Ashkha runasqa Christopher, Gina chantá Hannah jinallataj, Diosman qayllaykuyta atisqankuta yachanku. ¿Qanrí ima niwajtaj? ¿Diosman qayllaykuyta munawajchu? Ichá niwaj: “Jina juchasapa runa kaspapis, ¿Tukuy Atiyniyoj Diosman qayllaykuyta atiymanchu?”, nispa.

DIOSMAN QAYLLAYKUYTA ATINCHEJ

Bibliaqa Diosman qayllaykuyta atisqanchejta nin. Kay Isaías 41:8 versiculopi, Diosqa israelitaspa jatun tatanku Abrahamta ‘kausaqenpaj’ qhawasqanta nin. Chantapis Santiago 4:8 nin: “Diosman astawan qayllaykuychej; paypis qayllamusonqachej”, nispa. Rikunchej jina runasqa Payman qayllaykuyta atinchej. Jinapis, ¿imaynatá Diosman qayllaykusunman, payta mana rikuspapis?

Chay tapuyman kutichinapajqa, kaypi tʼukuriy: Noqanchejqa pillawanpis amigosta ruwakunapajqa, sutisninchejtaraj willanarikunchej, sapa kuti parlarinakunchej, yuyaycharinakunchej, kallpacharinakunchej, purajmantataj yanaparinakunchej. Diosman qayllaykunanchejpajpis kikillantataj ruwananchej tiyan. Chaymanta astawan qhawarina.

Kaypi tʼukuriy, amigoykej sutinta mana yachaspa, ¿amigoykipuni kasqanta niwajchu? Mana, ¿icharí? Bulgariamanta uj warmi Irina sutiyoj nin: “Diosman qayllaykunanchejpajqa sutintaraj yachana tiyan”, nispa. Kay revistaj ñaupaj kaj yachaqananpi rikorqanchej jina, Diosqa payman qayllaykunanchejta munan. Chayrayku Payqa Bibliapi niwanchej: “Ñoka Jehová cani, chayka sutiymin”, nispa (Isaías 42:8, Quechua de Cuzce [QC]).

Jehová Diosqa, sutinta rejsinanchejtapuni munan. Diospa sutenqa hebreo parlaypi tawa letraswan qhelqakun, chaytataj Tetragrámaton nikun. Chay Tetragramatontaj Hebreo Qhelqasqaspi 7.000 kutista jina rikhurin. Arí, Bibliapeqa waj sutismanta nisqa, Diospa sutin astawan rikhurin. Chayrayku nisunman Jehovaqa sutinta rejsinanchejta, oqharinanchejtataj munasqanta.a

Chay tijrachejkunamanta wakenqa Diospa sutin may llimphu kasqanrayku, mana uj imata jina oqharinallachu kasqanta yuyarqanku. Chaytaj cheqapuni, imajtinchus Diospa sutinta qhasi manakajllapaj oqhareyqa mana allinchu kanman. Chaywanpis Jehovaqa payta munakojkuna sutinta jatunchanankuta, rejsichinankuta ima munan (Salmo 69:30, 31; 96:2, 8). Chayrayku Jesusqa yachachisqasninman nerqa: “Janaj pachapi kashaj Tatayku, sutiyki jatunchasqa kachun”, nispa. Noqanchejpis Jehovaj sutinta runasman rejsichispaqa, Payta jatunchanchej. Chayta ruwaytaj Payman astawan qayllaykuchiwanchej (Mateo 6:9).

Diosqa Paypa “sutinta jatunchajkuna[ta]” mayta munakun (Malaquías 3:16). Pay nin: “Ñokapi munacuynin churaska caskanraycu, ñokapis payta librasaj. Wichayman payta churasaj sutiyta rejsiskanraycu. Ñokata wajyacuwanka, ñokataj payta contestasaj. Ñoka nacʼariypi paywan casaj. Payta librasaj, payman gloriata kosajtaj”, nispa (Salmo 91:14, 15, QC). Diosman qayllaykuyta munanchej chayqa, sutinta rejsinanchej tiyan, oqharinanchejtaj tiyan.

