Mañakuy

7 ¿Dios uyarinchu mañakuyninchikta?

RUNASQA kayta astawan tapukunku, rikunchikjina, Diosqa wakin mañakuykunallata uyarin. ¿Mañakusqanchikta uyarinchu? Chayqa, ñuqallanchikmanta kachkan.

Jesusqa, tiemponpi religionesta kamachiqkunap mañakuyninkuta qhisacharqa. Puraq uyas kasqankurayku. Paykunaqa, allinta qhawachikullayta munaq kanku. Chayrayku, Jesús nirqa: Paykunaqa “tʼinkayojña kanku”, nispa. Paykunaqa, mana Dioswan uyarichikuytachu maskʼachkarqanku, manaqa runaswan allinta qhawachikuyllata maskʼachkarqanku. Chayrayku, runasllapaq allin qhawasqa karqanku (Mateo 6:5). Jinallataq kunanpis, runasqa mañakuchkaspa, mana Diospi yuyankuchu, manaqa paykunallapi. Mana Biblia nisqanmanjina mañakusqankurayku, mana Dioswan uyarichikunkuchu.

¿Ñuqanchikrí munanchikchu uyarichikuyta? Jehová uyarinawanchikpaqqa, mana juk laya runallatachu, nitaq juk suyullamantachu, nitaq qullqiyuqchu kana. Bibliaqa nin: “Diosqa mana wakillantachu allimpaj qhawan” manaqa “mayqen nacionllamantapis picha Diosta manchachikoj, cheqa kajtataj ruwaj runatamin Diosqa allin ñawiwan qhawan”, nispa (Hechos 10:34, 35). ‘Diosta manchachikuqqa’, Diosta jatunpaq qhawan, mana ima saqratapis ruwanchu. ‘Chiqa kaqta ruwaqtaq’, mana paypa munayninta ruwananpaq, manaqa Diospa munayninta ruwananpaq kallpachakun. Chayrayku, Dios uyarinawanchikpaqqa, Palabran niwasqanchikmanjina mañakuna.a

Runasqa, Dios milagroniqta mañakuyninkuman kutichinanta suyanku. Chaywanpis, unaymantapacha Diosqa, mana milagroniqtapunichu mañakuyninkuman kutichiq. Bibliap nisqanmanjina, juk milagromanta wak milagrokama, may unay watas pasaq. Chaywanpis milagrosqa, apóstoles wañusqankutawan tukukunan karqa (1 Corintios 13:8-10). Chaytaq mana ninayanchu, Diosninchik mañakuyninchikta mana kutichinantaqa. Imaynatachus kay tiempopi Jehová mañakuykunaman kutichisqanta qhawarina.

Yachayta qun. Diosmanta tukuy yachayqa jamun, yuyaynintaq mana tukukuyniyuq. Chayrayku tukuy kallpawan mañakuqman, mana michʼakuspa yachayta qun (Santiago 1:5).

Espíritu santonta qun. Espíritu santowanqa, mana imapis kikinchakunchu. Imaraykuchus espirituqa Diospa kʼuchi kallpan. Chantapis, chʼampaykunata atipanapaq yanapawanchik, llakisqa kachkaptinchik sunquchawanchik, kʼacha runasmantaq tukuchiwanchik (Gálatas 5:22, 23). Astawanpis, Jesusqa Dios espiritunta necesitasqanchikmanjina quwananchikta niwanchik (Lucas 11:13).

Chiqa kaqta maskʼaqkunaman yachayta qun. Kay Hechos 17:26, 27, nisqanmanjina, tukuy kay pachamanta, may chhika runas, llampʼu sunqu kaqkuna, Diosta maskʼanku. Paykunaqa, Diospa sutinta, imatachus Jallpʼapaq, runapaq ima, ruwayta munasqanta yachayta munanku. Imaynatachus Diosman qayllaykuna kasqanta, yachayta munallankutaq (Santiago 4:8). Jehovamanta sutʼinchaqkunaqa, chayjina runaswan tinkukuspa, Bibliawan tapuykunasninman kutichiyta munanku.

¿Chayraykuchu kay revistata japʼikunki? ¿Diostachu maskʼachkanki? Ichapis kayqa, mañakuyniykiman juk kutichiy.

[Sutʼinchaynin]