YACHAYTA MASKʼALLAYCHEJPUNI

Julio: Imaynalla don Ernesto. Qaninpalla tapuriwarqanki, imaraykuchus Jehovaj Testigosnin Diospa Reinon 1914 watamantapacha kamachishasqanta yachachisqaykuta.a

Ernesto: Arí, revistasniykichejpi leerqani Diospa Reinon kay 1914 watamantapacha kamachishasqanta. Chayrayku chayta tapurikorqani. Qankunaqa tukuy yachachisqaykichej Bibliapipuni kasqanta ninkichej, ¿i?

Julio: Arí.

Ernesto: Noqaqa Bibliata tukuysituntapuni leerqani, chaywanpis mana yuyarinichu ni maynejpi 1914 nishasqanta. Internetpipis maskʼarqani, nillataj tarerqanichu.

Julio: Bibliata tukuynintapuni leerisqaykimanta mayta kusikuni. Chayta ruwaspaqa Bibliata jatunpaj qhawasqaykita rikuchinki.

Ernesto: Arí, Bibliaqa may sumajpuni.

Julio: Kajllata nishanki. Chantapis kusikullanitaj tapuykunasniykipaj kutichiykunata Bibliapi maskʼasqaykimanta. Biblia nin yachayta maskʼananchejta. Qantaj chaytapuni ruwashanki.b Chaytaj, ¡may allinpuni!

Ernesto: Gracias, yachakullaytapuni munani. Chayrayku yachakushanchej chay libropi leerispa tarerqani, kay 1914 watamanta imatachus nishasqanta. Chaypi uj rey jatun sachʼawan mosqokusqanta nisharqa. Chay mosqoyninpitaj chay sachʼata urmachisqanku, chantá watejmanta wiñallasqataj. Chaymantasina parlasharqa, ¿i?

Julio: Arí, chayqa Bibliapi Daniel 4 capitulonpi kashan. Chaypeqa Babiloniaj reynin Nabucodonosor mosqoyninmanta parlashan.

Ernesto: Arí, kutin kutita leespapis mana reparanichu chay mosqoynin Diospa Reinonmanta, 1914 watamantawan parlashasqanta.

Julio: Ama llakikuychu don Ernesto. Profeta Danielpis, Diospa yuyaychasqanta qhelqashaspa imatachus niyta munasqanta mana entiendellarqatajchu.

Ernesto: ¿Cierto?

Julio: Arí, pay imatachus qhelqasqanta leerina. Daniel 12:8 nin: “Uyarerqani imatachus nishajta, manataj imatapis entiendeyta aterqanichu”, nispa.

Ernesto: Noqaqa tʼuru umapuni kasqayta yuyasharqani.

Julio: Willarisqayki imaraykuchus Daniel mana entiendeyta atisqanta. Chaypachaqa Dios niraj munarqachu chay qhelqasqa sutʼinchakunanta. Chaywanpis kunanqa chay profeciata entiendeyta atinchej.

Ernesto: Hmmm.

Julio: Arí, kay 9 versículo chayta sutʼinchan, leerina: “Kay imasqa pakasqallapuni kanqanku, tukukuy pʼunchay chayamunankama”. Leerinchej jina kay profeciaqa tukukuy pʼunchaykunallapi sutʼinchakunan karqa. Aswan qhepaman, yachakushanchej chay libropi, sutʼinchawasun chay tukukuy tiempopipuni kausashasqanchejta.c

Ernesto: Chay profeciamanta, ¿astawan sutʼinchariwankimanchu?

Julio: Ya, atisqayta yanaparisqayki.

NABUCODONOSORPA MOSQOYNIN

Julio: Ñaupajta parlarisun Nabucodonosor imatachus mosqokusqanmanta, chantá sutʼincharisunchej imatachus niyta munasqanta.

Ernesto: Ya.