Amigosninchejwanqa telefononejta, Internetnejta chayri cartanejta parlarikunchejpuni. Diosman qayllaykunanchejpajpis, paywan parlarikunanchejpuni tiyan. ¿Imaynatá chayta ruwasunman?

Diosmanta mañakuspaqa paywan parlarinchej. Chaytaj mana runa masinchejwan parlay jinallachu. Imajtinchus Payqa tukuy imamanta aswan patapi kashan, tukuy kaj imastataj ruwarqa. Chayrayku Paymanta mañakushaspaqa nisqasninchejwan jatunpaj qhawasqanchejta rikuchina tiyan. Chantapis Pay uyarinawanchejpajqa, kay kinsa yuyaychaykunaman jina ruwananchej tiyan.

Ñaupaj kaj, mañakushaspaqa Jehová Diosllamanta mañakunanchej tiyan, mana Jesusmantachu, nitaj lantismantachu chayri santosmantachu (Éxodo 20:4, 5). Bibliaqa sutʼita nin: “Ama imamantapis phutikuychejchu, astawanqa Diosmanta mañakuspaqa, imatachus munasqaykichejta mañakuychej, tukuy imamanta graciasta qospallapuni”, nispa (Filipenses 4:6). Iskay kaj, Jehovamanta mañakuna Churin Jesuspa sutinpi. Imajtinchus Jesusllataj nin: “Mana pipis Dios Tataman chayayta atinchu, mana noqanejta rispaqa”, nispa (Juan 14:6). Kinsa kaj, imallatapis mañakusqanchejqa, Diospa munayninman jina kanan tiyan. Biblia nin: “Diospi tukuy sonqo atienekunchej. Chayrayku munayninman jinachus imallatapis mañakunchej chayqa, yachanchej pay uyarinawanchejta”, nispa (1 Juan 5:14).a

Amigosninchejwan sumajta apanakunapajqa mana ujnillanchejchu parlana tiyan, astawanpis uyariyta yachana tiyan. Dios parlashawajtinchejpis uyariyta yachanallanchejtaj tiyan. Chaywanpis, ¿imaynamantá Pay parlashawanchej?

Payqa Biblianejta parlawanchej (2 Timoteo 3:16, 17). Kaypi tʼukuriy, uj sumaj amigonchejpa cartanta leerispaqa, imatachus niyta munashawasqanchejta chay cartannejta uyarinchej. Kikillantataj Bibliata leespapis, Dios parlariwasqanchejta uyarinchej. Ajinallatataj Ginapis yuyan, paymantaqa kay revistaj ñaupaj kaj yachaqananpi parlarerqanchej. Pay nin: “Dios munakuywan qhawanawanta munani chayqa, ñaupajta ‘cartantaraj’, nisunman Bibliataraj leenay tiyan. Bibliata sapa pʼunchay leeyqa, Payman astawan qayllaykunaypaj yanapawan”, nispa. Qanrí, ¿sapa pʼunchaychu Bibliata leenki? Chayta ruwaspaqa Jehovaj nisqasninta uyarinki, paymantaj astawan qayllaykunki.

Uj mana rejsisqanchej runamanqa nichá nisunmanchu: “Imitallatapis necesitaspaqa nillawanki, noqaqa jaywasqaykipacha”, nispa. Chaytaqa ninchej munasqa amigosnillanchejman, paykunata yanapayta munasqanchejrayku, sonqontataj kusichiyta munasqanchejrayku.

