1. ¿Imatá Mateo 6:9-13 versiculosmanta runasman yachachinchej?

ASHKHA runasqa Mateo 6:9-13 versiculospi padrenuestro nisqa mañakuymanta parlashasqanta yachanku. Noqanchejtaj runasman willashaspa chay mañakuymanta parlarinchej, Diospa Reinon uj gobierno kasqanta, tumpamantawan chay gobierno kay Jallpʼata uj paraisoman tukuchinanta ima yachachinapaj. Chantapis “sutiyki jatunchasqa kachun” nisqa palabrasmanta parlarillanchejtaj, Diosninchej sutiyoj kasqanta rikuchinapaj, chay sutita may jatunpaj qhawana kasqanta rikuchinapaj ima (Mat. 6:9).

2. ¿Imaynatataj yachanchej mañakushaspa mana kikin palabrasllatapunichu oqharinanchej kasqanta?

² Ashkha runasqa Diosmanta mañakushaspa kikin palabrasllata oqharinku. Chaywanpis Jesusqa mana ajinata mañakunatachu yachacherqa. Astawanpis pay nerqa: “Ama kutipakuspa ashkhata parlaychejchu”, nispa (Mat. 6:7). Chantá waj kutipipis Jesusqa yachachisqasninman imaynatachus Diosmanta mañakunankuta yachachishaspa, mana kikin palabrasllatachu oqharerqa (Luc. 11:1-4). Jesuspa mañakuynenqa imasmantachus mañakuna kasqanta yachachiwanchej.

3. ¿Ima tapuykunatataj ruwakusunman kay yachaqanasta ukhunchashaspa?

³ Kay yachaqanapi, qhepan yachaqanapi ima, padrenuestro mañakuymanta yachakusunchej. Chaykunamanta yachakushaspataj kaykunata tapurikuna: “¿Imaynatataj yanapawan astawan sumajta Diosmanta mañakuyta yachanaypaj? Padrenuestro nisqa mañakuyman jinachu, ¿kausakuni?”.

“JANAJ PACHAPI KASHAJ TATAYKU”

4. 1) ¿Imatataj “janaj pachapi kashaj Tatayku” nisqa yuyarichiwanchej? 2) ¿Imaraykutaj kay Jallpʼapi kausakuyta suyakojkuna Jehovata Tatáy niyta atillankutaj?

⁴ Jesusqa mañakuyninta qallarerqa “janaj pachapi kashaj Tatayku”, nispa. Ajinata mañakusqantaj yuyarichiwanchej Jehová Diosninchej Jallpʼantinmanta hermanosninchejpa tatan kasqanta (1 Ped. 2:17). Jehovaqa wakin cristianosta janaj pachapi kausakunankupaj ajllan, rejsikapuntaj paykunata wawasninpaj. Chayrayku nisunman Jehová paykunaj tatanku kasqanta (Rom. 8:15-17). Kay Jallpʼapi wiñaypaj kausakuyta suyakojkunapis Jehovata “Tatáy” nispa niyta atillankutaj, kausayta, imatachus necesitasqankuta ima qosqanrayku. Chantapis paykunaqa, juntʼa runasman tukojtinku, waranqa watas tukukusqantawan pruebata pasajtinku ima, Jehová Diospa wawasnin kanqanku (Rom. 8:21; Apo. 20:7, 8).

5, 6. 1) ¿Ima sumaj regalotataj tatas wawasninkuman qonkuman? 2) ¿Imatataj wawas ruwananku tiyan? (20 paginapi dibujota qhawariy.)

⁵ Tatasqa wawasninkuman uj sumaj regalota qonku, Jehová tatanku kasqanta yachachispa, imaynatachus mañakunankuta yachachispa ima. Sudafricamanta qotuchakuykunata waturej uj hermano, nin: “Wawasniy nacekusqankumantapacha sapa chʼisi Jehovamanta paykunawan mañakoj kani, viajaspalla mana chayta ruwajchu kani. Wawasneyqa, mañakushajtiyku may kusisqas, mana manchachikuspa kasqallankuta astawan yuyarikunku, nitaj ima palabrastachus oqharisqaytaqa. Sapallankumantaña Diosmanta mañakojtinkutaj, mana siminku ukhullapi mañakunankuta nerqani. Ajinamanta imatachus yuyasqankuta, imaynachus kashasqankuta ima, Jehovaman imaynatachus willasqankuta uyariyta aterqani. Chaytaj yanapawarqa imaynachus kashasqankuta yachanaypaj. Chantapis yanapayta aterqani Jehová Diosninchejmanta sumajta mañakuyta yachanankupaj, Jesús yachachisqanman jina mañakunankupaj ima”, nispa.