Julio: Nabucodonosorqa mosqoyninpi uj jatun sachʼa cielokama chayasqanta rikorqa. Chantá uyarerqa, Diospa angelnin chay sachʼata urmachinankuta kamachisqanta. Ajinamanta chay sachʼaqa murusqa kʼullunwan, saphillanwan qhepakorqa. Chaymantataj “qanchis wata juntʼa” pasarqa, sachʼataj wiñayta qallarerqa.d Ñaupajtaqa chay profecía Nabucodonosorpi juntʼakorqa. Payqa may atiyniyoj rey karqa, janaj pachaman chayaj sachʼa jina. Chaywanpis “qanchis wata juntʼa[ta]” kamachiyninta sayacherqanku, nisunman chay sachʼata jina kʼuturparqanku. ¿Yuyarinkichu imachus paywan kasqanta?

Ernesto: Manapuni umayman jamuwanchu.

Julio: Bibliaqa nin Nabucodonosor locoyapusqanta. Ichá ajina kasharqa qanchis wata juntʼata. Chayrayku niña reychu karqa. Jinapis chay tiempo pasasqantawan yuyayninman kutipuspa, watejmanta kamachiyta qallarerqa.e

Ernesto: Ah, entiendeshaniña. Jinapis Diospa Reinonmantawan, kay 1914 watamantawan ni imata nisqanta reparanichu.

Julio: Sutʼincharina, chay profeciaqa iskaynejmanta juntʼakorqa. Ñaupajtaqa Nabucodonosorpa kamachiynin sayachisqa kajtin juntʼakorqa. Aswan qhepaman Diospa kamachiynin sayachisqa kajtin juntʼakullarqataj. Chay iskay kaj juntʼakuynintaj, Diospa Reinonwan ninakun.

Ernesto: Chantá, ¿imaynapí yachanki chay iskay kaj Diospa Reinonwan ninakusqanta?

Julio: Ashkha imasrayku. Chay profeciallapitaj wakin imasta sutʼinchan. Daniel 4:17 nin jina, chay profeciaqa qhelqakorqa “tukuy runas yachanankupaj janaj pachapi kaj Diosqa nacionesta kamachinampaj atiyniyoj kasqanta. [Chantá] Pay atiyninta qosqanta kamachinampaj pimanchus qoyta munasqanman”. Kay versiculopi “nacionesta kamachinampaj” nishan, ¿i?

Ernesto: Arí, chayta nishan.

Julio: Chantá, ¿pitaj chay nacionesta kamachinanpaj atiyniyoj kanman?

Ernesto: Dios kasqanta nishan, ¿i?

Julio: Ajinapuni. Chayrayku nisunman mana Nabucodonosorllamantachu parlashasqanta. Manaqa, parlashallantaj Dios “nacionesta kamachinampaj atiyniyoj” kasqanmanta. Astawan kay profeciamanta yachakuspaqa, reparanki cheqapuni kasqanta.

Ernesto: Sumaj, parlarillawaypuni.

¿IMAMANTATAJ DANIEL LIBRO PARLASHAN?

Julio: Daniel libropeqa kutin kutita parlashan imaynatachus Diospa Reinon wiñaypaj sayarichisqa kananmanta, Jesucristotaj chay Reinopi kamachinanmanta. Chaytataj Daniel 2:44 versiculopi nishan, ¿leeriwajchu?

Ernesto: Ya, leerisaj: “Chay reykuna kamachishajtinku, janaj pachapi kaj Dios uj reinota sayarichenqa, chaytaj mana jaykʼajpis chinkachisqachu kanqa, manataj mayqen reinopis payta atipanqachu. Tukuynin waj reinosta tukuchenqa, chay atipaj reinotajrí wiñaypaj sayanqa”.

Julio: Sumaj, niwajchu kay versículo, ¿Diospa Reinonmanta parlashasqanta?

Ernesto: Chaymantapuni parlaspa jinan.

Julio: Chay leerisqanchej versículo parlashan, chay Reino ‘wiñaypaj sayarichisqa’ kananmanta. Diosmanta nisqa, ¿pitaj wiñaypaj kamachiyta atinman?

Ernesto: Ni pi á.