Bibliaqa willawanchej kamachisnin kusisqa kausakunankupaj imatachus Jehová ruwasqanta. Sutʼincharina, rey Davidqa Diosta sumajta rejserqa. Chayrayku pay nerqa: “Señor Tata Diosníy, ashkha tʼukuna imasta noqaykupaj ruwarqanki, maytataj noqaykumanta yuyarikuwayku. [...] Sichus chaykunamanta willayman, parlaymantaj chayqa, mana tukuchiyta atiymanchu”, nispa (Salmo 40:5). Chantapis Jehovaqa, payta mana rejsejkunapajpis allin imasta ruwallantaj, “sonqo[sninku]tataj kusiywan juntʼachin” (Hechos 14:17).

Imaynatachá Jehová tukuy imata kusisqa kananchejpaj qowanchej, ajinallatataj noqanchejpis, Payta kusichinapaj kallpachakunanchej tiyan (Proverbios 27:11). Chayrayku tapurikuna, ¿imatá ruwananchej tiyan Payta kusichinanchejpaj? Biblia nin: “Amataj qonqaychejchu allin kajta ruwayta, jinallataj kapususqaykichejwan wajkunata yanapariyta. Chay jina ruwayqa Diosta kusichin uj sumaj jaywana jina”, nispa (Hebreos 13:16). ¿Allin kajta ruwaspallachu chayri wajkunata yanaparispallachu Diosta kusichisunman?

Mana. Imajtinchus Bibliaqa nin: “Mana creespaqa, mana atinchejchu Diospa ñawpaqempi allimpaj qhawasqa kayta”, nispa (Hebreos 11:6). Chantapis nillantaj, “Abrahamqa Diospa kawsaqen” kasqanta maypachachus “Diospa nisqampi creerqa” chaypacha (Santiago 2:23). Jesuspis, Jehová Dios bendecinawanchejpajqa, creeyniyoj kananchejta nerqa (Juan 14:1). Diosman qayllaykunanchejpaj, ¿imaynatá creeyninchejta kallpachasunman? Ñaupajtaqa Bibliamanta allinta yachakuyman yachakunanchej tiyan. Ajinamanta Diospa munayninta yachayta atisun, tukuy ruwasqasninchejwantaj kusichisun. Diosta sumajta rejsinanchejpaj, kasukunanchejpaj ima kallpachakojtinchejqa, creeyninchej astawan sinchʼiyanqa, Paytaj noqanchejman astawan qayllaykamuwasunchej (Colosenses 1:9, 10).

¿Imatá ruwananchej tiyan Diosman qayllaykunanchejpaj? Ñaupaj yachaqanaspi parlarisqanchejman jina, kay kinsa yuyaychaykunata yuyarina:

1. Jehová Diospa sutinta rejsinanchej tiyan, oqharinanchejtaj tiyan.

2. Dioswan parlarina paymanta mañakuspa, Bibliata leerispa ima.

3. Jehová Diosta kasukunapuni.

Diosman qayllaykunaykipaj, ¿kay kinsa yuyaychaykunaman jinachu ruwashanki? ¿Mayqenta ruwanaykipajtaj astawan kallpachakunayki tiyan? Kay yuyaychaykunaman jina ruwaspaqa, ashkha bendicionesta japʼisun.

Estados Unidosmanta uj warmi Jennifer nin: “Diosman qayllaykunanchejpaj kallpachakoyqa má qhasipajchu. Imajtinchus chayta ruwaspaqa Diospi astawan atienekunchej, sumajta rejsinchej, astawanpis mayta munakunchej. Chay tukuy bendicionestaj ni imawan kikinchakunchu”, nispa.

¿Qanpis Diosman qayllaykuyta munawajchu? Jehovaj testigosnenqa tukuy sonqo yanapasonqanku. Paykunaqa mana imata mañaspalla Bibliamanta yachachisonqanku. Chantapis maypichus tantakunku chay wasiman riwaj. Chaypeqa ashkha runas Diosta yupaychanku, jatunpajtaj qhawanku.a Risqaykiman jinataj pisimanta pisi salmista jina ninki: “Noqarí Diosman qayllakusaj. Noqapajqa chaymin aswan sumajqa”, nispa (Salmo 73:28).