⁶ Chay hermanoj wawasnenqa wiñasqankuman jina Diosman astawan qayllaykorqanku. Kunantaj iskayninku qosayoj kanku. Diospajtaj tiempo juntʼasqata llankʼashanku. Rikunchej jina tatas, wawasninkuman Diosmanta yachachinanku, Dioswan masichakunankupaj yanapananku imaqa sumaj regalo kasqanta. Jinapis wawasqa Dioswan allinpi kasqankuta jarkʼanankupaj kallpachakunanku tiyan (Sal. 5:11, 12; 91:14).

“SUTIYKI JATUNCHASQA KACHUN”

7. 1) ¿Imataj noqanchejpaj may sumaj? 2) ¿Imaynatataj chayta jatunpaj qhawasqanchejta rikuchisunman?

⁷ Diospa sutinta rejsiyta atisqanchej, chay sutiwan rejsisqas kasqanchej imaqa may sumajpuni (Hech. 15:14; Isa. 43:10). Jesús imaynatachus mañakunata yachachishajtin, jinata nerqa: “Sutiyki jatunchasqa kachun”, nispa. Chaytaj niyta munan, Diospa sutin llimphuchasqa kananta munasqanchejta. Diospa sutinta rejsisqanchejta, chay sutiwan rejsisqa kasqanchejta ima, ¿imaynatá jatunpaj qhawasqanchejta rikuchisunman? Ruwasqanchejwan, nisqanchejwan ima, chay sutita mana chʼichichanapaj Diosmanta yanapata mañakuspa. Amataj ñaupa tiempomanta wakin cristianos jina kanachu, imaraykuchus paykunaqa mana yachachisqankuman jinachu kausaj kanku. Chayrayku apóstol Pablo qhelqarqa paykunarayku, runas Diospa contranpi sajrata rimasqankuta (Rom. 2:21-24).

8, 9. Diospa sutinta jatunchananpaj kallpachakoj hermanata, ¿imaynatá Jehová yanaparqa?

⁸ Noqanchejqa Diospa sutinta jatunchanapaj mayta kallpachakunchej. Sutʼincharinapaj, Noruegamanta uj hermana, qosan wañupojtin iskay watayoj wawitanwan qhepakorqa. Pay nin: “May llakisqa kasharqani. Sapa pʼunchaytaj uj horata jina Jehovamanta mañakorqani, llakiyniyta atipanaypaj yanapanawanta, kallpachanawanta ima. Manataj munarqanichu imatapis mana allinta ajllasqayrayku Satanás, Jehová Diosta asipayananta. Diosmanqa cheqa sonqollapuni kayta munarqani. Imaraykuchus Diospa sutinta jatunchayta, paraisopi waway tatanwan tinkunanta ima munarqani”, nispa (Pro. 27:11).

⁹ ¿Jehová chay hermanaj mañakuyninta uyarerqachu? Arí. Hermanoswan masichakusqanrayku, may kallpachasqa kasharqa. Phishqa watanmantaj uj ancianowan casarakorqa. Kunantaj wawanqa 20 watasniyojña kashan, chantapis bautizakunña. Chay hermana nin: “May kusisqa kashani, qosay wawayta uywaysiwasqanmanta”, nispa.

10. ¿Imaynatataj Jehová sutinta wiñaypaj jatunchanqa?

¹⁰ Jehová Diosqa, payta Kamachejninkuta jina mana qhawajkunata chinkachispa sutinta wiñaypaj jatunchanqa (Ezequiel 38:22, 23 leey). Chantá runasqa juntʼa runasman tukonqanku. Janaj pachapi kausakojkuna, kaj pachapi kausakojkuna ima Jehovata yupaychanqanku, sutintapis jatunchanqanku. Chay kutipiraj Diosqa “tukuy kaj chhikata kamachenqa” (1 Cor. 15:28).