Julio: Ajinapuni. Waj profeciatañataj qhawarina, chaytaj Daniel 7:13, 14 kashan. Chaypitaj, uj rey kamachinanpaj churasqa kananmanta parlashan. Chaypi nin: “Chantá payman atiy qosqa karqa, jinallataj jatumpaj qhawasqa kay, reinopis, tukuy nacionesmanta kaj runas, tukuy parlaymanta kaj runas ima payta sirvinankupaj. Atiynenqa kikillampuni kanqa, kamachinantaj mana jaykʼajpis tukukonqachu”. Kay versiculospi, ¿imamantá watejmanta parlashan?

Ernesto: Reinomanta, ¿i?

Julio: Arí, nitaj mayqen reinollamantachu. Kaypi nin chay Reinoqa “tukuy nacionesmanta kaj runas[ta], tukuy parlaymanta kaj runas[tapis]” kamachinanpaj atiyniyoj kasqanta. Nisunman, tukuy Jallpʼantinta kamachinanpaj atiyniyoj kasqanta.

Ernesto: Chaytaqa nipuni repararqanichu.

Julio: Kaypipis watejmanta nishallantaj, “atiynenqa kikillampuni kanqa, kamachinantaj mana jaykʼajpis tukukonqachu”. Chay versículo, kay Daniel 2:44 versiculoman rijchʼakun, ¿i?

Ernesto: Arí, rijchʼakunpuni.

Julio: Kunanqa imatachus yachakusqanchejmanta yuyarina. Daniel 4 capitulonqa nin, “runas yachanankupaj janaj pachapi kaj Diosqa nacionesta kamachinampaj atiyniyoj kasqanta”. Chaytaj mana Nabucodonosorllapichu juntʼakusqanta rikuchin. Chantapis Danielpa profeciasnenqa, kutin kutita parlashan Diospa Reinon sayarichisqa kananmanta, Jesucristotaj chay Reinopi kamachinanmanta. ¿Imayná chay rijchʼasunki? ¿Nisunmanchu Daniel 4 capitulonpi profecía Diospa Reinonmanta parlashasqanta?

Ernesto: Arí, Diospa Reinonmanta parlashan. Chaywanpis imatachus niyta munasqanta kay 1914 watawan manapuni umayman yaykuwanchu.

QANCHIS WATA JUNTʼA TUKUKUN

Julio: Nabucodonosormanta parlarinallapuni. Nerqanchej jina chay jatun sachʼamanta profeciaqa, ñaupajta Nabucodonosorpi juntʼakorqa. Imajtinchus chay sachʼa urmachisqa kasqantawan paypa kamachiyninta sayachikorqa. Chaymantapachataj qanchis wata juntʼa pasarqa. Chay tiempopitaj Nabucodonosor locoyaporqa. Qanchis wata juntʼa pasasqantawantaj, yuyayninman kutispa watejmanta kamacherqa. Chay profecía juntʼakullarqataj, maypachachus Diospa kamachiynin sayachisqa karqa chaypacha. Chaywanpis Dios mana ima sajrata ruwasqanraykuchu kamachiyninta sayachikorqa.

Ernesto: ¿Imayná chayri?

Julio: Biblia nisqanman jina Israelmanta reykuna “Diospa kamachina tiyanampi” tiyakoj kanku.f Nisunman, Diospa sutinpi kamachisqankuta. Chaywanpis tiempo pasasqanman jina, ashkha reykuna Diosta wasancharqanku. Israelitastaj chay reykunawan khuska Diosta wasanchallarqankutaj. Chayrayku Diosqa Israel llajtata, Babilonia japʼikapunanta saqerqa. Chaytaj 607 watapi karqa, Jesús niraj jamushajtin (J.n.j.). Chaymantapachataj Jerusalenpi reykunaqa manaña Diospa sutinpichu kamacherqanku. Nisunman, chay tiempopi Diospa kamachiyninta sayacherqanku. Don Ernesto, ¿entiendekushallanchu?

Ernesto: Arí, entiendeshallani.

