálatas 2:20) Cristowan khuska kʼaspipi clavasqa kashani. Manañataj noqapajchu kausani, manachayqa Cristoj kamachin jina kausani. Arí, noqaqa Diospa Wawanpi creesqayman jina kausashani. Paymin munakuwarqa, noqaraykutaj kausayninta qorqa.
w14 15/9 pág. 16 párrs. 20, 21
Ñakʼariykunapipis Diosta cheqa sonqo sirvinallapuni
20 ¿Imaynatá Satanaspa tojllasninta atipasunman? ¿Imaynatá llakiykunata atipasunman? Apóstol Pablo jina Jesús noqanchejrayku wañusqanpi tʼukurispa. Pabloqa juchasapa kasqanrayku, wakin kutis ni imapaj valesqanta yuyarqa. Yacharqataj Jesús mana juntʼa runasraykuchu wañusqanta, manaqa juchasapa runasrayku. Chayrayku nerqa: “Diospa Churimpi creesqayraykulla kawsashani. Paymin munakuwarqa, noqaraykutaj wañuchisqa kanampaj jaywaykukorqa”, nispa (Gál. 2:20). Pabloqa Jesuspa wañuyninpi creerqa, yacharqataj paynejllata salvasqa kananta.
21 Jesuspa wañuynin sapa ujninchejta yanapawasqanchejpi tʼukureyqa mayta yanapawasunman. Chaytaj mana ninayanchu, llakiyninchej chay rato chinkananta. Wakenqa ichá llakiykunasninchejta atipanapaj paraíso chayamunankama kallpachakuna kanqa. Chayrayku, ¡mayta kallpachakunallapuni! Imaraykuchus tukukuykama sinchʼita sayajlla salvasqa kanqa. Tumpamantawantaj Diospa Reinon allin kausayta apamonqa. Cheqa sonqo runastataj juntʼa runaman tukuchenqa. Chayrayku ñakʼariykunata atipanayki kajtinpis, Diospa Reinonpa kamachiyninpi kausakunaykipaj, ¡mayta kallpachakuy!
(Gálatas 3:1) ¡Ay mana yuyayniyoj Galaciamanta kajkuna! Qankunamanqa ñaupajtaña sutʼita yachacherqayku Jesucristo kʼaspipi wañusqanmanta. ¿Pitaj umaykichejta muyuchisorqachejri?
it-1-S pág. 984 párr. 3
Galatasman carta
Pablo nerqa: “Ay, mana yuyayniyoj Galaciamanta kaj hermanos”, nispa. Pabloqa chayta nispa mana uj grupo runasllamantachu parlasharqa, nisunman mana norte ladopi tiyakojkunallamantachu (Gál 3:1). Astawanpis Pabloqa Galaciamanta congregacionespi kaj wakin hermanosta kʼamisharqa. Imajtinchus chay hermanosqa, judiospa wakin yachachiykunasninkuta chimpaykuchikusharqanku. Chaypacha runasqa, niña Moisesman qosqa leyman jina kausakusqankuraykuchu allinpaj qhawasqa kananku karqa, manaqa Cristopi creesqankurayku. Wakin judiostajrí Moisesman qosqa leyman jina ruwaspallapuni cheqan runaspaj qhawachikuyta munarqanku, nitaj ‘Cristopi creesqankuraykuchu’ (Gál 2:15–3:14; 4:9, 10). ‘Galaciapi kaj hermanosmanta’ wakenqa judíos karqanku, wakintaj mana judioschu karqanku (Gál 1:2). Paykunamanta wakenqa ichapis celta ayllumanta karqanku (Hch 13:14, 43; 16:1; Gál 5:2). Tukuynin hermanostataj sutichakorqa galatasmanta cristianos nispa Galaciapi tiyakusqankurayku. Pablo galatasman tukuynin qhelqasqanta leerispaqa, reparanchej Pabloqa chay kutipi sur ladopi kaj cristianosman qhelqashasqanta. Pabloqa sur ladomanta cristianoswan sumajta rejsinakorqa. Norte ladopi kaj cristianoswantaj mana rejsinakorqachu. Chantapis nisina ni maykʼaj visitarqachu. Galaciaqa Romaj japʼiyninpi kasharqa.
Bibliata leenapaj