¿Imaraykú David yuyarqa, Dios paymanta yuyarikusqantapuni? ¿Dios yuyarikusunkichu? Ashkha runasqa, “Tukuy Atiyniyoj Diosqa nichá noqaykumanta yuyarikullanpischu”, nispa ninku. ¿Imaraykú ajinata yuyanku?

Wakenqa chayta yuyanku, Dios runasmanta aswan patapi kasqanrayku. Chay jina patapipuni “Paypajqa tukuy naciones uj sutʼoj yaku jinalla, pesaspi uj chhika ñutʼu jakʼitu jinalla” kanku (Isaías 40:15, Qheshwa Biblia). Uj qhelqaj runa, pichus Diospi mana creenchu kayta nerqa: “Pi kasqanchejtapuni yuyasunman Dios imatachus ruwasqanchejpi interesakun ninapajri”, nispa.

Wakin runastaj juchata ruwasqankurayku, “ima uyaywan Dios yanapanawanta mañakuymanri”, nispa ninku. Uj runa Jim sutiyoj nin: “Mana imamantapis phiñarpakojlla kanaypaj Dios yanapanawanta mayta mañakoj kani. Jinapis sapa kuti rabiawan atipachikullajpuni kani. Kay jina sajra kasqayrayku nichá Diospis yanapayta munawanñachu nej kani”, nispa.

¿Dios may karupipunichu kashanman, mana yuyarikunawanchejpaj? ¿Jina juchasapa runasmanta yuyarikunmanchu? Diospa yanapayninwan kay tapuykunaman kutichisunman. Payqa Biblianejta sutʼita niwanchej yuyarikuwasqanchejtapuni, nitaj karupichu kasqanta. Hechos 17:27 nin: “Diosqa mana karupichu kashan sapa ujninchejmanta”, nispa. Kay qhepan kaj tawa yachaqanaspi parlarisun imatachus Biblia chaymanta yachachisqanta. Chantá imaynasmantachus qanmanta, jinallataj tukuyninchejmanta Dios yuyarikuwasqanchejta.

WAKIN RUNAS, ¿IMATÁ YUYANKU? Kunallanraj yachakun cielopeqa may chhika planetas kasqanta. Cieloqa may chhikanpuni kasqanrayku, ashkha runas ninku: “Kay Jallpʼanchej ni imapis kasqanrayku Diosqa imatachus ruwashanchej chayta nichá qhawarimullanpischu”, nispa.

¿IMATÁ BIBLIA YACHACHIN? Diosqa yuyarikuwanchejpuni, chayrayku Bibliata qowarqanchej. Pay nin: “Ñawisneyqa qanllapi kashan, yachachisqayki, yuyaychasqaykitaj”, nispa (Salmo 32:8).

Agarpi tʼukurina, payqa 3900 watas ñaupajtaña kausakorqa. Uj kuti Agarqa patronan Saraita pisipaj qhawarqa. Chayrayku Saraiqa payta kʼumuykachacherqa. Agartajrí chʼin pampaman ayqekorqa. Agar ajinata pantajtinpis, ¿Dios paymanta yuyarikorqachu? Bibliaqa nin Jehovaja angelnin Agarta taripaspa sonqochasqanta, “Dios uyarisunki llakiyniykita”, nispa. Agartaj nerqa: “Qan kanki Rikoj Dios”, nispa (Génesis 16:4-13).

Diosqa qantapis rikumushasunki, ¿imaynamantá? Entiendenapajqa uj munakuyniyoj mamawan kikincharina. Payqa juchʼuy wawitasnin aswan yanapata necesitasqankurayku, mana imanarpakunankupaj aswan sumajta qhawan. Ajinallatataj Diosqa, llauchʼiyasqa kashajtinchej yanapanawanchejpajpacha qhawamushawanchej. Diosqa nin: “Noqaqa patapi tiyakuni, may santo cheqapi. Jinallataj llampʼu sonqoyojwan, kʼumuykukojwan kashani, kʼumuykukoj sonqoyojkunata, sonqo pʼakisqastapis kusichinaypaj”, nispa (Isaías 57:15).