Julio: Kay 607 watamantapacha (J.n.j.) qanchis wata juntʼa yupakuyta qallarerqa. Chay qanchis wata juntʼatataj, Diospa kamachiyninta sayachikorqa. Chay tiempo tukukojtintaj, Diosqa sutinpi kamachinanpaj waj reyta ajllarqa. Chay reytaj janaj pachapi kashan. Daniel libropi waj profeciasta leesqanchejpis, chay qanchis wata juntʼa tukukuyta juntʼakorqa. Ichá tapurikushanki, maykʼajchus chay qanchis wata juntʼa tukukusqanta. Chayta yachaspaqa, yachasun maykʼajchus Diospa Reinon kamachiyta qallarisqanta.

Ernesto: Chayqa 1914 watachá kashan, ¿i?

Julio: Ajinapuni don Ernesto.

Ernesto: Chaywanpis, ¿imaynatá yachanchej chay watapi kasqanta?

Julio: Sutʼincharinallapuni, Jesús kay Jallpʼaman jamuspa, chay qanchis wata juntʼa niraj tukukusqanta nerqa.g Chayrayku nisunman ashkha tiempomanta parlashasqanchejta. Chay qanchis wata juntʼa tiempoqa, Jesús niraj jamushajtin qallarerqa. Janaj pachaman ripojtinpis, nirajpuni juntʼakorqachu. Chantapis nerqanchej jina Danielpa profeciasnenqa ‘tukukuy pʼunchaykunallapiña’ sutʼinchakunan karqa.h Kay 1800 wata chaynejpitaj, uj qotu runas tukuy sonqowan Bibliamanta kay profeciata, chantá waj profeciastawan sumajta estudiarqanku. Pisimanta pisitaj entienderqanku, kay qanchis wata juntʼa tiempoqa 1914 watapi tukukunanta. Chaymantapacha Jallpʼapi tukuy ima rikukusqanqa, 1914 watapi Diospa Reinon janaj pachapi kamachiyta qallarisqanta rikuchin. Chantapis chaymantapacha, kay pachaj tukukuy pʼunchaynin qallarerqa. Don Ernesto, mana ujllapi entiendenapaj jina, ¿i?

Ernesto: Arí. Allinta entiendenaypaj ujtawanchá leerisaj.

Julio: Ajinapuni, noqapis unaypiraj entienderqani. Chaywanpis kay parlarisqanchejqa, yanaparisonqapuni Jehovaj testigosnin Diospa Reinonmanta imatachus yachachisqayku, Biblia nisqanman jina kasqanta reparanaykipaj.

Ernesto: Arí. Bibliawanpuni yachachisqaykichejqa may allin rijchʼawan.

Julio: Reparani qanpis Bibliaj nisqantapuni yachakuyta munasqaykita. Chaywanpis nerqayki jina, mana ujllapi entiendesunmanchu. Tapuykunasniykipis kanchá, ¿icharí? Kaypi tʼukuriy, chay qanchis wata juntʼamanta profeciaqa, Diospa Reinonmanta parlashasqanta nerqanchej. Nillarqanchejtaj chay tiempoqa 607 (J.n.j.) watapi yupakuyta qallarisqanta. Chaywanpis, ¿imaynatá yachanchej chay tiempo 1914 watapi tukukusqanta?i

Ernesto: Arí chaytapuni tapurikusharqani.

Julio: Bibliallataj chay tapuyniykiman kutichin. Kutimojtiy chaymanta parlarillasunpuni, ¿munawajchu?j

Ernesto: Ya, jamullanki á.

NABUCODONOSORPA MOSQOYNINMANTA YUYARISHANKU

Julio: Buen día don Ernesto watejmanta kutimushani, mayta kusikuni sapa semana qanwan Bibliamanta parlarikuspa.a ¿Imaynalla?

Ernesto: Walejllapuni.

Julio: Walej don Ernesto. Qaninpa parlarerqanchej, imaraykuchus Diospa Reinon 1914 watapi kamachiyta qallarin nisqaykumanta.b Chayta sutʼinchanapajtaj, Daniel 4 capitulomanta wakin versiculosninta leerirqanchej, ¿yuyarikunkichu chay capítulo imamantachus parlashasqanta?

