Jehovaman qayllaykuna librota eneromantapacha ukhunchasun
1. Enero 6 pʼunchaymantapacha, ¿imataj Jehovaman astawan qayllaykunapaj yanapawasun?
1 Jehovaqa payman qayllaykunanchejta munan (Sant. 4:8). Chayrayku enero 6 pʼunchaymantapacha, Bibliamanta Yachaqanapaj tantakuypi, Jehovaman qayllaykuna librota ukhunchasunchej. Chay kikin librollataj, imapajchus wakichikusqanta 3 paginanpi sutʼinchan: “Imaynatachus Jehová kʼacha kaykunasninta rikuchisqanpi, Jesucristopis Jehovajina rikuchisqanpi, ñuqanchikpis imaynamantachus ajinata rikuchinapi tʼukurispaqa, Jehovaman qayllaykusunchik”, nispa. Kay librotaqa, 2004-2005 wataspiña qotuchakuykunapi ukhunchakorqa. Chaywanpis chaymantapacha, 2 millonesmanta astawan runas Diospa llajtanman yaykumunku. Paykunaqa Jehovaj kʼacha kaykunasnin imaynapunichus kasqanta, ñaupaj kutirayku ukhunchanqanku. Ukhunchajkunañataj, ujtawan ukhunchaspa Jehovaj kʼacha kaykunasninta astawan jatunpaj qhawanqanku (Sal. 119:14).
2. ¿Imaynatá Jehovaman qayllaykuna librota ukhunchasunchej?
2 ¿Imaynatá ukhunchakonqa? Yachachej hermanoqa, pisillata parlaspa qallarinan tiyan. Libropeqa, ima textostachus tantakuypi leekunan kasqanta mana willakunchu. Chayrayku pay chaykunata ajllanan tiyan. Hermanosta libropi yachakusqankuta yuyarichinanpajtaj, uj chayri iskay tapuyta ruwanman. Mayqen yachaqanallapipis, “Tʼukurinapaq tapuykuna” nisqa recuadro rikhurejtin, chay recuadromanta tapurenqa. Tiempo kajtintaj, chay recuadroj wakin textosninta leechinman, chaymanta parlarinankutataj ninman.
3. Librota qotuchakuypi ukhunchakojtin, ¿imatá ruwasunman yanapachikunapaj, imaraykutaj?
3 Yanapachikunapaj. Kay librota ukhuncharqanchejña chaypis, wakichikunanchejpuni tiyan. Tapuykunaman kutichispaqa, Jehovata jatunchasun, yachakusqanchejta yuyarisun, tantakuypi kajkunatapis kallpachasun (Sal. 35:18; Heb. 10:24, 25). Jehovaj kʼacha kaykunasninpi tʼukurispaqa, payman astawan qayllaykusun (Sal. 77:11-13). Chantapis kamachiykunasninta astawan kasukuyta munasun. Astawantaj wajkunaman paymanta parlasunchej (Sal. 150:1-6).