Leejkunaj tapuyninku

Hebreos 4:12 “Diospa Palabranqa kawsayniyoj, atiyniyojtaj” nisqan, ¿imatá niyta munan?

Chay versiculoj ñaupaj versiculosninta leerispa, reparanchej apóstol Pabloqa Diospa munayninmanta parlashasqanta, Biblia willasqanman jina.

Publicacionesqa Hebreos 4:12 versiculota ashkha kutista oqharin, Biblia runaspa kausayninta tijrachiyta atisqanta rikuchinanpaj. Ajinata sutʼinchaspataj mana pantanchu. Jinapis Hebreos 4:12 imapajchus qhelqakusqanta yachayqa, mayta yanapawasun. Pabloqa hebreo cristianosta nisharqa, Diospa munaynin juntʼakunanpaj yanapakunankuta. Diosmanta Qhelqasqapitaj, chaymanta ashkha kutista sutʼinchakun. Pabloqa chay cristianosman israelitasmanta yachakunankuta nerqa. Jehovaqa israelitasta Egiptomanta orqhomorqa, Sumaj Jallpʼamantaj yaykuchinanta nerqa, maypichus “lechewan, miskʼiwan yaku jina purishan, chayman”. Chaypeqa cheqamantapuni samarikunkuman karqa (Éxo. 3:8; Deu. 12:9, 10).

Chaytaj Diospa munaynin karqa. Chaywanpis israelitasqa sonqonkuta rumiyacherqanku, nitaj Jehovapi creerqankuchu. Chayrayku paykunamanta ashkhas, chay samarikuyman mana yaykorqankuchu (Núm. 14:30; Jos. 14:6-10). Jinapis Pabloqa, “Diospa samarichiyninman” yaykuyta atikusqantaraj nerqa (Heb. 3:16-19; 4:1). Chay samaricheyqa, Diospa munayninwan ujchasqa kashan. Hebreo cristianos jina, noqanchejpis Diospa munayninmanta leesunman, juntʼakunanpajtaj yanapakusunman. Pabloqa chay samarikuymanta Diosmanta Qhelqasqapi parlakusqanta rikuchinanpaj, Génesis 2:2 chantá Salmo 95:11 oqharerqa.

“Diospa samarichiyninman” yaykuyta atisqanchejtaraj yachaspa, mayta kusikunchej. Chay samarikuyman yaykunanchejtataj yachanchej, Biblia chayta nisqanrayku. Chayrayku chayman yaykunapaj tukuy imata ruwanchej. Chaypajtaj mana Moisespa Leynintachu juntʼanchej, nitaj waj imasta ruwaspachu Dioswan allinpaj qhawachikuyta maskʼanchej. Astawanpis creesqanchejrayku, Diospa munaynin juntʼakunanpaj yanapakunchej, chaytataj ruwallasunpuni. Jallpʼantinmanta may chhikha runas Bibliata estudiayta qallarinku, Diospa munaynintataj yachakunku. Paykunamanta ashkhastaj, Diospi creeyta qallarispa ñaupa kausayninkuta saqenku, bautizakunkutaj. Chay ruwasqankoqa, sutʼita rikuchin “Diospa Palabranqa kawsayniyoj, atiyniyojtaj” kasqanta. Jehová munayninta Bibliapi willasqanqa, kausayninchejpi mayta yanapawanchej, atiyniyojllapunitaj kanqa.