Sapa killa willayqa, espiritualmente wiñanapaj yanapawanchej

Willayman sapa killa llojseyqa, espiritualmente wiñanapaj yanapawanchej. Tukuypis Reinomanta willamunanchej kasqanta yachanchej. Willaj llojseyqa, Jehovamanta sutʼinchaj kasqanchejta rikuchin (Isa. 43:10). Kay tiempopi usqhayllata runaman willana kasqanrayku, mana allinchu kanman willayninchejta pisipaj qhawananchej. Chayrayku Pabloqa, Diosmanta willanatapuni ‘uj sumaj jaywanata jina’ jaywananchejta nerqa (Heb. 13:15).

Semanapaj ruwanasninchejpaj wakichikushaspa, willaypajpis tiempota tʼaqananchej tiyan. Ichapis qotuchakuy willamunapaj sapa pʼunchay tantakun, ima pʼunchaychus willayta ajllayta atinchej. Wasimanta wasi publicacioneswan willay, revisitasta ruway, Bibliamanta yachakuyta munajkunaman yachachiy ima may sumaj. Chantá mayllapipis willanapaj wakichisqa kasunchej. Willayman iskaymanta iskay llojsisqanchejrayku, ichapis willanchej chay hermanota ima horapichus willayta atisqanta tapusunman, ajinamanta iskayninchej willaj rinapaj.

Willaypi runa mana uyariyta munawajtinchejpis, willayman rinapaj tiempota tʼaqasqanchejman jina llojsinallapuni. Yachanchej jina mana tukuychu uyariwasunchej (Mat. 13:15; 24:9). Ezequieltapis, ‘mana kasukoj, mana kʼumuykukoj rumi sonqo’ runasman willamunanta Jehová kamacherqa. Chantapis ‘paykunata jina kʼulluta ruwasqayki’, nerqa, nisunman, “diamante nisqa valorniyoj rumita jina” sinchʼita sayananpaj (Eze. 2:2-4; 3:7-9). Sapa killa willanapajqa, mayta kallpachakunanchej tiyan.