LECCIÓN 19
¿Jehovaj testigosnin cheqa cristianospunichu kanku?
¿Jehovaj testigosnin cheqa cristianoschu kayku? ¿Biblia nisqanman jinachu ruwayku? ¿Imaraykutaj Jehovaj testigosnin sutikuyku? ¿Imaraykutaj purajmanta munanakuyku? Chay imasta kaypi yachakusun.
1. ¿Jehovaj testigosnin Bibliaj nisqantapunichu yachachiyku?
Jesús Jehová Diosman nerqa: “Palabraykeqa cheqapuni”, nispa (Juan 17:17). Chayrayku Jehovaj testigosnenqa Jesús jina Diospa Palabranmantapuni yachachiyku. Imaynatachus chayta unaymantapachaña ruwasqaykuta qhawarina. Kay 1870 wata chaynejta, uj grupo runas Diospa Palabranta astawan ukhuncharqanku. Chay yachakusqankutataj waj runasman willarerqanku.a Paykunaqa Bibliaj nisqantapuni yachacherqanku, chay yachachisqanku waj iglesiaspa yachachisqankuwan churanakojtinpis.
2. ¿Imaraykutaj Jehovaj testigosnin sutiwan rejsisqa kayku?
Jehovaqa payta yupaychajkunata testigosnin kasqankuta nin, paymanta cheqa kajta willasqankurayku (Hebreos 11:4–12:1). Chayrayku 1931 watamantapacha Jehovaj testigosnin sutiwan rejsisqa kayku. Chaytaj mayta kusichiwayku. Jesuspis ‘Atienekunapaj jina Testigollataj’ (Apocalipsis 1:5). Ñaupa tiempopipis Jehová Diosqa Israel llajtaman nerqa: “Qankuna testigosniy kankichej”, nispa (Isaías 43:10 leey).
3. ¿Imaynatá Jesús jina munakuyniyoj kasqaykuta rikuchiyku?
Jehovaj testigosnenqa llakiypi tarikoj hermanos yanapata necesitajtinku tukuy imaymanamanta yanapariyku. Chayta ruwayku hermanosniykuta munakusqaykurayku. Chantapis mundo enteropi uj familia jina kayku, ujchasqastaj kayku. Chayrayku ‘hermano’, “hermana” ninakuyku (Filemón 1, 2). Astawanpis kay kamachiyta kasukuyku: “Tukuy hermanosta munakuychej” (1 Pedro 2:17). Jesuspis discipulosninta mayta munakorqa, paykunatataj familianta jinapuni qhawarqa (Marcos 3:35 leey).
ASTAWAN YACHAKUNA
Kaypi astawan yachakusun Jehovaj testigosnin unaymantapachaña imastachus ruwasqaykuta. Yachakullasuntaj cheqa cristianospunichus manachus kasqaykuta.
Cheqa cristianosqa Biblia nisqanman jinapuni ruwayku, waj runasmanpis Bibliamantapuni yachachiyku.
4. Jehovaj testigosnenqa Bibliaj nisqantapuni yachachiyku
Jehová Diosqa unayña willacherqa Bibliaj nisqan aswan sutʼita entiendekunanta. Daniel 12:4 leeriychej, chantá yachakojta tapuriy:
¿Imataj ‘ashkhayanan’ kasqa?
Charles Russell, compañerosnin ima, Diospa Palabranta sumajta ukhuncharqanku. VIDEOTA qhawariychej, chantá yachakojta tapuriy:
Kay videopi rikusqanchejman jina, ¿imatataj ruwarqanku Russellwan compañerosninwan Diospa Palabranta entiendenankupaj?
Astawan yachanaykipaj
¿Imaraykutaj Jehovaj testigosnin wakin yachachiykunata cambiayku? Chayta ruwayku wakin imasta aswan sutʼita entiendesqaykurayku. Imaynatachus inti llojsimusqanman jina tukuy imata aswan sutʼita rikunchej, ajinallatataj Diospis yanapawayku Palabranta pisimanta pisi aswan sutʼita entiendenaykupaj (Proverbios 4:18 leey). Jinapis Bibliaj nisqanqa kikillanpuni.
5. Ima sutiwanchus rejsisqa kayku chayman jina ruwayku
Imaraykuchus Jehovaj testigosnin sutiwan rejsisqa kasqaykuta yachanapaj VIDEOTA qhawariychej, chantá yachakojta tapuriy.