“REINOYKI JAMUCHUN”

11, 12. ¿Imatataj Jehová 1876 watapi ruwarqa?

¹¹ Jesustaqa yachachisqasnin niraj janaj pachaman ripushajtin, taporqanku: “Señor, kunampachachu Israelpa reinonta watejmanta sayarichinki?”, nispa. Jesustajrí paykuna manaraj yachanankuchu kasqanta, astawanpis Reinomanta willamunankupi yuyanankuta nerqa (Hechos 1:6-8 leey). Chantapis yachachisqasninman yachacherqa Diospa Reinon jamunanta mañakunankuta, maykʼajchus chay Reino jamunanta suyanankuta ima. Chayrayku noqanchejpis Diospa Reinon jamunanta mañakushallanchejpuni.

¹² Jehovaqa, 1876 watapi kamachisninta Jesús 1914 watapi janaj pachapi kamachiyta qallarinanta entiendenankupaj yanaparqa. ¿Imaynatataj Jehová Dios yanaparqa? Chay watapi hermano Charles Russell “¿Maykʼajtaj mana judío kajkunaj pʼunchayninku juntʼakonqa?”, nisqa yachaqanata qhelqarqa. Chay yachaqanapeqa Danielpa ‘qanchis watas’ nisqa profecian, Jesuspa “[mana judío kajkunaj] pʼunchayninku juntʼakunankama” nisqan profeciawan, kikillan kasqanta sutʼinchakorqa (Dan. 4:16; Luc. 21:24). Chantapis chay yachaqanaqa sutʼincharqa chay tiempos 1914 watapi tukukunanta.a

13. 1) ¿Imataj karqa 1914 watapi? 2) ¿Imatataj rikuchiwanchej 1914 watamantapacha tukuy imas kasqan?

¹³ Europapi uj guerra 1914 watapi qallarerqa, chaytaj Jallpʼantinman chayarqa. Ashkha runastaj yarqhaymanta wañorqanku. Kay 1918 watapitaj gripe españolawan ashkha runas wañullarqankutaj. Tukuy chaykunataj Jesús nisqanman jina juntʼakusharqa (Mat. 24:3-8; Luc. 21:10, 11). Chaytaj, Jesús 1914 watapi kamachiyta qallarisqanta rikucherqa. Chay watapitaj Jesusqa “atipaspa llojserqa”, atipanallanpajpuni (Apo. 6:2). Satanasta, supaykunata imataj, kay Jallpʼaman wijchʼumorqa. Chay watamantapachataj kay profecía juntʼakorqa: “Ay, kay pacha jallpʼa patapi, mama qocha patapipis tiyakojkunamanta, imaraykuchus Kuraj Supayqa manchay phiñasqa qankunaman uraykʼamun, yachaspa paypaj pisi tiempollaña kasqanta” (Apo. 12:7-12).

14. 1) ¿Imaraykutaj Diospa Reinon jamunanta mañakushallanchejpuni? 2) ¿Imatataj ruwallasunpuni?

¹⁴ Apocalipsis 12:7-12 versiculosqa, Jesús kamachiyta qallarisqantawan imaraykuchus sajra ruwaykuna kay Jallpʼapi kasqanta yachanapaj yanapawanchej. Jesús janaj pachapi kamachishajtinñapis, Satanás kay Jallpʼata kamachishan. Tumpamantawan Jesusqa enemigosninta wiñaypaj atipanqa, tukuy ima sajra ruwaykunatapis chinkachenqa, chaykamataj Diospa Reinon jamunanta mañakunallapuni. Chantapis runasman Diospa Reinonmanta willamullasunpuni. Chayta ruwaspataj Jesuspa nisqanta juntʼashanchej. Pay nerqa: “Janaj pacha reinomanta evangelio tukuynejpi willasqa kanqa, tukuy runas yachanankupaj; chaypachamá tukukoyqa jamonqa”, nispa (Mat. 24:14).

