‘Ruwasqasninchikwan chiqa kasqanta rikuchina’
1. ¿Imaynatá wakin runas willayninchikta qhawanku?
1 Wakin runasqa mana willayninchikta uyariyta munankuchu. Ichapis Jehovamanta sutʼinchaqkunamanta periodicopi, telepi ima, mana allin willaykunata rikusqankurayku. Wakin lugarespiqa “saqra religiontajina” qhawawanchik. Jina kaptin, ¿imaynatá kutichisunman?
2. ¿Imastaq willayninchikta mana uyariyta munaptinku yanapawasun?
2 Ama llawchʼiyaychu. Ñawpa siglopi runasqa, Jesusta, Jehovap wakin kamachisninta ima, mana uyariyta munarqankuchu, juchachaqtaq kanku (Hech. 28:22). Paykunamanta mana allinta parlaptinkupis, mana pʼinqakuspa willamullarqankupuni. Jesús jinata nirqa: ‘Chiqa yachayniyuqqa, ruwasqasninwan chiqa kasqanta rikuchin’, nispa (Mat. 11:18, 19, Dios Parlapawanchej). Chayrayku payqa, Tatanpa munayninta tukuy sunqu ruwallarqapuni. Chiqa yachachiyta maskʼaqkunapaqtaq, chay allin willaykuna sutʼi kananta yacharqa. Diospa Churintajina chiqniwasqanchikta yuyariyqa, mana llawchʼiyanapaq yanapawanchik.
3. ¿Imaraykú ñuqanchikmanta mana allinta parlasqanku, churanakuwasqanchik ima kananpuni karqa?
3 Jesusqa, yachachisqasninman, imaynatachus payta chiqnirqanku ajinallatataq paykunapis chiqnisqas kanankuta nirqa (Juan 15:18-20). Chayrayku runas mana uyariyta munawasqanchik, churanakuwasqanchik ima, kananpuni karqa. Chantá qhipa pʼunchaykunapi kawsakusqanchikrayku, Satanás phiñasqa kasqanrayku ima, astawanraq churanakuwasun (Apo. 12:12). Satanaspa saqra pachanpa tukukuynin may qayllapiña kasqanta yachayqa, ¡mayta kusichiwanchik!
4. Runas mana uyariyta munawaptinchik, ¿imaynatá kutichisun?
4 Miskʼi simiwan kutichina. Runas mana allinta kutichiwaptinchikqa, kʼachamanta miskʼi simiwan kutichina (Pro. 15:1; Col. 4:5, 6). Atikuptinqa, tapurisunman imaraykuchus pay ajinata yuyasqanta, chayrí Jehovamanta sutʼinchaqkunamanta runas pantasqata parlasqankuta sutʼincharisunman. Kʼachamanta kutichiptinchikqa, ichapis runas ñuqanchikmanta pantasqa parlasqanku mana jinachu kasqanta yuyanman, qhipan kutipitaq willayninchikta uyarillanmanña. Sinchi phiñasqa kaptintaq, kʼachamanta ripuna. Runas willayninchikta allinpaqpis manapis qhawachunku, Jehová may sumaqpaq qhawasqanta mana qunqanachu (Isa. 52:7).