Jeremiasqa, ñawpaqllamanpuni rirqa

¿WAKIN kuti manaña ñawpaqman rinaykipaqjinachu kasqaykita yuyanki?a... Achkha runas ajinapi rikukurqanku. Paykunamanta jukninqa waynuchu Jeremías karqa. Chaywanpis payqa, runas asipayaptinkupis, ñawpaqmanpuni rirqa. Qhawarinachik imaraykuchus Jeremiasta Dios jarkʼasqanta, imaraykuchus juk kuti manaña ñawpaqman riyta munasqanta ima.

Niraq Jeremías nacekuchkaptin, Jehovaqa, profeta kananpaq payta akllarqa israelitasman willananpaq mana kasusqankurayku, paykunapaq phiñasqa kachkasqanta. ¿Astawan qhipaman Jeremías imatachus Jehovaman nisqanta yachankichu?... Pay nirqa: “Noqaqa waynallaraj kani, nitaj sumajta parlaytapis atinichu”, nispa.

¿Imatataq Jehová kutichisqanta yuyanki?... Kʼachamanta nirqa: “Ama niwaychu waynallaraj kasqaykita. Qanqa rinayki tiyan, maymanchus kachasqayki, chayman, imatachus kamachisusqaytataj willamunki. Ama paykunamanta manchachikuychu, imaraykuchus noqaqa qanwan kasaj waqaychanasuypaj”, nispa (Jeremías 1:4-8).

Chaywanpis aswan qhipaman Jeremiasqa, manaña ñawpaqman rinanpaqjinachu kasqanta yuyarqa. Imaraykuchus Diosmanta willasqanrayku tukuy tiempo runas asipayaq kanku. Chayrayku nirqa: “Manaña Tata Diospi yuyasajchu, niñataj sutimpipis parlasajchu”, nispa. Chaywanpis, ¿manañachu Diosmanta parlarqa?

Aswan qhipaman pay nirqa: ‘Diospa Palabran sunquypi ninajina ruphaykuwan, tullusniykamataq chayan, sunquyta ñitʼiykukuyta munachkaspapis, manapuni atinichu’, nispa (Jeremías 20:7-9). Wakin kuti manchachikuspapis, Diosta munakusqanrayku, payta kasukullarqapuni. Chayrayku imaynatachus Jehová jarkʼasqanta qhawarinachik.

Jehovaqa, israelitasman Jeremiasta kacharqa mana kasukullaptinkupuni Jerusalén thuñisqa kananta willananpaq. Chaywanpis, Jeremiasta uyariytawan paykunaqa mayta phiñakurqanku, nirqankutaq: “Kay runaqa wañuchisqa kanan tiyan”, nispa. Chaywanpis Jeremías paykunaman nirqa: ‘Jehovata kasuychik. Sichus wañuchiwankichik chayqa, juchachasqa kankichik, juk mana juchayuqta wañuchisqaykichikrayku, imaraykuchus chiqamanta Diospuni kachamuwarqa’, nispa. ¿Yachankichu chantá imachus pasasqanta?...

Biblia nin: “Kurajkuna, tukuy llajtamanta kuraj runaspis sacerdotesman, jinataj profetasmampis nerqanku: Mana imapis kanchu kay runata wañuchinapaj jinaqa; payqa Señorninchej Tata Diospa sutimpi parlawarqanchej”, nispa. Jeremías manchachikuyninwan mana atipachikusqanrayku Jehová payta jarkʼarqa. Kunantaq imaraykuchus profeta Uriasta mana jarkʼasqanta qhawarina.

Profeta Uriaspis Jeremiasjinallataq, Diospa sutinpi, Jerusalenpa contranta parlarqa. Rey Joacimtaq, chayta uyarispa Uriasta wañuchiyta munarqa, ¿yachankichu imatachus Urías ruwasqanta?... Arí, mancharikuspa, Egiptoman ayqirikapusqa manañataq imatachus Jehová kamachisqanta ruwarqachu. Chantá reyqa, kamachisninta Egiptoman kachasqa Uriasta apamunankupaq. Apamuptinkutaq Joacim, ¿imata ruwasqantataq yuyanki?... Arí Uriasta wañuchirqa (Jeremías 26:8-24).

¿Imaraykutaq Jehová mana Jeremiastajinachu Uriasta jarkʼarqa?... Imaraykuchus Jeremiasqa, wakin kuti ichá mancharisqa kachkaspapis, mana ayqirikapurqachu, manaqa Diosta kasukuspa ñawpaqllamanpuni rirqa. Profeta Uriasrí mana kikintachu ruwarqa. ¿Imatá Jeremiasmanta yachakunchik?... Diospi atienekunata, payta kasukunata ima, wakin kuti mana atikuptillanpis.