‘MUNAYNIYKI RUWASQA KACHUN KAY PACHAPI’

15, 16. ¿Imaynatataj Diospa munaynin kay Jallpʼapi ruwakunanta mañakusqanchejman jina kausakusunman?

¹⁵ Casi 6.000 watas jina kashan, Diospa munaynin kay Jallpʼapi ruwakusqanmanta. Chayrayku Jehová “tukuy ima ruwasqanqa sumajpuni kasqanta” nerqa (Gén. 1:31). Satanastajrí, Diospa contranpi churakorqa, chaymantapachataj ashkha runas Diospa munayninta mana ruwankuchu. Jinapis kunanqa kay Jallpʼapi Diospa kamachisnin 8 millonesmanta astawan kanku. Paykunaqa mana Diospa munaynin kay Jallpʼapi ruwakunallantachu mañakunku, manaqa Diospa munayninta ruwanankupaj mayta kallpachakunku. Mañakusqankuman jinataj kausakunku, tukuy sonqotaj wajkunaman yachachinku.

¹⁶ Sutʼincharinapaj, uj misionera 1948 watapi bautizakorqa, Africapitaj Diosta sirvishan. Pay nin: “Sapa kuti Diosmanta mañakuni tiempo kashajtillanraj llampʼu sonqo runas payta rejsinankupaj. Pillamanpis Diosmanta willaj rispataj, Diosmanta mañakuni runaj sonqonman chayanaypaj yachayta qonawanta. Chantapis mañakullanitaj yanapanawanchejta willayninchejta japʼikojkunata yanapanapaj”, nispa. Chayraykuchá kay hermanata 80 watasniyoj kajtinpis willaypi may sumaj rin. Payqa, hermanospa yanapayninwan ashkha runasta yanapan Jehovaj testigosnin kanankupaj. Qanpis rejsinkichá Diospa munayninta tukuy sonqo ruwaj machitu hermanosta (Filipenses 2:17 leey).

17. ¿Imatataj yuyanki imatachus qhepaman Dios ruwananmanta?

¹⁷ Noqanchejqa, Diospa munaynin ruwakunanta mañakullasunpuni, Diospa enemigosnin chinkachisqa kanankukama. Chantá kay Jallpʼaqa uj paraisoman tukonqa, ashkha runastaj kausarimonqanku. Jesús nerqa: “Ama chay nisqaymanta tʼukuychejchu. Hora chayamonqa, chaypachataj tukuy pʼampasqa kajkunaqa [parlasqayta] uyarenqanku [...] kawsarimponqanku[taj]”, nispa (Juan 5:28, 29). Maytachá kusikusunchej munasqa familiaresninchejwan kausarimojtinku tinkuspa. Jehová Diostaj “tukuy waqayta ñawisnin[chej]manta pichanqa” (Apo. 21:4). Diosta, Churinta ima, mana rejsispa wañojkunapis kausarimonqanku. Mayta kusikusunchej paykunaman Jehovaj munayninta ruwanankupaj yachachispa, ajinamanta paykunapis wiñay kausayta japʼenqanku (Hech. 24:15; Juan 17:3).

18. ¿Imatataj runas astawan necesitanku?

¹⁸ Tumpamantawan Jehovaqa, padrenuestro mañakuymanta kinsa imasta juntʼanqa. Nisunman Reinon jamonqa, chay Reinontaj sutinta jatunchanqa, tukuy runastaj Payta yupaychanqanku. Ajinamantataj runasman imatachus necesitasqankuta qonqa. Qhepan yachaqanapitaj Jesuspa mañakuyninmanta waj imastañataj yachakusunchej.

1-3. ¿Imaraykutaj uj hermana Jehová mañakuykunasninman kutichisqanmanta mana iskayrayanchu?

UJ PRECURSORA Lana sutiyoj, Alemaniaman 2012 watapi viajarqa. Chay hermanaqa ni jaykʼaj qonqanqachu imaynachus chay viajepi risqanta. Nerqataj iskay mañakuykunasninman Jehová kutichisqanta. Payqa aeropuertoman trenpi rishaspa Jehovamanta yanapata mañakorqa pillatapis Reinomanta willarinanpaj tarinanta. Aeropuertoman chayajtintaj qʼayantinraj avión llojsinanta nerqanku. Chay hermanaqa qolqen manaña kapusqanrayku, ni maypi qhepakunanta yachasqanrayku ima Jehovaj yanapayninta mañakullarqataj.