Ernesto: Nabucodonosorpa mosqoyninmanta parlasharqa, ¿i?

Julio: Arí, payqa uj jatun sachʼa cielokama chayasqanta rikorqa, chantá uyarerqa Diospa angelnin chay sachʼata urmachinankuta kamachisqanta. Chay sachʼataj murusqa kʼullunwan, saphinwan imalla qhepakorqa. Chantá qanchis wata juntʼa pasarqa, sachʼataj watejmanta wiñarqa.c Chay profeciaqa iskay kutipi juntʼakorqa, ¿yuyarikunkichu ujnin kajta?

Ernesto: Arí, Nabucodonosor qanchis watasta locoyaporqa chaypacha juntʼakorqa, ¿i?

Julio: Arí, payqa mana yuyayninpichu kasharqa, nitaj reyñachu karqa. Chantá chay profecía juntʼakullarqataj, maypachachus kay Jallpʼapi Diospa kamachiynin qanchis wata juntʼata sayachisqa karqa chaypacha. Chay qanchis wata juntʼaqa 607 watapi Jesús niraj jamushajtin (J.n.j.) qallarerqa, Jerusalén chinkachisqa kasqantawan. Chaymantapachataj kay Jallpʼapi, ni pi rey Jehovaj sutinpi kamacherqañachu. Qanchis wata juntʼa tukukojtintaj, Diosqa janaj pachapi uj reyta churarqa, Diospa Reinontaj kamachiyta qallarerqa. Chay qanchis wata juntʼa 607 watapi (J.n.j.) qallarisqanta yachanchejña, kunanqa yachananchej tiyan mashkha unaychus chay qanchis wata juntʼa kasqanta. Ajinamanta sutʼinchasun ima watapichus Diospa Reinon kamachiyta qallarisqanta. ¿Entiendekushallanchu?

Ernesto: Arí, imamantachus qaninpa parlarisqanchejtapis yuyarishaniña.

Julio: Walej chayqa. Sutʼincharina kachun mashkha unaychus chay qanchis wata juntʼa kasqanta. Noqapis niraj jamushaspa yuyarinayraj karqa. Entiendenaykipaj jina atisqayta yanaparisqayki.

Ernesto: Ya.

QANCHIS WATA JUNTʼA TUKUKUN, QHEPA PʼUNCHAYKUNATAJ QALLARIN

Julio: Nerqanchej jina chay profeciaqa ñaupajta Nabucodonosorpi juntʼakorqa, qanchis wata juntʼataj, qanchis wataslla karqa. Chantá ujtawan juntʼakullarqataj Diospa Reinonpi, chay qanchis wata juntʼataj, mana qanchis watasllachu karqa.

Ernesto: Chantá, ¿imaynapí mana qanchis watasllachu kasqanta yachanki?

Julio: Sutʼincharisqayki, qanchis wata juntʼaqa 607 watapi (J.n.j.) Jerusalén thuñisqa kasqantawan qallarerqa. Chaymantapacha qanchis watalla pasasqanta nisunman chayqa, 600 watallaman (J.n.j.) urmanman. Chay watapitaj, Diospa Reinonqa niraj sayarichisqachu karqa. Chantapis Jesusqa kay Jallpʼaman jamuspa, chay qanchis wata juntʼa nirajpuni tukukusqanta nerqa.

Ernesto: Ah arí, yuyariniña.

Julio: Chayrayku chay qanchis wata juntʼaqa mana qanchis watasllachu karqa.

Ernesto: Chantá, ¿mashkha unay karqa?

Julio: Kay Apocalipsis libropi uj profecía tiyan, chaypitaj nishan 1.260 pʼunchaykunaqa kinsa wata khuskanniyoj kasqanta.d Chaytaj chay qanchis wata juntʼa mashkha unaychus kasqanta yachanapaj yanapawasun. Sichus 1.260 pʼunchaykuna kinsa wata khuskanniyoj chayqa, qanchis wata juntʼaqa 2.520 pʼunchaykuna kanman, ¿ichari?

