ESTADOS UNIDOSMANTA wakin tatasta, sumaqta wawasninkuta uywanankupaq, imatachus ruwasqankumanta tapurisqankumanjina, imatachus kutichisqankuta, kay Instituto Nacional de Salud Mental nisqa urqhusqa. Tatasta tapurisqanku: ‘Qamkuna wawasniykichikta uywasqaykichikmanjina, ¿imatá wak tatasman yuyaychawaqchik?’, nispa. Tatastaq kutichisqanku: ‘Wawasniykichiktaqa munakuychik’, ‘allin runas kanankupaqjina kʼamiychik’, ‘paykunawan kanaykichikpaq tiempochakuychik’, ‘imachus allin kaq, imataqchus mana allin kaqta reparayta yachachiychik’, ‘paykunata jatunpaq qhawaychik’, ‘imatachus nisusqaykichiktataq uyariychik’, ‘rimanallaykichikmantaqa yuyaychaychik’ ima.

Chaywanpis wawastaqa, allin runas kanankupaq yachaywasipi yachachiqkunapis yanapayta atillankutaq. Juk yuyaychariq yachachiq nin: “Yachaywasipi yachachiqkuna, wawasta yachachisqankuwanqa, tatasta yanapanku, wawasninku allin runas kanankupaq”.

Chayrayku tatas, yachachiqkuna ima, wawasta, wiñay tukusqa runa kanankupaq, imatapis allinta akllaspa kusikunankupaq, wak runaswanpis allinta apanakunankupaq ima yanapanku.

Yanapaqkuna manataq atipayta munaqkunachu

Tatas, yachachiqkunata mana yanapaptinkuqa, mana yachachiyta atillanqankuchu. Sutʼincharinapaq, wakin tatasqa, mana wawasninkuta yachaywasiman kachankuchu, chayri yachachiqkunawan atipanakuyta maskʼanku. Chaymanta juk periódico francés nin: “Wakin tatasqa wawasninku sumaq yachakuqkunapuni kanankuta munasqankurayku, yachachiqkuna wawasninkuman librosta qusqankuta allinchus manachus kasqanta sumaqta qhawanku, wakin yachachiqkuna mana allintachu yachachichkasqankuta ninku, wawasninku mana allin notasta urqhukuptinkutaq yachachiqkunapaq phiñakunku”. Chayta ruwaspataq yachachiqta, manaña jatunpaqchu qhawachichkanku.

Jehovamanta sutʼinchaqkunaqa, yachachiqkunata yanapayqa, wawasninkup allinninkupaq kasqanta yachanku. Ajinata yanapaytaq yachachiqkunapaq may allin, imaraykuchus paykunaqa, tukuy ima chʼampaykuna kasqanrayku, mana yachakuqkunaman yachachiyta atillankuchu.

Yachaywasipi chʼampaykuna

Yachaywasipipis, chʼampaykuna kallantaq. Chaytaq tiempo pasasqanmanjina yapakuchkallanpuni. Estados Unidospi, juk yachaywasipi, ima chʼampaykunachus kasqanmanta kay periódico The New York Times nin: “Yachakuqkunaqa, clasesta pasachkaspa puñukapunku, wakintaq maqanakuyta munaspa pasillospi tukuy imata ninakunku, allin yachakuqkunata pisipaq qhawanku. [...] Yaqha tukuy yachakuqkuna, chʼampaykunasniyuq kanku, imaraykuchus wakin yachakuqkunaqa, hermanitosninkuta qhawananku tiyan, tatan chayri maman carcelpi wisqʼasqa kachkan, pandillasmantapis jarkʼakunanku kachkan. Chayrayku 10 yachakuqkunamanta iskaylla yachaywasiman rinku”.

Yachaywasispi chʼampaykunaqa, tʼukunapaqjina. Imaraykuchus maqanakuchkaspa pistolaswan baleanakunku chayri cuchilloswan tʼuqsinakunku. Maqanakunankupaqtaq armasta apaykachanku, wawastaq juchʼuysitusmantapacha maqanakuyta qallarinku.

Chayjina ruwaykunaqa, mana tukuy suyuspichu rikukun. Chaywanpis, kay semanario francés Le Point nisqanmanjina pachantinpi yachakuqkunaqa “yachachiqkunata mana jatunpaq qhawankuñachu nitaq kasukunkuñachu”.

Wawas yachachiqkunata mana kasusqankuqa, paykunallapaqtaq mana allinchu. Chaywanpis Jehovamanta sutʼinchaqkunaqa, wawasninkuman, yachachiqta kasunankuta, jatunpaq qhawanankuta, kʼacha kaykunata rikuchinankuta ima, yachachinku.

KAY folletoqa, Jehovamanta sutʼinchaqkuna Bibliap nisqanmanjina imapichus creesqankumanta wakillanta sutʼinchananpaq ruwakun chantá familia ukhupi tatalla chayri mamalla Jehovamanta sutʼinchaq kasqan, chayri iskayninku Jehovamanta sutʼinchaq kasqanku, yachakuqta imaynatachus yanapasqanmanta, sutʼinchananpaq ruwakullantaq.

Jehovamanta sutʼinchaqkunaqa, wawasninku Bibliap nisqanmanjina kawsakunankuta munanku, imaraykuchus chayqa tukuy imapi yanapananta yachanku. Bibliamanta yachakusqankumanjina kawsakusqanku, imapichus creesqanku ima, kusiyta tarinankupaq, ima chʼampaytapis atipanankupaq yanapan. Chantá chay yachakusqanku, imaspichus creesqankupis, wawasninkuta, allin yachakuqkuna kanankupaq, kʼacha runasjina tukuy runaswan allinta apanakunankupaq ima tanqan.

Jehovamanta sutʼinchaqkunaqa, yachaywasipi yachakuy kawsayninkupaq allin kasqanta yachasqankurayku, yachaywasipi yachakuytaqa mana pisipaqchu qhawanku. Chayrayku paykunaqa, atisqankumanjina yanapayta munasunku, wawasninkutapis wasinkupi, Tantakunanku Wasipi ima, yachaywasipi yachakusqanku allinninkupaq kasqanta nispa yanapallanqankupuni.