² Mañakuyninta tukusqantawantaj uj runa, nerqa: “Lana, ¿imatá kaypi ruwashanki?”, nispa. Chay runaqa yachaywasipi kashajtin compañeron karqa, Sudafricamantaj viajasharqa. Chay runataqa maman, abuelan ima kacharpayaj risqanku. Chay hermana llakiyninmanta willarejtintaj, chay runaj maman, abuelan ima wasinkuman wajyarerqanku. Chantapis imapichus creesqanmanta, precursora jina llankʼashasqanmanta ima mayta tapurerqanku.

³ Qʼayantintaj chay hermanaqa Bibliamanta tapusqankuman kutichillarqapuni. Niraj suyunman kutipushaspataj waj hermanos, chay runasta waturej rinankupaj sutisninkuta, maypichus tiyakusqankuta ima qhelqarqa. Chay hermanaqa precursora jinallapuni llankʼashan, Jehová mañakuykunasninman kutichisqanmantataj mana iskayrayanchu (Sal. 65:2).

4. ¿Imatataj kay yachaqanapi yachakusunchej?

⁴ Chʼampaykunapi rikukuspaqa usqhayllata Jehovamanta yanapata mañakunchej. Paytaj uyariwanchej, tukuy sonqotaj yanapawanchej (Sal. 34:15; Pro. 15:8). Jesusqa Diosmanta imaynatachus mañakunata yachachishaspa, imastachus astawan mañakuna kasqanta nerqa. Kay yachaqanapeqa chay mañakuymanta tawa imastawan yachakusunchej, imaynatachus chaykuna Diosman cheqa sonqo kanapaj yanapawasqanchejtapis (Mateo 6:11-13 leey).

‘SAPA PʼUNCHAY TʼANTAYKUTA QOWAYKU’

5, 6. ¿Imaraykutaj mikhuna kapuwajtinchejpis ‘tʼantaykuta qowayku’ nispa mañakunanchej tiyan?

⁵ Jesusqa mana “tʼantata kunan qoway”, nispa mañakunatachu yachachiwarqanchej, manaqa “tʼantaykuta kunan qowayku”, nispa. Kunantaj qhawarinachej imaynatachus Africapi qotuchakuykunata waturej Victor sutiyoj hermano ruwasqanta. Pay nin: “Jehovaman graciasta qoni imaraykuchus warmiywan noqawan mana llakikuykuchu imatachus mikhunaykumanta, nitaj wasimanta alquilerta paganaykumantapis. Chaykunawan hermanos yanapawayku. Chantapis Jehovamanta mañakuni qolqemanta pisichikoj hermanosta yanapananta”, nispa.

⁶ Ichapis noqanchejqa mikhunamanta mana pisinchejchu, chaywanpis wajcha hermanosninchejpaj, waj ñakʼariykunapi rikukojkunapaj ima Diosmanta mañapusunman. Chantapis waj imasta ruwallasunmantaj yanapanapaj. Sutʼincharinapaj, imachus kapuwasqanchejmanta paykunaman qorisunman. Chantapis Reinomanta Jallpʼantinpi willakunanpaj qolqenchejmanta qorillasunmantaj. Yachanchej chay qolqeta qosqanchejqa necesitaj hermanosninchejta yanapasqanta (1 Juan 3:17).

7. ¿Imamantataj Jesús parlarqa “qʼaya pʼunchaymanta” mana anchata llakikunanchejta nispa?

