Diospa Llaqtanta Kamachiqkunap cartanku
Munasqa hermanos:
¡Sumaq tiempopi kachkanchik, may kusisqataq sientekunchik! Qamkunawan khuska “uj sonqolla” llamkʼaspa, Tatanchik Jehovamanta ni jayqʼaqjina willachkasqanchikrayku (Sof. 3:9; Juan 14:12).
Jehovata kusisqas yupaychaspapis mana chʼampaykunasniyuq kasqanchiktachu niyta munan. Kay pasaq 2010 watapi qamkunamanta wakinkunaqa llakiypi tarikurqankichik jallpʼa ikhakuykuna, sinchi para, sinchi wayra, wak imaspiwan kasqanrayku (Mat. 24:7). Achkha hermanos unquyrayku, machuyayrayku ima sapa pʼunchay muchuchkanku. Chantá kay tiempopi yapakuq ‘nanaykunasta’ atipananchikpaq kallpachakunanchik tiyan (Mat. 24:8). Armeniapi, Eritreapi, Corea del Surpi wak suyuspi ima, achkha hermanosninchik Diospi iñisqankurayku carcelpi wisqʼasqas kachkanku (Mat. 24:9).
Chʼampaypi rikukuspapis ñawpaqllamanpuni rinapaq, ¿imataq yanapawarqanchik? Kay 2010 watapaq akllasqa pʼiti: ‘Munakuyqa tukuy imata muchun, nitaq jayk’aqpis tukukunqachu’ nisqa, yanapawarqanchik (1 Cor. 13:7, 8). Chiqamanta, Jehovata munakusqanchikrayku, hermanospura munanakusqanchikrayku ima, llakiyninchikta muchunapaq kallpachawanchik.
Jallpʼantinpi mana saykʼuspa willasqanchikmanta, cristianos nichikuqkuna tʼukulla qhipakunku. Mana ñuqanchikjina creespapis, yuyaspapis jinata ninku: “¡Qankunaqa ñuqaykup ruwanaykuta ruwachkankichik!”, nispa. ¿Imataq Jehovamanta sutʼinchaqkunata willanallankupaqpuni yanapan? Munakuyllataq, Tatanchik Jehovajina mana pipis chinkachisqa kananta munanchikchu (2 Ped. 3:9). Kay 2010 watapi 7.508.050 willaqkuna kasqanchik, runas Diosman kutirikunankuta munasqanchikta sutʼita rikuchin. Jehovamanta sutʼinchaqkunajina, ¿ima religiontaq runa masinta munakusqanrayku Diosmanta willaspa yanapachkan?
Chantapis profeta Isaiaspa qillqasqan, kay tiempopi juntʼakuchkasqanta rikuyqa kallpachawanchik, pay nirqa: “Qhepa pʼunchaykunapi kay jina kanqa: Maypichus Tata Diospa Templon kashan, chay orqoqa tukuy orqosmanta aswan patapi sayachisqa kanqa, oqharisqataj kanqa tukuy orqosmanta aswan pataman. Tukuy nacionestaj chaymampuni jamonqanku”, nispa (Isa. 2:2-4). Pasaq watapi 294.368 bautizakurqanku, chaytaq Jehovap llaqtanman may chhika runas yaykuchkasqankuta rikuchiwanchik, may kusisqataq sientekunchik ñuqanchikwan khuska Jehovata yupaychachkasqankumanta. Chayrayku Satanaspa tuqllasninta atipanankupaq munakuyninchikta rikuchinallapuni (1 Ped. 5:8, 9).
Jesuspa wañuyninta yuyarinapaq 2010 marzo 30 pʼunchaypi, mana jaykʼaqjina 18.706.895 runas tantakurqanku, kaytaq may chhika runasraq ñuqanchikwan khuska Jehovata yupaychayta munasqankuta rikuchin. Jehová kay saqra pachata manaraq tukuchisqanmanta, ¡mayta kusikunchik! Chay pʼunchay chayamunankamaqa munakuyninchik sinchita sayanapaq yanapawasunchik (2 Tes. 3:5).
Jatun tantakuykuna: “Jehovap qayllanpi kanallapuni” sutichasqa, achkha suyuspi 2010 watapi ruwakusqanqa, Jehovap qayllanpi kanallapaqpuni kallpachawarqanchik. Salmista Jehovap llaqtanmanta qillqasqanqa chiqamantapuni juntʼakun: “Kusikuyniyojmin chay jina [...] Diosniyoj aylloqa”, nispa (Sal. 144:15). Aswan qhipaman imachus kananmanta mana yachanchikchu, chaywanpis Jehová ñuqanchikwan kasqanta yachayqa, mana imatapis manchachikunanchikpaq yanapawasun (Sal. 23:4). Jehová pisi tiempomantawan, Jesusniqta “Kuraq Supaypa ruwasqasninta phirin[qa]” (1 Juan 3:8). Chay pʼunchay chayamunantaqa, ¡mayta suyachkanchik! Chaykama mana saykʼuspa llamkʼanallapuni (1 Cor. 15:58).
Qamkunapaq Diosmanta “mana saykʼuspa” mañapullaykupuni (Rom. 1:9). “Diospa munakuynimpi kallaychejpuni, Señor Jesucristoj khuyakuyninta suyaspa, wiñay kawsayta japʼinaykichejpaj” (Jud. 21).
¡Tukuy qamkunata munakuyku!
Hermanosniykichik,
Diospa Llaqtanta Kamachiqkuna
[5-8 paginaspi tabla]
JEHOVAMANTA SUTʼINCHAQKUNA 2010 WATAPI RUWASQANKUMANTA WILLAYKUNA
(Publicacionpi qhawariy texto originalta)
2009 watapi septiembre killamanta 2010 watapi septiembre killakama, Jehovamanta sutʼinchaqkuna 155.000.000 (155 millones) dolaresta gastanku, precursores especiales, misioneros, superintendentes viajantes ima, ruwayninkuta juntʼanankupaq.
Tukuy pachantinpi Señorpa Cenanpi mikhuqkuna: 11.202
[9, 10 paginaspi sutʼinchaynin]
Qillqanapaq