Jehovaj testigosnin suti, ¿imaraykutaj noqanchejpaj jinapuni?
¿Imaraykutaj Jehová runasta ajllan testigosnin kanankupaj? Imaraykuchus paykunaqa Jehovamanta cheqa kajta willanku. Unaymantapachaña Diosmanta llulla yachachiykuna tiyan. Chaykunamanta wakinta qhawarina.
Wakin iglesiaspi yachachinku Diosta yupaychanapajqa santosman, waj imasman kʼumuykukuna kasqanta. Levítico 26:1 leeriychej, chantá yachakojta tapuriy:
¿Iglesiaspi yachachisqankuman jinachu kasqa? ¿Diosninchej munajchu kasqa santosman kʼumuykukunata?
Wakin pastorespis curaspis, Dioswan Jesuswan ujlla kasqankuta yachachinku. Juan 20:17 leeriychej, chantá yachakojta tapuriy:
¿Pastoreswan curaswan yachachisqankuman jinachu kasqa? ¿Dioswan Jesuswan ujllachu kasqanku?
¿Dioswan Jesuswan mana ujllachu kasqankuta yacharqankichu? ¿Jehovaj testigosnin chayta willasqankuta imaynatá qhawanki? ¿Qanpis paykuna jina willariyta munawajchu?
6. Jehovaj testigosnenqa purajmanta munanakuyku
Bibliaqa nin sapa uj cristiano cuerpoj imasnin jina kasqanta. 1 Corintios 12:25, 26 leeriychej, chantá yachakojta tapuriy:
¿Imatataj cheqa cristianos ruwananku kasqa waj cristianosta sufrejta rikuspa?
¿Qan niwajchu Jehovaj testigosnin purajmanta munanakusqankuta?
Uj llajtamanta hermanos llakiypi rikukojtinku, mundontinmanta hermanosqa chay rato yanaparinku. VIDEOTA qhawariychej, chantá yachakojta tapuriy.
Jehovaj testigosnin hermanosninkuta munakusqankurayku, ¿imaynasmantataj yanaparerqanku?
Cheqa cristianosqa munakuyniyoj kasqankurayku llakiypi kajkunata yanaparinku.
WAKIN RUNAS NINKU: “Jehovaj testigosnenqa kunallanraj rikhurinku”, nispa.
¿Maykʼajmantapachataj Jehová Diosta yupaychajkuna paypa “testigosnin” kanku?
¿IMASTÁ YACHAKUNCHEJ?
Kaypi yachakunchej Jehovaj testigosnin cheqa cristianos kasqankuta, maypi tiyakuspapis uj familia jina kasqankuta ima. Yachakullanchejtaj Biblia nisqanman jina ruwasqankuta, Jehovamanta cheqa kajta willasqankuta ima.
Yuyarikunapaj
¿Imaraykutaj Jehovaj testigosnin sutiwan rejsisqa kayku?
¿Imaynasmantá rikuchiyku purajmanta munanakusqaykuta?
¿Qan creenkichu Jehovaj testigosnin cheqa cristianospuni kasqankuta?
ASTAWAN YACHAKUNAYKIPAJ
¿Pikunataj Jehovaj testigosnin kanku? Chayta yachanaykipaj kay videota qhawariy.
Jehovaj testigosnin creesqankuman jina kausakunku. 1 kaj: Laqhamanta kʼanchayman llojsinku (1:00:53)
Jehovaj testigosnenqa wajkuna Diosmanta llullasta yachachisqankuta sutʼiman orqhonku. Chayta yachanaykipaj kay videota qhawariy.
Jehovaj testigosninmanta, ¿imastawantaj yachayta munawaj? Chayta yachanaykipaj kayta leeriy.
“¿Imatá tapukunku Jehovaj testigosninmanta?” (Chaytaqa Internetpi jw.org nisqapi tarinki)
Uj runaqa waj colorniyoj runasta chejnikusqanrayku paykunata maqaykoj. Jinapis, ¿imataj cambiananpaj yanaparqa? Paymanta yachanaykipaj kayta leeriy.
“Kausayneyqa astawan mana allinman tukusharqa” (Torremanta Qhawaj, 1 de julio de 2015)
a Jehovaj testigosnenqa 1879 watamantapacha Torremanta Qhawaj revistata orqhoshallaykupuni Bibliaj nisqanta sutʼinchanaykupaj.