⁷ Jesusqa Diosmanta mañakunata yachachiytawan, yachachillarqataj imastachus necesitasqanchejmanta mana anchata llakikunata. Sutʼincharqataj, campo tʼikasta Dios kʼachituta pʼachallichisqanta. Chantá tapurerqa: “Pisi creeyniyoj runas. Manachu qankunapajqa aswan sumajtaraj ruwanqa? Chayrayku, ama phutikuychejchu [...] imawantaj pʼachallikusun?”, nispa. Chantapis pay nillarqataj: “Ama phutikuychejchu ari, qʼaya pʼunchaymanta”, nispa (Mat. 6:30-34). Chay nisqanmanta kapuwasqallanchejwan kusisqas kausakunata yachakunchej. Sutʼincharinapaj, Diosmanta mañakusunman maypichus tiyakunata, mikhunapaj uj llankʼayta, onqosqa kashaspa imaynatachus jampichikuyta sumajta ajllanapaj yanapanawanchejta ima. Chaykunata mañakuspapis, ¿imastawanraj Diosmanta astawan mañakusunman?

8. ¿Imatataj yuyarichiwanchej “tʼantaykuta kunan qowayku”, nisqa palabras? (25 paginapi dibujota qhawariy.)

⁸ “Tʼantaykuta kunan qowayku”, nisqa palabrasqa, yuyarichiwanchej Diosmanta mañakunallanchejpuni kasqanta, cheqa yachachiyta mikhunata jina maychus tiemponpi qonawanchejpaj. ¿Imaraykú ajinata mañakunchej? Jesús nerqa: “Mana tʼantallawanchu runaqa kawsanqa; astawanqa, Diospa siminmanta tukuy llojsimoj palabraswan kawsanqa”, nispa (Mat. 4:4).

“JUCHASNIYKUTA PAMPACHAPUWAYKU”

9. ¿Imaraykutaj nisunman juchallikuspa Diosman manu kasqanchejta?

⁹ Jesusqa Diosmanta imaynatachus mañakunata yachachishaspa, nerqa: “Manu caskaycumanta perdonawaycu[...]”, nispa. Chantá waj kutipi nillarqataj: “Juchasniykuta pampachapuwayku”, nispa (Mat. 6:12, Mosoj Testamento 1956; Luc. 11:4). Jesús chayta nerqa, juchasninchej uj manuwan kikinchakusqanrayku. Kay revista 1952 watapi sutʼincharqa Diosta munakunanchej, kasukunanchej ima kasqanta. Chantapis nillarqataj juchallikuspaqa, Diospa sonqonta nanachishasqanchejta. Chayrayku nisunman Dioswanqa manupi jina kasqanchejta. Jehová munanman chayqa manaña amigonchejchu kanman. Chantapis chay revistaqa nillarqataj: “Juchallikuspaqa, Diosta mana munakusqanchejta rikuchinchej”, nispa (1 Juan 5:3).

10. 1) ¿Imaraykú Jehová perdonawanchej? 2) Jehová perdonawasqanchejrayku, ¿imatataj ruwananchej tiyan?

¹⁰ Jehová Diosman mayta agradecekunchej, Jesusta juchasninchejrayku wañunanpaj kachamusqanmanta. Sapa pʼunchay Jehová perdonanawanchejta necesitanchej. Jesús kausayninta qosqanmanta iskay waranqa watasmanta astawan kashan, wañuynintaj kunankama yanapashallawanchejpuni. Chayrayku Jehovaman mayta agradecekunanchej tiyan. Jesús kausayninta mana qonmanchu karqa chayqa, juchamanta, wañuymanta ima mana kacharichisqachu kasunman karqa (Salmo 49:7-9; 1 Pedro 1:18, 19 leey). Jesusqa “juchasniykuta pampachapuwayku”, nispa Diosmanta mañakunanchejta yachachiwarqanchej, chaytaj yuyarichiwanchej tukuy cristianos Diospa khuyakuyninta necesitasqanchejta. Arí, Jehovaqa munan hermanosninchejpi yuyananchejta, paywan allinpi kanankupi ima. Chaytataj rikuchisunman contranchejpi juchallikojtinku perdonaspa. Imaraykuchus hermanosninchejqa contranchejpi mana jatun juchastachu ruwanku. Hermanosninchejta perdonaspaqa paykunata munakusqanchejta, Jehovaman perdonawasqanchejmanta may agradecesqa kasqanchejta ima rikuchinchej (Efe. 4:32).

11. ¿Imaraykutaj wajkunata perdonananchej tiyan?