Ernesto: Arí. Jinapis nirajpuni entiendenichu, imajtinchus Diospa Reinon 1914 watapi kamachiyta qallarisqanta creesqaykichejta.

Julio: Sutʼincharinallapuni. Wakin kutisqa Bibliaj profeciasninpi uj wata uj pʼunchaywan ninakun.e Chayrayku 2.520 pʼunchaykunaqa, 2.520 watas kasqanta nisunman. Chay 2.520 watastaj nerqanchej jina, 607 watapi (J.n.j.) qallarerqa, tukukorqataj 1914 watapi, Jesús jamusqanmantaña (J.j.).f Chayrayku nisunman qanchis wata juntʼaqa 1914 watapi tukukusqanta, chay watallapitaj Jesús Diospa Reinonpi kamachinanpaj churasqa kasqanta. Chantapis 1914 watapeqa imaymana jatun llakiykuna qallarerqa, chaykunataj Biblia nin jina, kay qhepa pʼunchaykunapi rikukunan karqa.

Ernesto: ¿Jatun llakiykuna ninki?

Julio: Arí, Mateo 24:7 chay llakiykunamanta parlashan. Chaypi nin: “Uj nación waj naciompa contranta oqharikonqa, uj reinopis waj reinoj contranta; jinallataj kanqa yarqhaykuna, sinchʼi jallpʼa ikhakuykuna ima kaynejpi, jaqaynejpi”, nispa. Leenchej jina Jesusqa yarqhay, jallpʼa ikhakuykuna ima kananta nerqa. Chaykunataj 1914 watamantapacha mayta rikukun.

Ernesto: Arí maytapuni.

Julio: Jesusqa guerras kananta nillarqataj. Apocalipsis librotaj, chay guerrasqa mana uj lugarllapichu kananta sutʼincharqa, manaqa Jallpʼantinpi.g ¿Yuyarinkichu maykʼajchus Ñaupaj Kaj Guerra Mundial qallarisqanta?

Ernesto: Ah 1914 watapi, ¿i? Jesús kamachiyta qallarerqa ninkichej chay watapipuni. Nipuni cuentata qokorqanichu.

Julio: Qanchis wata juntʼa profeciata chantá qhepa pʼunchaykunamanta profeciatawan entiendespaqa, Jesús 1914 watapi kamachiyta qallarisqanta sutʼita reparanchej. Reparallanchejtaj chay watamantapacha qhepa pʼunchaykunapi kashasqanchejta.h Chayrayku Jehovaj testigosnenqa chaykunamanta mana iskayrayaykuchu.

Ernesto: Tʼukurpachiwankipuni.

Julio: Arí, noqapis yachakushaspa mana entiendeyta atillarqanichu. Ichá 1914 wata, Bibliapi mana rikhurinchu. Chayrayku Jehovaj testigosnenqa Jesús 1914 watapi kamachiyta qallarerqa ninaykupajqa, Bibliata sumajta ukhuncharerqayku. Kay parlarisqanchejtaj, chayta reparanaykipaj yanapasunanta munayman.

Ernesto: Arí, yanapashawan. Qanqa Bibliawanpuni sutʼinchariwanki, chaytataj may allinpaj qhawani. Imallatapis tapojteyqa, ni jaykʼaj yuyasqaykiman jinallachu kutichiwanki. Jinapis Bibliata mana entiendeyta atikullanchu. Sichus Dios 1914 watapi Jesús kamachiyta qallarenqa ninman karqa chayqa, aswan sutʼi kanman karqa.

Julio: Sumajta yuyaycharikunki don Ernesto. Bibliaqa wakin imasta ma sutʼitachu willawanchej. ¿Imaraykú Dios ajinata qhelqachinman karqa? Nisunman, ¿imaraykú Bibliata entiendenanchejpaj kallpachakunanchej tiyan? Qhepan semana chaymanta parlarisunman.

Ernesto: Ya, jamullanki á.