¡Paraíso qayllapiña kachkan!

Millay kawsay Jallpʼapi, Paraíso qayllapiña kasqanta rikuchin. Bibliaqa may unayña nirqa pʼunchawkuna saqrayananta paraíso qayllamusqanta rikuchinawanchikpaq. Kunantaq chay pʼunchawkunapi kawsachkanchik. Bibliaqa kaykunamanta parlarqaña, wakinkunata qhawarina:

Jatuchaq maqanakuykuna. “Uj nación waj naciompa contranta oqharikonqa, uj reinopis waj reinoj contranta” (Mateo 24:7). Kay profecía juntʼakun. 1914 watamantapacha, iskay jatuchaq maqanakuykuna kanña, wak juchʼuy maqanakuykunapis. Junukuna runataq chay maqanakuykunapi wañunku.

Tukuy niqpi unquykuna. “Wañuchej onqoykuna ima tukuynejpi” kanqa (Lucas 21:11) ¿Bibliap nisqan juntʼakunchu? Ari. Kay, chukchu unquy, sunqu unquykuna, cáncer nisqa, tuberculosis nisqa, sida nisqa, wak unquykuna ima junukuna runataña wañuchin.

Pisi mikhuna. Tukuy Jallpʼapi runaqa yarqhachikun. Junukuna runataq sapa wata yarqhaymanta wañun. Kay tukuy imataq Paraíso qayllapiña kasqanta rikuchiwanchik, Bibliaqa niwarqanchikña: “Kanqa, yarqhaykuna” nispa (Marcos 13:8).

Jallpʼa ikhakuykuna. “Jinallataj kanqa [...] sinchʼi jallpʼa ikhakuykuna ima kaynejpi, jaqaynejpi” (Mateo 24:7). Kunanqa kaypis juntʼakullantaq. 1914 watamantapacha junu kuraq runaña jallpʼa ikhakuykunapi wañunku.

Saqra runakuna. Runaqa ‘paykunallapaq imatapis munanqanku’, ‘qullqimanta wañurinqanku’ chantapis ‘kay pachaq kusiyninta munakunqanku Diosta munakunamantaqa’. Wawakunataq “tatasninkuta mana kasojkuna” kanqanku (2 Timoteo 3:1-5). ¿Manachu achkha runa kunan ajina kanku? Mana jatunpaqchu Diosta qhawanku, chanta Diosmanta yachakuqkunaman chʼampaykunata ruwanku.

Jucha. “Anchapuni jucha” kallanqataq (Mateo 24:12). Icha qampis kay watakunallapi jucha yapakuqta qhawanki. Tukuyniqpi, runaqa suwachikunanmanta, chʼawkiyachikunanmanta, usuchikunanmanta ima, manchasqalla kanku.

Kay tukuy imaqa Diospa Reinon qayllapiña kasqanta rikuchin. “Jinallatataj qankunapis chay tukuy imasta rikuspaqa, yachaychej Diospa reinon qayllapiña kasqanta” Bibliaqa nin (Lucas 21:31). Kunan, ¿imataq Diospa Reinonri? Diospa janaqpachamanta kamachiynin, Jallpʼata paraisoman tikrachiq. Kay Reinontaq tukuy runap kamachiyninta tukuchinqa (Daniel 2:44).