¹¹ Juchasapas kasqanchejrayku, ichapis wakin kutis hermanosninchejta mana perdonayta atillasunchu (Lev. 19:18). Uj hermano contranchejpi juchallikusqanmanta wajkunaman willasunchej chayqa, ichapis paykunaqa noqanchejman kutikuwasunchej, hermanoj contranpitaj parlanqanku. Chaytaj qotuchakuyta tʼaqanachinman. Ajinata ruwasunchej, nitaj chay chʼampayta allinchanapaj kallpachakusunchu chayqa, Jesús kausayninta qosqanta pisipaj qhawachisunman (Mat. 18:35). Wajkunata mana perdonasunchu chayqa, noqanchejtapis Jehová mana perdonawasunchu (Mateo 6:14, 15 leey). Jehová perdonanawanchejta munanchej chayqa, Paypa contranpi mana juchallikunachu (1 Juan 3:4, 6).

“AMATAJ SAQEYCHU JUCHAMAN URMANAYKUTA”

12, 13. 1) ¿Imapitaj Jesús rikukorqa bautizakusqantawan? 2) ¿Imaraykutaj juchaman urmaspa mana wajkunata tumpanachu? 3) ¿Imatataj Jesús rikucherqa Diosta kasukuspallapuni?

¹² Jesusqa Diosmanta imaynatachus mañakunata yachachishaspa ajinata nerqa: “Amataj saqeychu juchaman urmanaykuta”, nispa. Jesustaqa bautizakusqanmanta pisi tiemponman, Diospa espiritun chʼinnejman pusarqa. ¿Imapaj? “Kuraj Supay atispaqa Jesusta juchaman urmachinampaj” (Mat. 4:1; 6:13). ¿Imaraykutaj Jehová chayta saqerqa? Jehovalla Kamachej kasqanta rikuchinanpaj. Imaraykuchus Satanasqa Adanwan, Evawan Diosta mana kasukusqankurayku, Jehová Kamachinapaj atiyniyoj kasqanta iskayrayacherqa. Satanás nerqa, Dios mana allintachu runasta ruwasqanta. Chantapis nillarqataj ni mayqen juntʼa runa juchaman tanqasqa kaspa Diosman cheqa sonqo kananta. Chantapis nillarqataj runas kusisqas kausakunankuta sapallankumanta kamachinakuspa (Gén. 3:4, 5). Chaywanpis Jesusqa Diosman cheqa sonqo karqa, Satanás llulla kasqantataj rikucherqa. Satanás imastachus iskayrayachisqanqa tumpamantawan sutʼinchakonqa. Chantá janaj pachapi, kay pachapi tiyakojkuna ima, yachanqanku Jehovalla sumaj Kamachej kasqanta.

¹³ Jehovaqa may santo kasqanrayku mana pitapis juchaman urmananpaj tanqanchu. Chaytaqa Satanaslla ruwan (Mat. 4:3). Chaywanpis noqanchej ajllananchej tiyan juchaman urmanapaj tanqasqa kashaspa sinchʼita sayaytachus manachus (Santiago 1:13-15 leey). Jesuspi tʼukurinachej. ¿Imatataj pay ruwarqa Satanás juchaman urmananpaj tanqashajtin? Usqhayllata qhesacharqa, nerqataj imatachus Diospa Palabran nisqanta. Jesusqa Diosman cheqa sonqo kayta ajllarqa. Chaywanpis Satanasqa Jesusta tentayta tukuytawan, pisi tiempota chinkarerqa (Luc. 4:13). Jesusqa, Satanás juchaman urmachiyta munajtinpis Diosta kasukullarqapuni. Ajinamanta rikucherqa uj juntʼa runa mayta ñakʼarispapis Jehovaman cheqa sonqo kayta atisqanta. Kunanpis Satanasqa Diosta mana kasukunapaj juchaman urmachiyta munawanchej.

14. ¿Imatataj ruwananchej tiyan juchaman mana urmanapaj?