Jinapis ichá tapurikunki: “¿Allinpajchu Dios qhawawan? ¿Rijchʼaynillaytachu qhawan? ¿Imachus sonqoypi kasqanta yachaspa llakikuwanchu? ¿Rejsiwanpunichu?”, nispa.

WAKIN RUNAS, ¿IMATÁ YUYANKU? Ashkha runas yuyanku Diosqa pantaj runasta jinalla qhawawasqanchejta. Uj warmi Kendra sutiyoj, Diospaj kamachiykunasninta mana juntʼayta atispa mayta phutikoj. Chayrayku nerqa: “Manaña Diosmantapis mañakojchu kani”, nispa.

¿IMATÁ BIBLIA YACHACHIN? Jehová Diosqa sumajta rejsiwanchej, chantapis mana pantasqallanchejtachu qhawan. “Payqa yachan imamantachus ruwasqa kasqanchejta yuyarikun[taj] jallpʼalla kasqanchejta”. Chayrayku Payqa mana sajrata ruwasqanchejman jinachu, nitaj sajra kayninchejman jinachu pagawanchej. Astawanpis Payqa khuyakuwanchej, pesachikunchejtaj chayqa perdonawanchej (Salmo 103:10, 14).

Rey Davidpi tʼukurina, paymantaqa kay revistaj ñaupaj kaj yachaqananpi parlarerqanchej. Pay Diosman nerqa: “Ñawisniykeqa imaynatachus cuerpoy ruwakusharqa, chayta rikorqaña. Imaynachus kawsayniy kananta libroykipi qhelqasqaña karqa [...] Diosníy, allinta sonqoyta qhawaykuy; rejsiy sonqoyta”, nispa (Salmo 139:15, 16, 23). David wakin kutis mayta pantarqa chaypis, Jehová may llakisqa sonqonta rikunantapuni yacharqa.

Imaynachus kashasqaykita Jehová Dioslla sumajta yachan. Bibliaqa nin: “Runaqa ñawisnimpa rikusqallanta qhawan, noqatajrí mana runa jinallachu qhawani, manachayqa sonqota qhawani”, nispa (1 Samuel 16:7). Pay yachan imaraykuchus ajina kasqanchejta. Yachallantaj tatanchejmanchus chayrí mamanchejmanchus llojsikusqanchejta, imaynatachus wiñakusqanchejtapis. Chantapis aswan kʼacha runa kanaykipaj imatachus ruwashasqaykita jatunpaj qhawan, wakin kutis pantajtiykipis.

Dios qanmanta tukuy imata yachasqanwan, ¿imaynatá chaywan sonqochasunki?

WAKIN RUNAS, ¿IMATÁ YUYANKU? Runasqa mayta munanku sonqochasqa kayta. Jinapis wakenqa chʼampayninkupaj Diospa yanapayninta mañakuspaqa, paykunallapaj imatapis mañakushasqankuta yuyanku. Uj warmi Raquel sutiyoj nin: “Ashkha runas noqamanta aswan jatuchaj chʼampaykunasniyoj kasqankupi tʼukurispaqa, chʼampaykunasneyqa ni imapis kasqanta yuyani. Chayrayku Diospa yanapayninta niña mañakuyta munanichu”, nispa.

¿IMATÁ BIBLIA YACHACHIN? Diosqa runasta yanapananpaj, sonqochananpajwan uj imata ruwarqa. Tukuy runasqa, juchawan nacekorqanchej. Chayrayku Diospa kamachiykunasninta mana tukuynintapunichu juntʼayta atinchej. Jinapis Payqa “munakuwarqanchejña. Churintataj kachamorqa wañunampaj juchasninchejrayku” (1 Juan 4:10, Qheshwa Biblia). Jesús kausayninta qosqanrayku, Diosqa juchasninchejta perdonayta, sonqo yuyayninchejtapis llimphuchayta atin. Wiñay kausaytataj qoyta munawanchej.a Diosqa Churinpa kausayninta qospa, tukuy runasta jinallataj qantapis munakususqanta rikuchin.

