Diosqa kay jallpʼapi kusisqa, allintataj wiñaypaj kausakunanchejta munan.

Chaywanpis ichá ninki: “Nichá jinata kausasunmanchu”, nispa. Bibliaqa Diospa Gobiernon chayta ruwananta nin. Chayrayku Jehová Diosqa chay Gobiernomanta, imastachus runaspaj ruwananmanta ima, tukuy yachanankuta munan (Salmo 37:11, 29; Isaías 9:7).

Diosqa allinninchejta munan.

Imaynatachus uj kʼacha tata, wawasninpa allinninta munan, ajinallatataj Tatanchej Jehovapis wiñaypaj kusisqa kanata munan (Isaías 48:17, 18). Chayrayku Biblia nin: “Diospa munayninta ruwajrí wiñaypaj kausanqa”, nispa (1 Juan 2:17).

Diosqa payta kasukunanchejta munan.

Biblia nisqanman jina, Jehová Diosqa ‘ñankunasninmanta yachachiyta’ munawanchej, chaypi “purinanchejpaj” (Isaías 2:2, 3). Diosqa ‘uj llajtata ajllakorqa sutinta apanankupaj’, munaynintataj jallpʼantinpi rejsichinankupaj (Hechos 15:14).

Diosqa ujchasqa yupaychananchejta munan.

Cheqan religionpi kajkunaqa purajmanta munanakunku, ujchasqataj kanku (Juan 13:35). ¿Pikunataj tukuy suyusmanta runasta Diosta ujchasqa yupaychanankupaj yachachishanku? Chayta kay folletopi yachakuy.

¿Jehovaj testigosninta rejsiwaykuchu? Wakenqa vecinosniyki kayku. Wakintaj llankʼaypi chayri colegiopi qanwan khuska kashayku. Ichá qanwan Bibliamanta parlarerqayku. Chanta, ¿imayna runastaj kayku? ¿Imaraykú runaswan creeyniykumanta parlariyku?

Qan jina runallataj kayku. Tukuy llajtasmanta kayku, imaymana kausayniyojtaj. Niraj Jehovaj testigonman tukushaspa, wakenqa waj religionpi karqayku, wakintaj mana Diospi creerqaykuchu. Chaywanpis sapa ujniyku Bibliaj yachachisqanta sumajta estudiarqayku (Hechos 17:11). Chay yachakusqaykuta tukuy sonqo japʼikuspataj, Jehová Diosta yupaychayta qallarerqayku.

Bibliawan yanapachikuyku. Tukuy runas jina, llakiykunasniyoj kayku, pantaykutaj. Chaywanpis Bibliaj yuyaychasqanman jina kausanaykupaj kallpachakusqaykurayku, aswan kusisqa kausakuyku (Salmo 128:1, 2). Chayraykutaj Bibliamanta yachakusqaykuta runasman willariyku.

Diospa yuyaychasqanta kasukuyku. Bibliaj yachachisqanqa kusisqa kanaykupaj yanapawayku. Chantapis runa masiykuta jatunpaj qhawanaykupaj, cheqan kajta ruwanaykupaj, kʼachas kanaykupaj ima yanapawayku. Bibliaj yuyaychasqanqa, allin runas kanaykupaj, wajkunaj allinninkuta maskʼanaykupaj ima yanapallawaykutaj. Chantapis llimphu kausayniyoj kanaykupaj, familiasniyku ujchasqa kananpaj ima yachachiwayku. Noqaykoqa yachayku Diosninchej “tukuy runasta uj rejllata qhawasqanta”. Chayrayku maymanta kaspapis uj familia jina kayku. Noqaykutaqa ni politicapis tʼaqawaykuchu. Arí, uj kʼata llajta kayku (Hechos 4:13; 10:34, 35).

• Jehovaj testigosnin, ¿imaspitaj tukuy runasman rijchʼakuyku?

• Bibliaj yuyaychasqasninwan, ¿imaynatataj yanapachikuyku?

Runasqa Jehovaj testigosnin kunallanraj rikhurisqaykuta ninku. Jinapis Jehová Diospa testigosnenqa 2.700 watas ñaupajtaña karqanku (Isaías 43:10-12). Niraj 1931 wata kashajtin, Bibliamanta Yachaqajkuna sutiwan rejsisqa karqayku. Chayrayku imaraykuchus Jehovaj testigosnin sutita ajllasqaykuta qhawarina.

Sutiykoqa pichus Diosniyku kasqanta rikuchin. Biblia qhelqakushajtin Diospa sutenqa 7.000 kuraj kutista Bibliapi rikhurerqa. Chaywanpis kunanqa ashkha Bibliaspi, Jehová suti rikhurinanmantaqa “Tata Dios” chayri “Señor” palabraslla rikhurin. Diosqa Moisesman Jehová sutiwan rejsichikorqa, nerqataj: “Kay suteyqa wiñaypaj”, nispa (Éxodo 3:15). Jinamanta mana llulla dioses kikinchu kasqanta rikucherqa. Noqaykoqa Diospa sutinwan rejsichikuyta jatunpaj qhawayku.

Sutiykoqa imatachus ruwasqaykuta rikuchin. Kasukoj runa Abelmantapacha, ashkha runas Jehová Diospi creerqanku. Watas pasasqanman jinataj Noé, Abrahán, Sara, Moisés, David, wajkuna ima, ‘chay chhika testigosman’ yapakorqanku (Hebreos 11:4–12:1). Imaynatachus uj testigo, juezpa ñaupaqenpi uj runa mana juchayoj kasqanta sutʼinchan, ajinallatataj noqaykupis Diosmanta cheqan kajta sutʼinchayku.

Jesús jina ruwayku. Bibliaqa Jesús “cheqa sonqo, cheqan kaj testigotaj” kasqanta nin (Apocalipsis 3:14). Arí, Jesusqa Tatanpa sutinta rejsichisqanta nerqa. Chantapis Diosmanta ‘cheqa kajta willananpaj’ jamusqanta nillarqataj (Juan 17:26; 18:37). Chayrayku cheqan cristianosqa, Diospa sutinta willananku tiyan, chay sutiwantaj rejsichikunanku tiyan. Chayta ruwanaykupajtaj kallpachakuyku.

• ¿Imaraykutaj Jehovaj testigosnin sutita ajllasqayku?

• ¿Maykʼajmantapachataj Jehovaj testigosnin kay jallpʼapi kasqanku?

• ¿Pitaj “cheqa sonqo, cheqan kaj testigotaj”?