¹⁴ Satanás, Diospa contranpi imastachus nisqanqa sutʼinchakunanraj tiyan. Chayrayku Jehovaqa Satanás juchaman urmachinawanchejta saqeshallanpuni. Chaywanpis yuyarikunachej mana Jehovachu juchaman urmanapaj tanqashawasqanchejta. Astawanpis payqa noqanchej cheqa sonqos kananchejpi atienekun, chayraykutaj yanapawanchej. Nitaj munanchu tanqasqa jinalla Payta kasukunanchejta. Astawanpis saqewanchej cheqa sonqo kaytachus manachus ajllananchejta. ¿Imatataj ruwasunchej sinchʼita sayanapaj juchaman tanqasqa kashaspa? Jehovawan sumajta masichakunanchej tiyan, yanapaynintataj mana saykʼuspa mañakunanchej tiyan. Chantá, ¿imaynatá Jehová mañakuykunasninchejman kutichin?

15, 16. 1) ¿Imasmantataj jarkʼakunanchej tiyan? 2) Juchaman urmanchej chayqa, ¿pitaj juchayoj?

¹⁵ Jehovaqa juchaman urmanapaj tanqasqa kashajtinchej sinchʼita sayanapaj espíritu santonta qowanchej. Chantapis Biblianejta, qotuchakuynejta ima yanapallawanchejtaj. Yuyaychawanchejtaj mana necesitasqanchej imaspi mana tiemponchejta, kallpanchejta, qolqenchejta ima usuchinata. Kunantaj uj qhariwarmipi tʼukurina. Paykunaqa Europaj ujnin qhapaj suyunpi tiyakunku. Ashkha watastataj pisi willajkuna kanku chaypi precursores jina llankʼarqanku. Kunantaj iskay wawasniyoj kasqankurayku, manaña precursoreschu kanku. Chay qhariwarmimanta qosa nin: “Diosmanta mayta mañakuyku, cristiano ruwanasniykuta pisillataña ruwasqaykurayku sinchʼita sayanaykupaj. Mañakullaykutaj paypa qayllallanpipuni kanaykupaj, sonqo kʼajaywan willamunaykupaj ima”, nispa.

¹⁶ Millay khuchichakuykunata qhawanapaj tanqasqa kaspapis sinchʼita sayanallataj. Chay millay imasta qhawasun chayqa, mana Satanasman, pachanman ima tumpasunmanchu. Imaraykuchus paykunaqa mana tanqayta atiwasunmanchu, imatachus mana ruwayta munanchejchu chay ruwaymanqa. Wakenqa millay khuchichakuykunata qhawarqanku, sajra imaspi yuyasqankuta mana qhesachasqankurayku. Chaywanpis ashkha hermanos ajinapi rikukuspa sinchʼita sayarqanku. Noqanchejpis paykuna jina ruwayta atisunman (1 Cor. 10:12, 13).

“JARKʼAWAYKU SAJRAMANTA”

17. 1) ¿Imaynatá rikuchinchej Satanasmanta Jehová jarkʼanawanchejta munasqanchejta? 2) ¿Imatataj Jehová tumpamantawan ruwanqa?

¹⁷ “Jarkʼawayku sajramanta” nispaqa, Diosmanta mañakushanchej Satanasmanta jarkʼanawanchejta. ¿Imaynatataj jarkʼanawanchejta munasqanchejta rikuchisunman? Kay pachaman mana satʼikuspa, kay ‘pachapi kaj imasninta’ mana munakuspa ima (Juan 15:19; 1 Juan 2:15-17). Jehovaqa, tumpamantawan Satanasta wataykonqa, kay sajra pachatataj chinkachenqa. Satanastaj manchay phiñasqa kashan, paypaj pisi tiempollaña kasqanta yachasqanrayku. Tukuy imatataj ruwanqa Diosta mana sirvinanchejpaj. Chayrayku Diosmanta mañakunallanchejpuni tiyan Satanasmanta jarkʼanawanchejta (Apo. 12:12, 17).

18. Mosoj pachapi tiyakunapaj, ¿imatataj ruwananchej tiyan?

¹⁸ Mosoj pachapi kausakuyta munanchej chayqa, Diospa Reinon jamunanta, sutin jatunchasqa kananta, munaynin kay Jallpʼapi ruwakunanta ima mañakunallanchejpuni tiyan. Atienekunataj Jehová imatachus kausakunapaj, payman cheqa sonqo kanapaj ima sapa pʼunchay qonawanchejpi.