Diospa Reinonpi suyakunankupaq willamuna
1 Kay saqra pʼunchaykunapiqa, achkha runas ni ima suyakuyniyuq kanku (Efe. 2:12). Wakinkunataq, qullqipi, runap kamachisqanpi, chayri cienciapi suyakuyninkuta churanku, kaykunataqri allin kawsayta qhipapaq mana apamunkumanchu. Mana chaymanjinataq ñuqanchikqa, Diospa Reinonpi suyakuyninchikta churanchik, chaytaq kachkan “ancla nisqa barco sayachina gancho jina [...] sinchʼita sayananchejpaj”. Chayrayku, ¡mayta kusikunchik! (Heb. 6:19, 20.)
2 Diospa Reinonqa, Jallpʼata juk kʼacha paraisoman tukuchinqa. Wañusqaspis kawsarimunqanku (Hech. 24:15). Mana chiqan ruwaykuna, unquykuna, wakchayay, machuyay, wañuy ima, chinkanqa (Sal. 9:18; Mat. 12:20, 21; Apo. 21:3, 4). Diospa tukuy nisqasninqa, juk chhikamantawan juntʼakunqa. ¿Mayqintataq juntʼakunanta astawan suyachkanki?
3 Allin willaykunaqa, willamunapaq. Diospa Reinon tukuy ñakʼariykunata chinkachinanta yachaspaqa, ¿manachu wak runasman willamusunman? Diosta, runa masinchikta ima munakusqanchikqa, Jesusjina ‘wakchasman willamunapaq tanqawanchik, presos kacharisqa kanankupaq, ciegos qhawarinankupaq, ñakʼariqkuna samarichikqa kanankupaq ima’ (Luc. 4:18, 19). Apóstol Pabloqa, tuta pʼunchay mercadospi, mayniqpipis runa tarikuq chaypi, “Diospa Palabranta willaspallaña purerqa” (Hech. 18:5). Ñuqanchikpis Pablojina, kʼajaywan willamullasunpuni chayqa, “kay pachaj imasnimpi yuyaykuna, qhapajyayta munapayay, tukuy laya sajra imaspi yuyaykuna ima” sunqunchikpi mana saphichakunqachu, manaqa, Diospa Reinonpi suyakullasunpuni (Mar. 4:19).
4 Reinomanta willamuchkaspa runa churanakuwaptinchikpis, chayri mana uyarillaytapis munawaptinchik, Diospa Reinonpi suyakuyninchikmanta ‘sinchita chʼipakullasunpuni, mana iskaychakuspa’, nitaq ‘allin willaykunamanta pʼinqakuspa’ (Heb. 10:23; Rom. 1:16). Mana saykʼuspa willamullaptinchikpuni, ichapis wakin runasqa tikrakuspa uyariwasunman.
5 Bibliap nisqanmanjina kay pachapi ñakʼariykuna rikukusqanmanta runaman willamuna kaptinpis, mana chayllamantachu parlananchik tiyan. Astawanpis, Diospa Reinonmanta allin willaykunata runaman willamunanchik tiyan, chaypi suyakuyninkuta churanankupaq. Chayrayku, allin willaykunata runaman kʼajaywan, mana iskaychakuspa ima, willamunallapuni kachun, jinamanta ‘suyakuyninchik tukukuykama’ sinchita sayanqa (Heb. 6:11).