Apóstol Pablomanta yachakuna. Payqa Jesús kausayninta qosqanpi tʼukurispa, kayta qhelqarqa: “[Diospa Churin] munakuwarqa, noqaraykutaj [...] jaywaykukorqa”, nispa (Gálatas 2:20). Jesusqa wañuporqa Pablo niraj cristiano kashajtin. Jinapis Pabloqa payrayku Jesús kausayninta qosqanta yacharqa. Chayrayku Diosmanta uj sumaj regalota jina qhawarqa.

Chaytaj qanpajpis uj sumaj regalollataj. Ajinamanta Diosqa may sumajpaj qhawasusqanta rikuchin. Chay regaloqa ‘wiñay sonqochayninwan kallpachasunkiman, allin kajllatapuni ruwanaykipaj, parlanaykipaj’ ima (2 Tesalonicenses 2:16, 17).

Jesusqa 2000 watas jinaña noqanchejrayku wañorqa, ¿imaynatá yachanchej kunankamapis Dios munakuwasqanchejta?

WAKIN RUNAS, ¿IMATÁ YUYANKU? Ashkha runas Diospi creespapis, mana qayllaykuyta atinapaj jina kasqanta yuyanku. Cristinaqa Irlanda llajtapi tiyakun, sapa semanataj iglesiaman rej. Pay nin: “Dios tukuy imata ruwasqanta yachani chaypis, Pichus kasqanta mana yachanichu. May karupitaj kasqanta yuyani”, nispa.

¿IMATÁ BIBLIA YACHACHIN? Ichá Diosmanta karupi kasqanchejta yuyasunman. Jinapis payqa ni jaykʼaj saqerpawasunchu. Jesús uj rijchʼanachinawan rikucherqa Tatan imaynatachus waqaychawasqanchejta. Nerqataj: “Uj runa pachaj ovejasniyoj kashajtin, sichus ujnin ovejan chinkanman chayqa, manachu jisqʼon chunka jisqʼonniyojta orqopi saqespa, chinkasqa kajta maskʼaj rinman?”, nispa. Chantá sutʼincharqa: “Ajinallatataj, janaj pachapi kashaj Tataykichej mana munanchu ujllapis kay juchʼuykunamanta chinkananta”, nispa (Mateo 18:12-14).

Diosqa “juchʼuykunamanta” sapa ujninkuta jatunpaj qhawan. Uj oveja chinkajtin, ¿imaynatá Pay maskʼan? Kay yachaqana qallariypi versículo nin jina, Pay pusamusqanta nisunman.

Diosqa llampʼu sonqoyoj runasta maskʼaspa pusamun. Ñaupa tiempopi, etiopiamanta uj runa carretanpi uj profeciata leespa risharqa, Diostaj uj cristianota Felipe sutiyojta kacharqa, chay runawan tinkumuspa chay profeciata sutʼinchananpaj (Hechos 8:26-39). Cornelioj wasinmanpis apóstol Pedrota Dios pusarqa. Cornelioqa soldadosta kamachej. Payqa Diosmanta mañakusharqa, Diosta sirvinanpajtaj kallpachakusharqa (Hechos 10:1-48). Apóstol Pablota, paywan kajkunatawan, Diosllataj Filipos llajtaj kantunpi mayu karqa chayman pusarqa. Chaypitaj, “Diosta yupaychaj warmi” Lidia kasharqa. Diostaj “Lidiaj sonqonta kicharerqa, Pabloj nisqanta tukuy sonqo uyarinampaj” (Hechos 16:9-15).

Rikunchej jina chay runasqa Jehovata maskʼasharqanku, Paytaj rejsichikunanpaj yanaparqa. Kunanpis, ¿pikunataj runasman Diosmanta willashanku wasisman chayri callesman rispa? Jehovaj testigosnin. Chayrayku kayta tapurikuy: “¿Paykunanejtachu Dios wajyarikushawan?”, nispa. Diosman astawan qayllaykunaykipaj paymanta yanapata mañakuy.a